އާއްމުންނަށް ފޮނުވި މެސެޖެއްގެ ސަަބަބުން މެމްބަރު އަސްމާ އާއި މެދު ކޯފާވެ މަޢާފަށް އެދެން ރައީސް މަޖުބޫރުކުރުވައިފި
މާލެ ސަރަހައްދުގައި ބާއްވަމުންދާ ބައްދަލުވުންތަކުގައި އާއްމުން ދަނީ ރައީސް އަށާއި ސަރުކާރަށް ވަރަށް ބޮޑަށް ފާޑުކިޔަމުން
މެމްބަރު އަސްމާ އާއި ރައީސް ޑރ.މުހައްމަދު މުއިއްޒު
އާއްމުންނަށް ފޮނުވި މެސެޖެއްގެ ސަަބަބުން މާފަންނު މެދު ދާއިރާގެ މެންބަރު އަސްމާ ރަޝީދު (އަސްމާއްތަ) އާއި މެދު ރައީސް ޑރ.މުހައްމަދު މުއިއްޒު ކޯފާ އިސްކުރައްވާ، މަޢާފަށް އެދެން މަޖުބޫރުކުރުވައިފި އެވެ.
ކުރިއަށް އޮތް ޑިސެމްބަރު މަހުގެ 4 ވަނަ ދުވަހު މާފަންނު މެދު ދާއިރާގެ މެމްބަރުންނާއި ރައީސް ޑރ.މުހައްމަދު މުއިއްޒު ބައްދަލުކުރެއްވުމަށް އޮތީ ހަމަޖެހިފަ އެވެ. އެ ޖަލްސާގައި ހިޔާލުފާޅު ކުރަން ބޭނުންވާ މީހުން އެކަން އަންގާ ދިނުމަށް އެދިވަޑައިގެން އަސްމާ މާފަންނު މެދު ދާއިރާގެ މެންބަރުންނަށް މެސެޖެއް ވަނީ ފޮނުއްވާފަ އެވެ.
މިފަދަ މެސެޖެއް އަސްމާ ހިއްސާކުރައްވާފައި ވާއިރު މާލެ ސަރަހައްދުގައި ބާއްވަމުންދާ ބައްދަލުވުންތަކުގައި އާއްމުން ދަނީ ރައީސް އަށާއި ސަރުކާރަށް ވަރަށް ބޮޑަށް ފާޑުކިޔަމުންނެވެ. އަދި ޝަކުވާތައް ބަންޑުންކޮށްލާ ސަރުކާރާއި މެދު ހުރި އުދާސްތައް އާއްމުން ދަނީ ހާމަކުރަމުންނެވެ.
އެގޮތުން، މާލެ މައްޗަންގޮޅީގައި ބޭއްވި ބައްދަލުވުމުގައި ބައެއް އާއްމުން ވަނީ ސަރުކާރު ގެ ސިޔާސަތުތަށާއި މަޝްރޫޢުތަކަށް ފާޑު ކިޔާފަ އެވެ. އަސާސީ ބައެއް ޚިދުމަތްތަކާއި ގުޅުން ހުރި ކަންބޮޑުވުންތަކާއި، ސަރުކާރުގެ ބައެއް ސިޔާސާތުތައް އާއްމުންނަށް ފައިދާ ވާ ގޮތަށް ނެތުމުން އެކަމުގެ ކަންބޮޑުވުން ހިއްސާކޮށްފައިވެ އެވެ. އޭގެ ތެރޭގައި ބޯހިޔާވަހިކަމާއި، ދަތުރުފަތުރާއި ގުޅުން ހުރި ކަންބޮޑުވުންތައް ފަދަ ކަންބޮޑުވުންތައް ހިމެނެ އެވެ.
އެ ކަންބޮޑުވުންތައް މީސްމީޑިއާގައި ވަރަށް ބޮޑަށް ވައިރަލް ވެފަިއ ވަނިކޮށް އަސްމާ ކުރެއްވި މެސެޖުގެ ސަބަބުން ކުރިން އެންގުމަކާއި ނުލާ ރައީސާއި ސުވާލު ނުކުރެވޭނެ ކަމަށް އަޑު ފެތުރުނެވެ. އަދި އެކަން ދިފާއުކުރައްވާ ސަރުކާރުގެ ތަރުޖަމާން ހީނާ ވަލީދު ވަނީ ވާހަކަދައްކަވާފަ އެވެ.
އަސްމާގެ އެ މެސެޖާއި ގުޅިގެން ރައީސް ވަނީ ވަރަށް ބޮޑަށް ކޯފާ އިސްކުރައްވާފަ އެވެ. ނަމަވެސް އަސްމާ ވަނީ ވީހާވެސް ގިނަ ރައްޔިތުންގެ ސުވާލާއި ހިޔާލު ރައީސް އަށް ހުށަހެޅުމަށް ފުރުސަތު ހޯދާ ދިނުމަށް މަސައްކަތް ކުރައްވާ ކަމަށް ވިދާޅުވެފަ އެވެ.
އަސްމާ އާއި މެދު ރައީސް ކޯފާ އިސް ކުރައްވާފައި ވާއިރު އޭނާ އާއި މެދު ބައެއް އެހެން ފިޔަވަޅުތައް މި ދަނޑިވަޅުގައި ވަނީ އަޅާފަ އެވެ. އޭގެ ތެރޭގައި ރައްޔިތުންގެ މަޖިލީހުގެ އިޖުތިމާއީ ކޮމިޓީގެ މުގައްރިރުކަމުން ދުރުކުރުމުގެ އިތުރުން ޔޫކޭ-މޯލްޑިވްސް ފްރެންޑްޝިޕް ގްރޫޕުގެ ޗެއާ ކަމުން ދުރުކުރުން ހިމެނެ އެވެ. ހަމަ އެހެންމެ އަސްމާ ޔޫކޭ އަށް ކުރެއްވުމަށް ހަމަޖެހިފައި އޮތް މަޖިލީހުގެ ދަތުރުވެސް ހަމަ މި ދަނޑިވަޅާއި ދިމާކޮށް ވަނީ ކެންސަލްކޮށްފަ އެވެ. އެހެންކަމުން މިއީ އިއްތިފާގެއް ކަމަށް ގިނަ ބަޔަކު ޤަބޫލު ނުކުރެ އެވެ.
މަޖިލިސް މެމްބަރުން ހިމެނޭ ވަޓްސްއެޕް ގްރޫޕަށް ރައީސް ކުރެއްވި މެސެޖުން އެ މަނިކުފާނު އަސްމާ އާއި މެދު ކޯފާ އިސްކުރެއްވިކަން ހާމަވެ އެވެ. ރައީސް ގެ މެސެޖުގައި އަސްމާގެ ސަބަބުން އެ މަނިކުފާނު ބަދުނާމުވި ކަމަށް ސިފަކުރައްވާ އަސްމާ އާއި މެދު ވަރަށް ބޮޑަށް މާޔޫސްވެވަޑައިގަންނަވާފައިވާ ކަަމަށް ވަނީ ވިދާޅުވެފަ އެވެ.
އެހެންކަމުން އާއްމުންނަށް ފެންނާނެހެން މަޢާފަށް އެދުމަށް އަސްމާ އަށް ވަނީ އަންގަވާފަ އެވެ. އެ އެންގުމާއި އެއްގޮތަށް އަސްމާ ވަނީ މަޢާފަށް އެދިވަޑައިގެން ބަޔާނެއް އާއްމު ކުރައްވާފަ އެވެ.
ރައީސް ގެ ބައްދަލުވުންތަކުގެ ތަސައްވުރު ހަޑިކޮށްލި ކަމަށް ބާޔާންކޮށް އަސްމާ އާއި ވަރަށް ކޯފާ އިސްކުރައްވާ ރައީސް ވަނީ ވާހަކަދައްކަވާފަ އެވެ. ރައީސް ވަނީ އަސްމާ ގެ އެ މެސެޖަކީ އެ މަނިކުފާނުގެ އެއްވެސް މަޝްވަރާ އެއް ނެތި ކުރި މެސެޖެއް ކަަމަށް ވިދާޅުވެފަ އެވެ.
