ފަތުރުވެރިންގެ ސަލާމަތާއި ރައްކާތެރިކަން ކަށަވަރު ކުރުމަށް މަޓާޓޯއިން ގޮވާލައިފި

ފަތުރުވެރިންނަށް ޚިދުމަތް ދިނުމަށް ގާއިމުކޮށްފައިވާ ތަންތަނުން ފަތުރުވެރިންގެ ސަލާމަތާއި ރައްކާތެރިކަން ކަށަވަރުކުރުމަށް ޓްރެވަލް އޭޖެންޓުންނާއި ޓުއަރ އޮޕަރޭޓަރުންގެ ޖަމިއްޔާ (މަޓާޓޯ) އިން ގޮވާލައިފިއެވެ.

މާޓާޓޯ އިން ނެރުނު ބަޔާނުގައި އެ ޖަމިއްޔާ އިން ވަނީ މި އަހަރުގެ މިހާތަނަށް ޓޫރިސްޓުންނަށް ހިދުމަތް ދޭ ބައެއް ތަންތަނުގައި ހިނގާފައިވާ ހާދިސާތަކާ މެދު ކަންބޮޑުވުން ފާޅުކޮށްފައެވެ. އަދި ފަތުރުވެރިކަމަށް އެހާ ބޮޑަށް ބަރޯސާވާ ގައުމެއްގައި، ނޫސްތަކުގެ ސުރުހީތަކަށް ހިތާމަވެރި ހާދިސާތައް އާންމުކޮށް އެރުމަކީ ފަތުރުވެރިކަމުގެ މަންޒިލެއްގެ ގޮތުގައި ރާއްޖެއަށް އިއާދަނުކުރެވޭ ފަދަ ގެއްލުންތަކެއް ކުރިމަތިވެދާނެ ކަމެއް ކަމަށް ވެސް މަޓާޓޯ އިން ބުންޏެވެ.

މަޓާޓޯ އިން އިތުރަށް ބުނީ މީގެ ކުރިން އެ ޖަމިއްޔާ އިން ރާއްޖޭގައި ހުންނަ ޗައިނާ އެމްބަސީއާ ގުޅިގެން ސަލާމަތީ ކަންކަމަށް ހޭލުންތެރި ކުރުމުގެ މައުލޫމާތު ކަރުދާސްތައް ބަހާފައިވާ ކަމަށެވެ. އަދި އެފަދަ މައުލޫމާތަކީ ދުނިޔޭގެ އެކި ބަސްތަކުން ތައްޔާރުކުރެވި، ރިސޯޓުތަކާއި ގެސްޓް ހައުސްތަކާއި ލިވްއަބޯޑުތަކުގެ އިތުރުން ހޮޓެލްތަކުގައި ލިބެން ހުންނަންޖެހޭނެ މައުލޫމާތެއް ކަމަށް އެ ޖަމިއްޔާ އިން ވަނީ ބުނެފައެވެ.

ހިތާމަވެރި ހާދިސާތަކާއި ގުޅިގެން ޓޫރިޒަމް މިނިސްޓްރީން ވަނީ ރާއްޖޭގެ ހުރިހާ ޓޫރިސްޓު އެކޮމަޑޭޝަން ފެސިލިޓީތައް އިންސްޕެކްޓުކުރުމަށް ނިންމާ އެކަން އިއުލާނު ކޮށްފައެވެ. އަދި ގިނަ ފަތުރުވެރިންތަކެއް މަރުވަމުން ދާތީ، ރާއްޖޭގެ ކޮންމެ ރަށެއްގައި ވެސް ފެތުމަށް ރައްކާތެރި ސަރަހައްދުތައް ކަނޑައެޅުމަށް ނިންމާފައިވާކަމަށް ޓުއަރިޒަމް މިނިސްޓަރ އަލީ ވަހީދުވަނީ ނިމިގެންދިޔަ ހަފްތާގައި އިއުލާންކުރައްވާފައެވެ.