އެސްޓީއޯގެ ކޮންސްޓްރަކްޝަން ސާމާނު ބާލަން ގުޅީފަޅުގައި ބަނދަރެއް ހަދަނީ
ޝަހީރު ވިދާޅުވީ އެކުންފުނިން މިހާރު ވަނީ ގުޅީފަޅުން ބިމެއް ނަގާފައި ކަމަށް
އެސްޓީއޯގެ މެނޭޖިންގް ޑިރެކްޓަރު އަހްމަދު ޝަހީރު
ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) އިން ގެންނަ ކޮންސްޓްރަކްޝަން ސާމާނު ބޭލުމަށް ގުޅީފަޅުގައި ބަނދަރެއް ހެދުމަށް ނިންމާފައިވާ ކަމަށް އެކުންފުނީގެ މެނޭޖިންގް ޑިރެކްޓަރު އަހްމަދު ޝަހީރު ވިދާޅުވެއްޖެއެވެ.
އެސްޓީއޯ އިން ބޭއްވި އެކުންފުނީގެ އަހަރީ އާންމު ޖަލްސާގައި ވާހަކަ ދައްކަވަމުން ޝަހީރު ވިދާޅުވީ އެކުންފުނިން މިހާރު ވަނީ ގުޅީފަޅުން ބިމެއް ނަގާފައި ކަމަށާއި ބޮޑެތި އާގު ބޯޓުތައް ގާތް ކުރެވޭ ވަރުގެ ބަނދަރެއްގެ މަސައްކަތް އެބިމުގައި ފަށާފައިވާކަމަށެވެ.
"ކ. ގުޅީފަޅުގައި މިހާރު ވަނީ ބިމެއް ނަގައި ބާރތިން ފެސިލިޓީ (ބަނދަރު ކުރުމުގެ މަސައްކަތް) ފަށާފައި. މި މަސައްކަތް ދެތިން އަހަރުގެ ތެރޭގައި ނިމޭނެ" ޝަހީރު ވިދާޅުވިއެވެ.
މީގެ އިތުރުން ޝަހީރު ވިދާޅުވީ އެސްޓީއޯ އިން ވިއްކާ ރެޑީމިކްސް ކޮންކްރީޓަށް އޮތް ޑިމާންޑް ބޮޑުވުމާ ގުޅިގެން އެ ޕްލާންޓު މާލެ އިންޑަސްޓްރިއަލް ވިލެޖަށް ބަދަލުކުރުމުގެ މަސައްކަތް ކުރަމުންދާ ކަމަށެވެ. އެތަނުގެ ބޮޑު މިނަކީ 40،000 ސްކޮޔާ ފީޓެވެ. މި މަޝްރޫއުގެ އަގަކީ 308 މިލިޔަން ރުފިޔާއެވެ.
މީގެ އިތުރުން ހުޅުމާލޭގައި ވެސް އެފަދަ ރެޑީ މިކްސް ކޮންކްރީޓުގެ ބެޗިން ޕްލާންޓެއް މިއަހަރު ހުޅުވާނެ ކަމަށެވެ. ހުޅުމާލޭގައި ހުޅުވާ ރެޑީ މިކްސް ކޮންކްރީޓް ބެޗިން ޕްލާންޓުގެ އަގަކީ 45 މިލިއަން ރުފިޔާއެވެ.
