މޯލްޑިވްސް ޖޫނިއާ އޯޕަންގެ ނަމުގައި ބެޑްމިންޓަން މުބާރާތެއް

މޯލްޑިވްސް ޖޫނިއާ އޯޕަންގެ ނަމުގައި ބެޑްމިންޓަން މުބާރާތެއް ބާއްވަން އިއުލާން ކޮށްފި އެވެ.

ދަ ބެޑްމިންޓަން ކުލަބު އިން އިސް ނަގައިގެން ބާއްވާ މި މުބާރާތް އޮތީ މިއަހަރުގެ ސެޕްޓެމްބަރު މަހުގެ ތެރޭގަ އެވެ. މި މުބާރާތް ކުރިއަށް ގެންދަނީ އޯޕަން ކެޓަގަރީގެ އިތުރުން، ޕެރަ އެންޑް ސްޕެޝަލް އޮލިމްޕިކްސް ކެޓަގަރީ ވެސް ހިމެނޭ ގޮތުންނެވެ.

މީގެ އިތުރުން ޖޫނިއާ އޯޕަންގައި ނުވަ އަހަރުން ދަށް، 11 އަހަރުން ދަށް، 13 އަހަރުން ދަށް، 15 އަހަރުން ދަށް، 17 އަހަރުން ދަށް އަދި 19 އަހަރުން ދަށުގެ އުމުރުފުރާ އަށް ވެސް މުބާރާތް އޮންނާނެ އެވެ.

މުބާރާތުގެ އޯޕަން ކެޓަގަރީގެ ޕެރަ އެންޑް ސްޕެޝަލް އޮލިމްޕިކްސް ކުރިއަށް ދާނީ ސެޕްޓެމްބަރު މަހުގެ އެއް ވަނަ ދުވަހުން ދެ ވަަނަ ދުވަހަށެވެ. އޯޕަން ޖޫނިއާގެ ކުޅުން ކުރިއަށް ދާނީ ސެޕްޓެމްބަރު ތިން ވަނަ ދުވަހުން، ހަ ވަނަ ދުވަހުގެ ނިޔަލަށެވެ.

އެކުވެނި އިންޑޯ ބެޑްމިންޓަން ކޯޓުގައި މުބާރާތް ކުރިއަށް ގެންދާއިރު، ބެޑްމިންޓަން ކުލަބުން ބުނީ މުބާރާތުގައި ބައިވެރިވުމުގެ ފުރުސަތު ވަރަށް އަވަހަށް ހުޅުވާލާނެ ކަމަށެވެ.

ދަ ބެޑްމިންޓަން ކުލަބަކީ ކުރީގެ ކުޅިވަރު ވަޒީރު އަޙުމަދު މަޚްލޫފްގެ އިސްނެގުމުގެ މަތިން އުފައްދާފައިވާ ކުލަބެކެވެ. މަޚްލޫފް އޭނާގެ ސޯޝަލް މީޑިއާގައި ކޮށްފައިވާ ޕޯސްޓެއްގައި ބުނެފައި ވަނީ، ބެޑްމިންޓަން އަށް އޮންނަ ޚާއްސަ ޝައުޤުވެރިކަމެއްގެ ސަބަބުން، ބެޑްމިންޓަންގެ ކުރިއެރުމަށް ކުލަބު އުފައްދާފައިވާ ކަމަށެވެ.

އަދި ކުލަބުގެ ފުރަތަމަ މުބާރާތް ދިރާގާ ގުޅިގެން ކުރިއަށް ގެންދަން ނިންމާފައިވާއިރު، ރާއްޖޭގެ އެކި ކަންކޮޅު ތަކުން ގިނަ ކުޅުންތެރިންނެއް މުބާރާތުގައި ބައިވެރިވާނެ ކަމަށް އުންމީދު ކުރާ ކަމަށް ވެސް ބުނެފައިވެ އެވެ.