ރަތް ކަނޑުން ދަތުރު ކުރަމުން ދިޔަ އާގު ބޯޓަކަށް ޔަމަނުން ހަމަލާދީ ފައްތާލައިފި

ރަތްކަނޑުން ދަތުރު ކުރަމުން ދިޔަ އާގު ބޯޓަކަށް ޔަމަނުގެ ޙޫޘީން ހަމަލާ ދީ ފައްތާލައިފިއެވެ.

ޙޫޘީން ބުނެފައި ވަނީ، މި އަހަރުގެ ފުރަތަމަ ކަނޑުމަތީ ހަމަލާގައި ބަޑި އާއި، ރޮކެޓް އަދި ގޮވާތަކެތި ހަރުކޮށްފައިވާ ރިމޯޓް ކޮންޓްރޯލް ބޯޓުތަކުން ހަމަލާދިން މުދާ އުފުލާ އުޅަނދެއް ރަތްކަނޑުގައި ފެތިއްޖެ ކަމަށެވެ.

އުޅަނދުގެ ގްރީކް އޮޕަރޭޓަރު ސްޓެމް ޝިޕިންގ އިން ރޮއިޓަރޒް އަށް ބުނެފައި ވަނީ އެކަން މިނިވަން ގޮތެއްގައި ކަށަވަރުކުރެވިފައި ނުވާ ކަމަށެވެ. އުޅަނދު ފެތިފައިވާކަން ރޮއިޓަރޒް އަށް ވެސް ކަށަވަރު ކުރެވިފައެއް ނުވެއެވެ.

ޙޫޘީން އާދީއްތަ ދުވަހުގެ ހަމަލާގެ ޒިންމާ ނަގައި، ލައިބީރިއާގެ ދިދަ ނަގާފައިވާ ބަލްކް ކެރިއަރ "މެޖިކް ސީސް" އިން 19 ފަޅުވެރިން ފޭބުމުގެ ހުއްދަ ދީފައިވާ ކަމަށް ބުނެފައިވެއެވެ.

ބޯޓުގައި ތިބި ހުރިހާ ފަޅުވެރިން އެހެން ވިޔަފާރި އުޅަނދަކުން ސަލާމަތް ކޮށް، ހޯމަ ދުވަހުގެ ފަހުގެ ވަގުތެއްގައި ޖިބޫތީއަށް ގެންދެވޭނެ ކަމަށް ސްޓެމް ޝިޕިންގ އިން ރޮއިޓަރޒް އަށް ބުނެފައިވެއެވެ.

ހަމަލާ އަށް ފަހު މެޖިކް ސީސް އަށް ދިޔަ ވަމުން ދާ ކަމަށާއި، ބޯޓު ފެތުމުގެ ނުރައްކާ އޮތް ކަމަށް ކުންފުނީގެ ބައެއް މަސްދަރުތަކާ ހަވާލާދީ ރިޕޯޓުތައް ބުނެއެވެ.

އުޅަނދުގައި އުފުލަމުން ދިޔައީ ޗައިނާ އިން ތުރުކީ އަށް ގެންދާ ދަގަނޑާއި ގަސްކާނާއެވެ.

މި ހަމަލާއާ އެކު ދުނިޔޭގެ އެންމެ ބޮޑެތި ކަނޑުދަތުރުފަތުރުގެ މަގުތަކުގެ ތެރެއިން އެއް މަގު ކަމުގައިވާ ރަތްކަނޑުގައި އަމާންކަން ގާއިމު ވެފައި އޮތް ކަމަށް ބެލެވުން، ހަމަސް ދުވަސް ފަހުން ނިމުމަކަށް ވަނީ އައިސްފައެވެ.

2023 ގެ ފަހުކޮޅުން ފެށިގެން 2024 ގެ ފަހުކޮޅާ ހަމައަށް ޙޫޘީންގެ ހަމަލާ ތަކުން ސުވޭޒް ކެނެލް މެދުވެރިކޮށް ޔޫރަޕާއި އޭޝިއާ އާ ދެމެދު ކުރެވޭ ދަތުރުފަތުރަށް ހުރަސް އެޅިފައިވެއެވެ.

2023 ވަނަ އަހަރު ޣައްޒާގައި ހަނގުރާމަ ފެށުމާއެކު ފަލަސްޠީނު ރައްޔިތުންނާ އެއްބައިވުމުގެ ގޮތުން ކަމަށް ބުނެ ޙޫޘީން ރަތްކަނޑާއި، އަދަން ކަނޑާއި، އެ ދެ ކަނޑު ގުޅުވައިދޭ ބާބުލް މަންދަބު ކަނޑުއޮޅީގައި 100 އަށް ވުރެ ގިނަ ހަމަލާ ދީފައިވެއެވެ. ނަމަވެސް މި އަހަރު އެ ހަމަލާތައް ހުއްޓިފައި ވާއިރު، އެންމެ ފަހުން އެނގިފައިވާ ހަމަލާއެއް ދީފައިވަނީ ޑިސެމްބަރު މަހުއެވެ.

ޙޫޘީންގެ އަސްކަރީ ތަރުޖަމާނު ޔަޙްޔާ ސަރީ ޓީވީ މެދުވެރިކޮށް ދިން ބަޔާނެއްގައި ބުނެފައި ވަނީ، އުޅަނދަށް އަމާޒުކޮށްފައިވަނީ އާދީއްތަ ދުވަހު އެމީހުންގެ ކަނޑުގެ ބާރުތަކުން އިންޒާރު ދިނުމުން ވެސް އުޅަނދުގެ ފަޅުވެރިން އެއަށް އިޖާބަނުދިނުމުން ކަމަށެވެ. އޭނާ ބުނެފައިވަނީ އުޅަނދަށް ހަމަލާ ދީފައި ވަނީ ދެ އަންމޭންޑް ބޯޓާއި، ފަސް މިސައިލާއި، ތިން ޑްރޯނުން ކަމަށެވެ.

ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް އާއި، އެ ސަރަޙައްދުގެ ސަލާމަތީ ކަންކަން މޮނިޓަރ ކުރާ ބްރިޓިޝް ސެކިއުރިޓީ ކުންފުނި އެމްބްރީ ގެ އިންޒާރުތަކުގައިވާ ގޮތުން، އުޅަނދާ އެންމެ ފުރަތަމަ ކައިރިވެފައި ވަނީ އަށް ކުދި ބޯޓެވެ. އެ ބޯޓުތަކުން ބަޑިޖަހައި، ރިމޯޓް ކޮންޓްރޯލް މެދުވެރިކޮށް ގްރެނޭޑް ހަމަލާ ދީފައިވެއެވެ. އެއާއެކު ބޯޓުގައި ހަތިޔާރު ހިފައިގެން ތިބި ގާޑުން ރައްދުގައި ބަޑިޖަހާފައިވެއެވެ.

އޭގެ ފަހުން އުޅަނދަށް ހަތަރު ރިމޯޓް ކޮންޓްރޯލް ބޯޓުން ނުވަތަ އަންމޭންޑް ސަރފޭސް ވެހިކަލް އިން މިސައިލް ހަމަލާތައް ދީފައިވާ ކަމަށް އެމްބްރީން ބުނެފައިވެއެވެ.

"ޔޫއެސްވީތަކުގެ ތެރެއިން ދެ އެއްޗެއް އުޅަނދުގެ ޕޯޓް ސައިޑްގައި ޖެހި، އުޅަނދުގެ މުދަލަށް ގެއްލުން ދީފައިވެއެވެ،" އެމްބްރީން ބުނެފައިވެއެވެ. ޔޫކޭއެމްޓީއޯ އިން ބުނެފައިވަނީ މި ހަމަލާތަކުން އުޅަނދުގައި އަލިފާން ރޯވެފައިވާ ކަމަށެވެ.

އަނެއްކޮޅުން، އިސްރާއީލުގެ ސިފައިންގެ ފަރާތުން ހޯމަ ދުވަހު ބުނެފައިވަނީ ޙޫޘީންގެ ބާރުގެ ދަށުގައިވާ ތިން ބަނދަރަކަށް ހަމަލާދީފައިވާ ކަމަށެވެ. ކަނޑުމަތީގައި މި ދިން ހަމަލާއާ އިސްރާއީލުގެ ހަމަލާތައް ގުޅުމެއް ހުރި ކަމެއް ސާފުވެފައެއް ނުވެއެވެ.