ކ.ރިހިވެލި ކަނޑުއޮޅި ކައިރިއަށް އަޑިއަށްދިޔަ އޯޝަން އެކްސްޕްރެސް ގައި ހުރި ސާމާނު އޮޔާދާނެތީ ސަމާލުވުމަށް އެދިއްޖެއެވެ.

އެމްއެންޑީއެފުން ބުނީ މާލެއިން ފުރައިގެން ލ. ހިތަދޫއަށް ދަތުރުކުރަމުންދަނިކޮށް ބޯޓަށް ކޮންޓްރޯލް ނުވާވަރަށް ދިޔަވެ، ކ. ރިހިވެލި ކަނޑުއޮޅި ކައިރިއަށް ޖުލައި 10 ވަނަ ދުވަހު އަޑިއަށްދިޔަ "އޯޝަން އެކްސްޕްރެސް" ބޯޓުގައި ހުރި ބައެއް ސާމާނު އޮޔާ ދާނެކަމަށް ލަފާކުރެވޭތީ، މި ސަރަހައްދުން ދަތުރުކުރައްވާ ފަރާތްތަކުން ސަމާލުކަން ދިނުމަށް ވަނީ އިލްތިމާސްކޮށްފައެވެ.

އެމްއެންޑީއެފް އިން ބުނީ ރޭގަނޑު އެ ސަރަހައްދުން ދަތުރުކުރައްވާ ފަރާތްތަކުން ދަތުރުކުރެއްވުމުގައި ޚާއްޞަ ސަމާލުކަމެއް ދިނުމަށް އެދޭ ކަމަށެވެ.

މި ހާދިސާގައި ބޯޓު އަޑިއަށް ދިޔަނަމަވެސް އެއިން ދަތުރުކުރި މީހުން ވަނީ ސަލާމަތްވެފައެވެ. ބޯޓުގައި ފަޅުވެރިންނާއެކު 12 މީހަކު ތިއްބެވެ. މި އެންމެން ވަނީ ސަލާމަތުން މާލެ ގެނެސްފައެވެ. އޭގެ ތެރޭގައި ހިމެނެނީ 8 ދިވެހިންނާއި 4 ބިދޭސީންނެވެ. ބޯޓު އަޑިއަށް ދިޔައީ ރާޅެއް އަރައިގެން ފެން ނުހިއްކިގެންނެވެ.