ދާއިރާތަކުގެ ރަށްތަކުގެ ރައްޔިތުންގެ އާދެހަކީ ފެނާއި ނަރުދަމާގެ މަޝްރޫއު ނިންމާލައި، ޚިދުމަތްތައް ފޯރުކޮށްދިނުން: މެންބަރު މައުރޫފް
5 ޖުލައި 2025 | ހޮނިހިރު 11:59ރަށްރަށުގެ ފެނާއިނަރުދަމާގެ މަޝްރޫއުގެ ބޮޑު ބައެއް ނިންމި ނަމަވެސް މިސަރުކާރާއެކު މަޝްރޫއު ވަނީ ހުއްޓިފައި
ރާއްޖެޓީވީގެ ވައުދުނާމާ ޕްރޮގްރާމްގައި ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވާހަކަ ދައްކަވަނީ
ދާއިރާތަކުގެ ރަށްތަކުގެ ރައްޔިތުންގެ އާދެހަކީ އެންމެ ކުޑަމިނުން ފެނާއި ނަރުދަމާގެ މަޝްރޫއު ނިންމާލައި، ޚިދުމަތްތައް ފޯރުކޮށްދިނުން ކަމަށް ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
ރާއްޖެޓީވީގެ ވައުދުނާމާ ޕްރޮގްރާމްގައި މެންބަރު މައުރޫފް ވިދާޅުވީ ކުރީ ސަރުކާރުގައި ފަށާފައިވާ ގިނަ މަޝްރޫއުތައް ހުއްޓިފައިވާ ކަމަށާއި، އައު މަޝްރޫއުތައް ކުރިއަށް ނުދާ ކަމަށެވެ. ދާއިރާގެ ބައެއް ރަށްރަށުގައި ކުރިއަށް ގެންގޮސްފައިވާ ފެނާއިނަރުދަމާގެ މަޝްރޫއުގެ ބޮޑު ބައެއް ނިންމި ނަމަވެސް މިސަރުކާރާއެކު މަޝްރޫއު ހުއްޓިފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ މިއީ ރައްޔިތުންގެ ވަރަށް ބޮޑު ކަންބޮޑުވުމެއް ކަމަށާއި، ދާއިރާތަކުގެ ރައްޔިތުން އާދޭހާއެކު އެދެމުންދަނީ އެންމެ ކުޑަމިނުން ފެނާއިނަރުދަމާގެ މަޝްރޫއު ނިންމާލައި، ޚިދުމަތްތައް ފޯރުކޮށްދިނުން ކަމަށެވެ.
ކުޑަރިކިލުގެ ތަރައްގީގެ މަޝްރޫއުތަކަށް އިޝާރާތް ކުރައްވައި މެންބަރު މައުރޫފް ވިދާޅުވީ އެރަށުގެ ފެނާއިނަރުދަމާގެ މަޝްރޫއު މިސަރުކާރުން ހުއްޓުވާފައިވާ ކަމަށާއި، އެއްވެސް މަސައްކަތެއް ކުރިއަށް ނުދާ ކަމަށެވެ. އަދި ޒުވާނުން އެންމެ ބޮޑަށް އެދެމުންދާ ފުޓްބޯޅަ ދަނޑުގެ މަސައްކަތް ކުރިއަށް ނުދާ ކަމަށް މެންބަރު މައުރޫފް ވިދާޅުވިއެވެ.
މަސައްކަތް ހިނގަމުން ހިނގަމުން ގޮސްގޮސް ހުއްޓާ ކުއްލިއަކަށް މަސައްކަތް ހުއްޓާލީ. އަދި އަދަށްދާންދެން ވެސް މިއަދާ ހަމައަށް އެމަސައްކަތް އެއޮތީ ހުއްޓިފައި. އެއްވެސް މަސައްކަތެއް ނުހިނގާ. ސްކޫލުގެ މަސައްކަތް އޮތީ ހުއްޓިފައި. އިންތިޚާބުގެ ތެރޭގައި ވައުދުވެވަޑައިގެން އެމަސައްކަތް ކުރިއަށް ގެންދާނެ ކަމަށް. ރަށު ކައުންސިލަށް ހަވާލުކޮށްފައި އޮތް ވޭސްޓް މެނޭޖްމަންޓް ޕްރޮޖެކްޓް ކައުންސިލަށް ނޭނގި ފެނަކައާ ހަވާލުކޮށްފި. ބަޖެޓު އޮތީ ކައުންސިލަށް ދީފައި. މިސްކިތް އަޅަން ކައުންސިލްއާ މަޝްވަރާ ކުރުމެއް ނެތި ފެނަކާއާ ހަވާލުކޮށްފި މިސަރުކާރުން. ކުރީ ސަރުކާރުގައި ބަޖެޓު ކޮށްފައި ހުރި މަސައްކަތްތައް މިއީ. މިއިން އެއްވެސް ޕްރޮޖެކްޓެއް މިއަދާ ހަމައަށްއައިރު ފެއްޓިފައި ނެތް. އެއްވެސް މަސައްކަތެއް ނުކުރެވޭ.'ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު
ދޮންފަނުގެ ތަރައްގީއާ ގުޅޭގޮތުން މެންބަރު މައުރޫފް ވިދާޅުވީ ފެނަކަ ދަރާފައިވާ ކަމަށް ބުނެ، ހިނގަމުންދިޔަ ފެނާއި ނަރުދަމާގެ މަޝްރޫއު މިސަރުކާރުން ހުއްޓުވާފައިވާ ކަމަށެވެ. އަދި ބަޖެޓު ކުރެވިފައި އޮތް ސްކޫލުގެ މަލްޓިޕަރޕަސް ހޯލާއި، އިތުރު ކްލާސްރޫމްތައް އެޅުމުގެ މަޝްރޫއު ވެސް ކުރިއަށް ނުދާ ކަމަށް އޭނާ ވިދާޅުވިއެވެ.
މީގެ އިތުރުން ކެންދޫއާ ގުޅޭގޮތުން މެންބަރު މައުރޫފް ވިދާޅުވީ އެރަށުގެ ފެނާއިނަރުދަމާގެ މަޝްރޫއު ނިންމާފައިވީ ނަމަވެސް މިސަރުކާރަށް އެރަށުގެ ރައްޔިތުންނަށް އެ ޚިދުމަތް ގުޅައިނުދެވޭ ކަމަށެވެ. އަދި ބަނދަރު ބޮޑު ކުރުމުގެ މަޝްރޫއާއި މިސްކިތް އިމާރާތް ކުރުމުގެ މަސައްކަތް ވަރަށް ލަސް އޭނާ ފާހަގަކުރެއްވިއެވެ.
މެންބަރު މައުރޫފް ވިދާޅުވީ ފެނަކާގެ އިންޖީނުގެ ނިމިފައިވީ ނަމަވެސް އަދިވެސް ރީލޮކޭޓް ނުކުރެވޭ ކަމަށާއި، ކަރަންޓު ވިއު ރަނގަޅު ނުކުރެވޭ ކަމަށެވެ. އަދި ފާއިތުވެދިޔަ ދުވަސްތަކުގައި ކަރަންޓު ނުލިބި އެރަށުގެ ރައްޔިތުން ވަރަށް ދަތިހާލުގައި ދިރިއުޅުނު ކަމަށް އޭނާ ވިދާޅުވިއެވެ.
ރައީސް މުއިއްޒު ކެންދޫއަށް ރިޔާސީ އިންތިޚާބުގެ ކެންޕޭން ތެރޭގައި ބަނދަރުގެ މައްސަލަ ހައްލުކޮށްދެއްވާނެ ކަމަށް އަދި ކެންދޫގެ ބިން ހިއްކައި، ކެންދޫގެ އުތުރުފަރާތަށް ފަސްއަޅައި، މަގުތައް ހައްދަވައިދެއްވާނެ ކަމަށް ވަނީ ވިދާޅުވެފައި. އެހެންނަމަވެސް މިއަދާ ހަމައަށް އައިރު ދާއިރާގެ އެހެން ރަށްތަކެކޭ އެއްގޮތަށް އެއްވެސް މަޝްރޫއެއް ކުރިއަށް ނުދޭ. ކުރީ ސަރުކާރުގައި ފަށާފައިވާ ނަރުދަމާގެ މަސައްކަތް މަހެއްހާ ދުވަސްކުރިން ނިންމާލެވިފައި. ސަރުކާރު ބަދަލުވިއިރުގައި 80 އިންސައްތަ މަސައްކަތް ވަނީ ނިމިފައި. އެހެންނަމަވެސް މިއަދާ ހަމައަށްއިރު ގޭގެއަށް އެޚިދުމަތް ފޯރުކޮށްނުދެވޭ.ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު
މެންބަރު މައުރޫފް ވިދާޅުވީ ކިހާދޫގައި ވެސް ފެނާއިނަރުދަމާގެ މައްސަލަަ ވަރަށް ބޮޑު ކަމަށާއި، އެ މަޝްރޫއު ކުރީ ސަރުކާރުގައި ކުރިއަށް ގެންދިޔަ ނަމަވެސް މިސަރުކާރުގައި އެމަޝްރޫއު ހުއްޓުވާފައިވާ ކަމަށެވެ. ފުޓްބޯޅަދަނޑުގެ މަސައްކަތް ހުއްޓިފައިވާއިރު، އެމަޝްރޫއާ މެދު އުންމީދެއް ނެތް ކަމަށް އޭނާ ވިދާޅުވިއެވެ. މެންބަރު މައުރޫފް ވިދާޅުވީ ކިހާދޫގެ އިންޖީނުގެ ރީލޮކޭޓް ކުރުމާއި، އެރަށު ސްކޫލުގެ މަލްޓިޕަރޕަސް ހޯލުގެ މަސައްކަތް ވެސް ކުރިއަށް ނުދާ ކަމަށެވެ. އަދި ވިދާޅުވީ މިފަހުން އެރަށުގެ ރިވެޓްމަންޓު ޖެހުމުގެ މަޝްރޫއު ނިމުނު ނަމަވެސް ރިވެޓްމަންޓު ތިރިކަމުން ރަށުތެރެއަށް ރާޅު އަރާ ކަމަށާއި، އެކަމުގެ ކަންބޮޑުވުންތަކެއް އެބަހުރި ކަމަށެވެ.
ނަމަވެސް ރައްޔިތުންގެ ކަންބޮޑުވުންތައް އަޑުއަހާނެ ސަރުކާރެއް ނެތް ކަމަށް މެންބަރު މައުރޫފް ވިދާޅުވިއެވެ.
މީގެ އިތުރުން މެންބަރު މައުރޫފް ވިދާޅުވީ ކަމަދޫގައި ވެސް ތަރައްގީގެ މަޝްރޫއެއް ކުރިއަށްނުދާ ކަމަށެވެ.
އެގޮތުން ކަމަދޫގެ ވެސް ބަނދަރާއި ރިވެންޓްމަންޓުގެ މަސައްކަތް އެއްކޮށް ނިންމާނުލެވޭ ކަމަށާއި، ސްކޫލު އިތުރަށް ތަރައްގީ ކުރުމުގެ މަސައްކަތް ފެށިފައިނުވާ ކަމަށެވެ. އަދި ކޮންވެންޝަން ސެންޓަރު މަސައްކަތް ނުފެށޭ ކަމަށާއި، ފުޓްބޯޅަދަނޑުގައި ވެސް ޓާފު ނޭޅި ހުއްޓިފައިވާ ކަމަށް އޭނާ ވިދާޅުވިއެވެ.
މެންބަރު މައުރޫފް ވިދާޅުވީ އަތޮޅުތެރޭގެ ރަށްރަށުގެ ތަރައްގީގެ މަޝްރޫއުތައް ކުރިއަށްނުދާތީ، ޚާއްސަކޮށް ދާއިރާގެ ރަށްތަކުގައި މަޝްރޫއުތައް ކުރިއަށް ނުދާތީ ކަމާގުޅުންހުރި ވަަޒީރުން މަޖިލީހަށް ހާޒިރުކޮށް ސުވާލު ކުރަމުންދާ ކަމަށާއި، ނަމަވެސް ހަގީގަތް ހާމަނުކުރާ ކަމަށެވެ. އަދި އެވަޒީރުންގެ ފަރާތުން ރައްޔިތުން އުންމީދުކުރާ ޖަވާބެއް ނުލިބޭ ކަމަށް އޭނާ ވިދާޅުވިއެވެ.
