ރަޝިޔާގެ ހަމަލާތައް ގުޓަރޭސް ކުށްވެރި ކުރައްވައިފި

ރަޝިޔާ އިން ޔުކްެރެއިން އަށް އަމާޒުކޮށް ދިން ވަރުގަދަ ޑްރޯން ހަމަލާތައް، އދ ގެ ސެކްރެޓަރީ ޖެނަރަލް އެންޓޯނިއޯ ގުޓަރޭސް ކުށްވެރި ކުރައްވައިފި އެވެ.

ތިން އަހަރު ދުވަހުގެ މުއްދަތަކަަށް ކުރިއަށްދާ ރަޝިޔާ ޔުކްރެއިން ހަނގުރާމައިގައި، މި ފަހުން ރަޝިޔާ އިން ވަނީ މިހާތަނަށް ނުދޭ ވަރުގެ ޑްރޯން ހަމަލާތަކެއް ޔުކްރެއިން އަށް ދީފަ އެވެ. މި ހަމަލާތައް ރަޝިޔާ އިން ދީފައި ވަނީ ހުކުރު ދުވަހު އެވެ. 

އެ ހަމަލާތަކާ ގުޅިގެން ގުޓަރޭސް ނެރުއްވި ބަޔާނެއްގައި ބުނެފައި ވަނީ، އެ ހަމަލާތައް ވަރަށް ބޮޑަށް ކުށްވެރި ކުރައްވާ ކަމަށެވެ. އަދި ލަސް ނުކޮށް، ވީ އެންމެ އަވަހަކަށް ޔުކްރެއިން ހަނގުރާމަ ހުއްޓާލުމަށް ވެސް ގުޓަރޭސް ވަނީ ގޮވާލައްވައިފަ އެވެ. 

ރަޝިޔާ އިން ދިން ވަރުގަދަ ޑްރޯން ހަމަލާތަކުން ސަލާމަތްވުމަށް ޔުކްރެއިންގެ ގިނަ ބަޔަކު ވަނީ ރައްކާތެރިކަން ހޯދުމަށް އެކި ތަންތަނަށް ގޮސްފަ އެވެ. އެކަމާ ގުޅިގެން އޭއެފްޕީގެ ނޫސްވެރިން ބުނެފައި ވަނީ، ޔުކްރެއިންގެ ވެރި ރަށް ކީވް ގައި ޑްރޯންގެ ގަދަ ފަދަ އަޑު އިވިފައިވާ ކަމަށާއި، ބާރު ގަދަ ގޮވުންތަކުގެ އަޑު ވެސް އިވިފައިވާ ކަމަށެވެ. 

ރަޝިޔާ އިން ދިން މި ހަމަލާތަކާ، ޔުކްރެއިންގެ ދިފާއީ ބާރުތަކުން ވަނީ ކުރިމަތިލައިފަ އެވެ. ގުޓަރޭސްގެ ތަރުޖަމާނު ސްޓެފާން ޑުޖާރިކް މެދުވެރިކޮށް ހާމަކޮށްފައިވާ އެ ބަޔާނުގައި ބުނެފައި ވަނީ، ރަޝިޔާގެ އެ ނުރައްކާތެރި ހަމަލާގެ ސަބަބުން ޔުކްރެއިންގެ ރައްޔިތުންނަށް ލިބެމުން އަންނަ ގެއްލުންތަކާ މެދު ވެސް ކަންބޮޑުވާ ކަމަށެވެ. 

މީގެ އިތުރުން އެ ބަޔާނުގައި ބުނެފައި ވަނީ އާންމު ރައްޔިތުންނާއި، އާންމު ތަންތަނަށް އަމާޒުކޮށް ހަމަލާ ދިނުމާއި، އާންމު ވަސީލަތްތަކަށް ހަމަލާ ދިނުމަކީ ބައިނަލްއަޤުވާމީ ޤާނޫނުގެ ދަށުން މަނާ ކަމެއް ކަމަށެވެ. އެހެންކަމުން އެ ކަންކަން ވަގުތުން ވަގުތަށް ހުއްޓާލުމަށް ވެސް ވަނީ ގޮވާލައްވައިފަ އެވެ. 

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށްޓަކައި އަންނަނީ ގިނަ މަޝްވަރާތަކެއް ކުރަމުންނެވެ. ޔުކްރެއިންގެ ރައީސް ވުލެޑިމިއަރ ޒެލެންސްކީ މީގެ ކުރިން ވެސް ވިދާޅުވެފައި ވަނީ ވަގުތުން ހަނގުރާމަ ހުއްޓާލުމަށް އެ ޤައުމުން އޮތީ ތައްޔާރަށް ކަމަށެވެ. އަދި އެކަމުގައި ކުރަން ޖެހޭ އެންމެހައި މަޝްވަރާތަކަށް ވެސް ޔުކްރެއިން ތައްޔާރު ކަމަށް ވަނީ ފާހަގަ ކޮށްފަ އެވެ. 

އެހެން ނަމަވެސް ރަޝިޔާގެ ރައީސް ވްލަޑިމިއާ ޕުޓިން އަދި އެ ޤައުމުން ބޭނުން ވަނީ ވަކި ޝަރުތުތަކެއްގެ މަތިން ހަނގުރާމަ ހުއްޓާލުމަށެވެ. އެގޮތުން ޔުކްރެއިންގެ ސަރަހައްދުގެ ބައެއް އެ ޤައުމުން ދޫކޮށްލުމާއި، ޔުކްރެއިން އަށް ތާއީދު ކުރާ ޤައުމުތަަކުން ދެމުން އަންނަ އަސްކަރީ އެހީތެރިކަން ހުއްޓާލުމަށް ވެސް ޝަރުތު ކޮށްފައިވެ އެވެ.