މަޤާމުން ވަކިކުރި ރަޝިޔާގެ ޓްރާންސްޕޯޓް މިނިސްޓަރު ސްޓަރޮވޮއިޓް ފެނުނީ ކާރު ތެރޭގައި މަރުވެފައި އޮއްވާ

ރަޝިޔާގެ ޓްރާންސްޕޯޓް މިނިސްޓަރު ކަމުގެ މަޤާމުން ވަކި ކުރި ރޯމަން ސްޓަރޮވޮއިޓް، އޭނާގެ ކާރު ކޮޅު ތެރޭގައި މަރުވެފައި އޮއްވާ ފެނިއްޖެ އެވެ.

ހޯމަ ދުވަހު ރަޝިޔާގެ ރައީސް ވްލަޑިމިއާ ޕުޓިން ވަނީ ސްޓަރޮވޮއިޓް މަގާމުން ވަކި ކުރައްވައިފަ އެވެ. އުމުރުން 53 އަހަރުގެ ސްޓަރޮވޮއިޓް މަގާމުން ވަކި ކުރި ނަމަވެސް، އޭނާ މަގާމުން ވަކި ކުރި ސަބަބެެއް ރަޝިޔާގެ ރިޔާސީ ގަނޑުވަރުން ހާމަކޮށްފައި ނުވެ އެވެ. 

ނަމަވެސް، ރަޝިޔާގެ ސިޔާސީ މަސްރަހު ދިރާސާ ކުރާ ފަރާތްތަކުން ބުނެފައި ވަނީ، ސްޓަރޮވޮއިޓް މަގާމުން ވަކި ކޮށްފައި ވަނީ، ކާސްކް ސަރަހައްދުގެ ގަވަރުނަރުގެ މަގާމުގައި އޭނާ ހުރި އިރު ހިންގާފައިވާ ކޮރަޕްޝަންގެ އަމަލުތަކުގެ މައްސަލަ ފެންމަތިވުމުންނެވެ. އެ ސަރަހައްދުގެ ގަވަރުނަރުގެ މަގާމުގައި ސްޓަރޮވޮއިޓް ވަނީ ފަސް އަހަރު ވަންދެން ހުންނަވައިފަ އެވެ.

އޭގެ ފަހުން ރަޝިޔާގެ ޓްރާންސްޕޯޓް މިނިސްޓަރުގެ މަގާމަށް ސްޓަރޮވޮއިޓް އައްޔަން ކޮށްފައި ވަނީ 2024 ވަނަ އަހަރުގެ މެއި މަހުގެ ތެރޭގަ އެވެ. އޭނާ މަގާމުގައި ހުންނެވީ އަހަރަކާ ކުޑަ ދުވަސް ކޮޅެއް ވަންދެންނެވެ. 

ރަޝިޔާގެ ތަހުގީގީ އިދާރާތަކާ ހަވާލާދީ މީޑިއާ ތަކުގައި ބުނެފައި ވަނީ، ސްޓަރޮވޮއިޓްގެ ހަށިގަނޑު ފެނިފައި ވަނީ އޭނާގެ ޓެސްލާ ކާރުން ކަމަށެވެ. އަދި އޭނާގެ ހަށިގަނޑުގެ ކައިރީގައި ފިސްތޯލައެއް އޮތް ކަމަށް ވެސް ވަނީ ބުނެފަ އެވެ. ނަމަވެސް މިކަމާ ގުޅޭ އިތުރު ތަފްސީލެއް ރިޕޯޓު ކޮށްފައި ނުވެ އެވެ. 

މީޑިއާ ތަކުގައި ބުނެފައިވާ ގޮތުން ސްޓަރޮވޮއިޓްއާ ދެކޮޅަށް ކުރިއަށް ގެންދަމުން އަންނަ ކޮރަޕްޝަންގެ ތަހުގީގަކީ 2022 ވަނަ އަހަރު ޔުކްރެއިން އާއި ރަޝިޔާގެ ބޯޑަރު ޚަރުދަނާ ކުރުމަށް ކަނޑައެޅުނު 19.4 ބިލިއަން ރޫބަލްސް ނުވަތަ 246 މިލިއަން އެމެރިކާ ޑޮލަރާ ގުޅުން ހުރި މައްސަލަ އެކެވެ. 

ސްޓަރޮވޮއިޓްގެ ފަހުން ކާސްކް ސަރަހައްދުގެ ގަވަރުނަރުގެ މަގާމަށް ވަޑައިގެންނެވި އަލެކްސީ ސަމިރްނޯވް ވަނީ ދިފާއީ ކަންކަމަށް ކަނޑަައަޅާފައިވާ ފައިސާ އަށް ސްޓަރޮވޮއިޓް ޚިޔާނާތްތެރިވެފައިވާ ކަމަށް ތުހުމަތު ކޮށްފަ އެވެ. ނަމަވެސް، ސްޓަރޮވޮއިޓް ވަނީ އޭރު ވެސް އެކަން ދޮގު ކުރައްވައި، ތުހުމަތުތައް އިންކާރު ކޮށްފަ އެވެ.