އެމްޑީޕީގެ ޖަލްސާ ބާއްވަން ފުރުސަތު ނުދިނުން ދިފާއުކޮށް ސަރުކާރުގެ ތަރުޖަމާނު ހީނާ ވާހަކަ ދައްކަވައިފި
20 ޖޫން 2025 | ހުކުރު 06:42ޚިޔާލު ފާޅުނުކުރެވޭ ގޮތަށް އޮތް އޮތުމާއި ދެކޮޅަށް ވެސް ރައީސް މުއިއްޒު ވަނީ ކުރިން ވާހަކަދައްކަވާފަ
ސަރުކާރުގެ ތަރުޖަމާނު، ހީނާ ވަލީދު
ޑިމޮކްރެޓްސްގެ މެމްބަރުން އެމްޑީޕީ އާއި ގުޅުމާއި އެމްޑީޕީގެ އަހަރީ ދުވަސް ފާހަގަކުރުުމަށް ޖަލްސާ ބާއްވަން ސަރުކާރުން ތަނެއް ނުދިނުން ދިފާއުކުރައްވާ ސަރުކާރުގެ ތަރުޖަމާނު، ހީނާ ވަލީދު ވާހަކަދައްކަވައިފިއެވެ.
އޭނާ އެފަދައިން ވާހަކަދައްކަވާފައި މި ވަނީ ޑިމޮކްރެޓްސްގެ މެމްބަރުން އެމްޑީޕީ އާއި ގުޅުމާއި އެމްޑީޕީގެ އަހަރީ ދުވަސް ފާހަގަކުރުުމަށް ޖަލްސާ ބާއްވަން ސަރުކާރުން ތަނެއް ނުދިނުމުން ދެން އެ ހަރަކާތް ބާއްވާނީ މުލިއާގޭ ކަންމަތީގައި ކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއިލް ވިދާޅުވެފައިވާތީ އެކަމަށް ރައްދު ދެއްވާ އެކްސްގައި ހިއްސާކުރެއްވި ޕޯސްޓެއްގައެވެ.
ހީނާ ވިދާޅުވެފައި ވަނީ ފުރިހަމަ ޑިމޮކްރެސީގެ އަސާސްތައް ރާއްޖޭގައި އަށަގެންނެވުމަށްޓަކައި، ޑިމޮކްރެސީގެ ހަމަތައް ދެމެހެއްޓުމަށްޓަކައި، ޒިއްމާދާރު ސިޔާސީ ޙަރަކާތްތައް ހިންގުމާއި، އަޑު އުފުލުމަކީ ނުހަނު ބޭނުންތެރިކަމެއް ކަމަށެވެ. އަދި ކުރިން ހުއްދަނެގުމަކާނުލާ، މީގެކުރިން އެއްވެއުޅުމުގެ ހުއްދަ އޮންނަނީ ކާނިވާ ސަރަޙައްދަށް އެކަނި ކަމަށް ހީނާ ވަނީ ވިދާޅުވެފައެވެ.
ހީނާ ވަނީ އެކަން މި ސަރުކާރުން ބަދަލުކޮށްފައިވާ ކަމަށް އެ ޕޯސްޓްގައި ވިދާޅުވެފައެވެ. އެގޮތުން މިސަރުކާރުންވާނީ ކާނިވާ ސަރަޙައްދުގެ އިތުރުން މާލޭ ހުޅަނގު ދެކުނު ހިއްކި ސަރަހައްދު (އިންޑަސްޓްރިއަލް ޒޯނުގެ ގޮތުގައި ކަނޑައެޅި)، އުސްފަސްގަނޑާއި ރަސްފަންނަކީވެސް ކުރިން ހުއްދަ ނެގުމަކާނުލާ ސިޔާސީ ހަރަކާތް ހިންގޭނެ ތަންތަން ކަމުގައި ކަނޑައަޅާފަވާނެ ކަމަށް ހީނާ ފާހަގަކުރެއްވިއެވެ.
" އެހެންކަމުން މިގޮތަށް ކަނޑައެޅި، ފުރުަަސަތު ފުޅާކޮށްދެވިފައިވާ ކަންކަމާ ގުޅޭގޮތުން ރައްޔިތުންނަށް އޮޅޭފަދަ ގޮތަކަށް ސިޔާސީ ބޭފުޅުން ވާހަކަ ދެއްކުމުގެ ބަދަލުގައި ކަނޑައެޅިފައިވާ ހަމަތަކާއި އުސޫލުތަކާ އެއްގޮތަށް ކަންކަން ކުރިއަށް ގެންދިއުމަކީ ޜޫލް އޮފްލޯ އާއި ޑިމޮކްރެސީގެ މި ނިޒާމު ދެމެހެއްޓުމުގެ ވަރަށް މުހިއްމު އަދި އެހާމެ ރިވެތި އަސާސެކެވެ." ހީނާގެ ޕޯސްޓްގައި ވަނީ މިފަދައިން ފާހަގަކުރައްވާފައިވެއެވެ.
ކުރީގެ ރައީސް މުހައްމަދު ނަޝީދުއާއި ދަ ޑިމޮކްރެޓްސް އަށް ނިސްބަތްވެވަޑައިގަންނަވާ ގިނަ ބޭފުޅުންތަކެއް އެމްޑީޕީ އާއި ގުޅިވަޑައިގެންނެވުން ފާހަގަކޮށް މަރުހަބާދެންނެވުމަށް ހަފުލާއެއް ބޭއްވުމަށާއި، އެ ޕާޓީގެ 20 ވަނަ އަހަރީ ދުވަސް ފާހަގަ ކުރުމަށްޓަކައި އެކި އިވެންޓްތައް ބޭއްވުމަށް ތަނެއް ހަމަޖެއްސުމަށް މަސައްކަތް ކުރަމުން އައި ކަަމަށް ފައްޔާޒް ވަނީ ވިދާޅުވެފައެވެ. އަދި އެކަމަށްޓަކާ ކުރި މަސައްކަތަށް ޑރ.މުހައްމަދު މުއިއްޒުގެ ސަރުކާރުން ހުރަސް އަޅަމުން ގެންދާތީ މި ހަފްލާތައް ބޭއްވުމަށް މިހާތަނަށް ވެސް އެއްވެސް ތަނެއް ހަމަޖެހިފައިނުވާ ކަމަށް ފައްޔާޒް ވިދާޅުވިއެވެ.
ހީނާގެ ޕޯސްޓަކީ ސިޔާސީ ހަރަކާތަށް ޖާގަ ނުދިނުމުން އާއްމުންގެ ފާޑުކިޔުން އަމާޒުވެފައި ވަނިކޮށް ކުރެއްވި ޕޯސްޓެކެވެ. މީގެ އިތުރުން ކުރިން ހުއްދަނެގުމަކާނުލާ އެއްވެ އުޅެވޭ ތަންތަނުގައި ހަރަކާތް ބޭއްވޭނެ ކަމަށް ހީނާ ވިދާޅުވެފައި ވާއިރު ރިޔާސީ އިންތިޚާބަށް ވާދަކުރެއްވި އިރު ރައީސް މުއިއްޒު ވަނީ ޚިޔާލު ފާޅުކުރުމަކީ ހިފެހެއްޓިފައި އޮންނަން ޖެހޭ ކަމެއް ކަމަށް ޤަބޫލު ނުކުރައްވާ ކަަމަށް ވިދާޅުވެފައެވެ. މީގެ އިތުރުން ވަކި ތަނަކަށް ނޫނީ އެއްވެ ޚިޔާލު ފާޅުނުކުރެވޭ ގޮތަށް އޮތް އޮތުމާއި ދެކޮޅަށް ވެސް ރައީސް މުއިއްޒު ވަނީ ވާހަކަދައްކަވާފައެވެ.
