ކުރިއަށް އޮތް ދެ އަހަރު ދުވަހުގެ ތެރޭގައި، ފްރާންސްގެ ދިފާއީ ކަންކަމަށް ކުރާ ޚަރަދުތައް އިތުރު ކުރުމަށް އެ ޤައުމުގެ ރައީސް އިމަނުއެލް މެކްރޮން ނިންމަވައިފި އެވެ. 

އެގޮތުން ކުރިއަށް އޮތް ދެ އަހަރު ދުވަހުގެ ތެރޭގައު ފްރާންސްގެ ދިފާއީ ކަންކަމަށް 6.5 ބިލއަން ޔޫރޯ ޚަރަދު ކުރުމަށް ނިންމާފައިވާ ކަމަށް މެކްރޮން ވަނީ ވިދާޅުވެފަ އެވެ. 

މިއީ ރަޝިޔާގެ ބިރުވެރިކަމާއި، އޮންލައިން ޓެރަރިޒަމްގެ ނުރައްކާ އަދި އޮންލައިން ހަމަލާތަކުގެ ސަބަބުން ނިންމާފައިވާ ނިންމުމެއް ކަމަށް ވަނީ ހާމަކޮށްފަ އެވެ. 

ފްރާންސްގެ ސިފައިންނާ މުޚާތަބު ކުރައްވާ ވާހަކަ ދައްކަވަމުން މެކްރޮން ވިދާޅުވީ، 2027 ވަނަ އަހަރާ ހަމައަށް އަހަރަކު 64 ބިލިއަން ޔޫރޯ ދިފާއީ ކަންކަމަށް ޚަރަދު ކުރުމަށް މިހާރު ރޭވިފައިވާ ކަމަށެވެ. އަދި މިއީ ފްރާންސްގެ ރައީސް ކަމުގެ މަގާމަށް 2017 ވަނަ އަހަރު މެކްރޮން ވަޑައިގެންނެވިއިރު ޚަރަދު ކުރި 32 ބިލިއަން ޔޫރޯގެ ދެ ގުނަ އަދަދެއް ކަމަށް ވެސް ފާހަގަ ކުރެއްވި އެވެ.

މީގެ އިތުރުން މެކްރޮން ވިދާޅުވެފައި ވަނީ 1945 ވަނަ އަހަރުން ފެށިގެން ފްރާންސްގެ މިނިވަންކަމަށް މިހާ ނުރައްކާވެފައި ނުވާ ކަމަށެވެ. އަދި ދުނިޔޭގައި މިނިވަންވެ ތިބުމަށް، ބިރުވެރިކަން ފަހަނައަޅާ ދާން ޖެހޭ ކަމަށް ވެސް މެކްރޮން ވިދާޅުވި އެވެ. 

ފްރާންސްގެ ސަރުކާރުން އެ ޤައުމުގެ ދަރަނި ކުޑަ ކުރަން މަސައްކަތް ކުރަމުން އަންނަ ނަމަވެސް، ދިފާއީ ޚަރަދުތައް އިތުރު ކުރުމަކީ ކުރެވޭނެ ކަމެއް ކަމަށް ވެސް މެކްރޮން ވަނީ ވިދާޅުވެފަ އެވެ. ކޮންޒަވޭޓިވް އަދި ކަނާއަތު ފިޔައިގެ ޕާޓީ ތަކުން މި ނިންމުމަށް ތާއީދު ކުރި ނަމަވެސް، ވާއަތު ފިޔައިގެ ޕާޓީ އަކުން ބުނެފައި ވަނީ މިއީ އިޖުތިމާއީީ ރައްކާތެރިކަމުގެ ފައިދާތައް ޤުރުބާން ކުރުން ކަމަށެވެ. 

މީގެ އިތުރުން މެކްރޮން ވިދާޅުވެފައި ވަނީ ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ އާއި، މެދު އިރުމަތީގެ ހަނގުރާމަ އާއި، އަދި އެމެރިކާގެ ސިޔާސަތުގެ ސަބަބުން ޔޫރަޕަށް ނުރައްކާ ވަމުން އަންނަ ކަމަށެވެ. 

ހަމަ އެހެންމެ ބޭރުގެ ސަރުކާރުތަކުން ފަތުރަމުން އަންނަ ދޮގު މައުލޫމާތާއި، ކުޑަ ކުދިންނަށް އަމާޒުކޮށްގެން ހިންގާ ޕްރޮޕެގެންޑާ ޙަރަކާާތްތަތަކުގެ ވާހަކަ ވެސް މެކްރޮން ވަނީ ފާހަގަ ކުރައްވައިފަ އެވެ. 

މީގެ އިތުރުން، ފްރާންސްގެ ނިއުކްލިއާ ހަތިޔާރުގެ ބޭނުން ޔޫރަޕުގެ ޤައުމުތަކުގެ ރައްކާތެރިކަމަށް ހިފޭނެ ގޮތްތަކާ ގުޅޭ ގޮތުން ޔޫރަޕުގެ ބައިވެރިންނާ އެކު މަޝްވަރާ ކުރުމަށް ވެސް މެކްރޮން ވަނީ ނިންމަވައިފަ އެވެ. ދާދި ފަހުން ފްރާންސްގެ ސަރުކާރުން ވަނީ، ހަތިޔާރާ ގުޅޭ އެއްބަސްވުމެއްގައި އިނގިރޭސިވިލާތުގެ ސަރުކާރާ އެކު އެއްބަސްވުމެއްގައި ސޮއި ކޮށްފަ އެވެ.