ޗެލްސީ ދޫކޮށް ޖިރޫޑް މިލާނަށް

ހިލޭ ޓްރާންސްފާއެއްގެ ދަށުން ފްރާންސްގެ ފޯވާޑް އޮލިވިއޭ ޖިރޫޑް އޭސީ މިލާނަށް ބަދަލުވެއްޖެއެވެ.

ޗެލްސީ ދޫކޮށް އުމުރުން 34 އަހަރުގެ ޖިރޫޑް މިލާނަށް ބަދަލުވިއިރު، އޭނާ އެންމެ ފުރަތަމަ އެ ޓީމާ ގުޅުނީ 2018 ވަނަ އަހަރުގެ ޖެނުއަރީ މަހު 18 މިލިޔަން ޕައުންޑުގެ ފީއަކަށެވެ.

ހިލޭ ޓްރާންސްފާއެއްގެ ދަށުން ޖިރޫޑް މިލާނަށް ބަދަލުވިއިރު، އޭނާ އެންމެ ފަހުން ޗެލްސީގެ އެއްބަސްވުން އާކުރީ މިދިޔަ އަހަރުގެ މެއި މަހުގެ ތެރޭގައި، މި ނިމުނު ސީޒަނުގެ ނިޔަލަށެވެ. އެކަމަކު މިދިޔަ އަހަރުގެ ހޫނު މޫސުމުގެ ޓްރާންސްފާ ބާޒާރުގައި ޗެލްސީން ޖަރުމަނުގެ ފޯވާޑް ޓިމޯ ވާނާ ގެނައި ފަހުން ޖިރޫޑަށް ޗެލްސީގެ ފުރަތަމަ އެގާރައިން ފުރުސަތު ލިބުން މަދުވިއެވެ.

ރިޕޯޓުތައް ބުނާ ގޮތުން ޖިރޫޑް ވަނީ މިލާނާއެކު ދެ އަހަރުގެ އެއްބަސްވުމެއް ހަދާފައެވެ. މިލާނުން ޖިރޫޑުގެ ސޮއި ހޯދިއިރު، އޭނާ ހޯދަން ޔުވެންޓަސްއިންވެސް މަސައްކަތްކުރި ކަމަށް ރިޕޯޓުތައް ބުނެއެވެ.

މީގެ ކުރިން އާސެނަލުން ވިދާލި ޖިރޫޑް ޗެލްސީ ދޫކޮށްލިއިރު، އޭނާ ވަނީ ޗެލްސީއާއެކު ގިނަ ކާމިޔާބީތަކެއް ހޯދާފައެވެ. އެގޮތުން ޖިރޫޑް ވަނީ ޗެލްސީއާއެކު އެފްއޭ ކަޕާއި ޔުއެފާ ޗެމްޕިއަންސް ލީގު އަދި ޔުއެފާ ޔޫރޮޕާ ލީގުވެސް ކާމިޔާބުކޮށްފައެވެ. އަދި ޖިރޫޑް ވަނީ ޗެލްސީއަށް ކުޅެދިން 119 މެޗުގައި 39 ލަނޑު ކާމިޔާބުކޮށްފައެވެ.