ތ.ވިލުފުށީގައި އޮތް ތެޔޮ ބޯޓެއްގައި ރޯވެ، އެކަކަށް އަނިޔާވެއްޖެއެވެ.

މީސްމީޑިއާގައި ދަުރުވަމުންދާ ވީޑިއޯ އިން ފެންނަ މަންޒަރުތަކުން އެނގޭ ގޮތުން މި ބޯޓުގައި ވަނީ ވަރަށް ބޮޑަށް ރޯވެފައެވެ.

މި ހާދިސާ އާއި ގުޅޭ ގޮތުން ފުލުހުންނާއި ސުވާލުކުރުމުން ފުލުހުން ރާއްޖެ އެމްވީ އަށް ބުނެފައި ވަނީ މި ހާދިސާގެ މައުލޫމާތު ފުލުހުންނަށް ރިޕޯޓްކޮށްފައި ވަނީ އަންގާރަ ދުވަހުގެ ހެނދުނު 09:15 ހާއިރު ކަމަށެވެ. އަދި ރޯވެފައި ވަނީ ތެޔޮ ބޯޓެއްގައި ކަމަށް ފުލުހުންނަށް މިހާތަނަށް ލިބުނު މައުލޫމާތުތަކުން އެނގޭ ކަމަށް ފުލުހުންގެ މީޑިއާ އޮފިޝަލަކު ވަނީ މި ނޫހަށް މައުލޫމާތު ދެއްވަމުން ވިދާޅުވެފައެވެ.

މީގެ އިތުރުން މިހާދިސާގައި އެކަކަށް އަނިޔާ ލިބިފައިވާ ކަމަށާއި އޭނާ އަށް ވިލުފުށީ ސިއްހީ މަރުކަޒުގައި ފަރުވާ ދެމުންދާ ކަމަށް ވެސް ފުލުހުން ވަނީ ބުނެފައެވެ. ނަމަވެސް އަނިޔާވި މީހާ އަކީ ބިދޭސީއެކަން ނުވަތަ ދިވެއްސެއްކަން ފުލުހުން ސާފުކޮށްދީފައެއް ނުވެއެވެ. އަދި އޭނާ އަށް ލިބުނު އަނިޔާގެ ތަފްސީލް ވެސް އަދި ހާމަކޮށްފަ އެއް ނުވެއެވެ.

މި ހާދިސާ އާއި ގުޅިގެން އެމްއެންޑީއެފުން ބުނީ ތ.ވިލިފުށީ ފަޅުތެރޭގައި އޮތް ތެޔޮބޯޓެއްގައި އަލިފާން ރޯވެގެން، އެމްއެންޑީއެފް ސެންޓްރަލް އޭރިއާ ކޮމާންޑްގެ ފަޔަރ ކޮމްޕޯނަންޓްގެ ސިފައިން ދަނީ އަލިފާން ނިއްވުމުގައި ހަރަކާތްތެރިވަމުން ކަމަށެވެ. އެމްއެންޑީއެފުން ބުނީ އެ ހާދިސާގެ މައުލޫމާތު މި ހާދިސާގެ މަޢުލޫމާތު ލިބިފައިވަނީ އަންގާރަ ދުވަހު 09:41ގައި ކަމަށެވެ.

މިހާދިސާ ހިނގަން މެދުވެރިވި ސަބަބު މިހާތަނަށް ސާފުވެފަ އެއް ނުވެއެވެ.