ސްޕެނިޝް ލަލީގާގައި މާކޯ އެސެންސިއޯގެ ލަނޑުތަކުން ވެލެންސިއާ އަތުން ރެއާލް މެޑްރިޑް ބަލިނުވެ ސަލާމަތްވެއްޖެ އެވެ.
އާދީއްތަ ދުވަހުގެ ރޭ ރެއާލް އަދި ވެލެންސިއާ ބައްދަލުކުރި ފޯރިގަދަ މެޗު އެއްވަރުވީ 2-2 ގެ ނަތީޖާއަކުންނެވެ.
ސަސްޕެންޝަންގެ ސަބަބުން ރެއާލް އިން މި މެޗަށް ނިކުތީ ދުނިޔޭގެ އެންމެ މޮޅު ކުޅުންތެރިޔާ ކްރިސްޓިއާނޯ ރޮނާލްޑޯ ނުލައެވެ. މެޗު ފެށިގެން 10 ވަނަ މިނެޓުގައި އެޓީމުން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބު ކޮށްދިނީ މާކޯ އެސެންސިއޯ އެވެ.
އެހެން ނަމަވެސް މޮޅު ކުޅުމެއް މެޗުގައި ދެއްކި ވެލެންސިއާ އިން ވަނީ 18 ވަނަ މިނެޓުގައި ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ކާލޮސް ސޯލާ އެވެ.
@marcoasensio10 pic.twitter.com/MsUSvNUs6t
— Real Madrid C.F. (@realmadriden) August 27, 2017
މި ލަނޑާއެކު ރެއާލް އިން ވަނީ އެޓީމުގެ އެޓޭކްތައް އިތުރަށް ވަރުގަދަ ކޮށްފައެވެ. އެގޮތުން ލަނޑު ޖަހަން އެޓީމުން ވަނީ ފުލުފުލުގައި ގިނަ ފުރުސަތުތަކެއް ވެސް ހޯދާފައެވެ.
ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމު އެއްވަރު ވެގެންނެވެ.
ދެވަނަ ހާފް ފެށިގެން ވެސް ރެއާލް އިން ބޯޅަ ކޮންޓްރޯލްކޮށް ހަމަލާ އުފައްދަން މަސައްކަތް ކުރި އެވެ. އެހެން ނަމަވެސް ރެއާލް އިން ރަނގަޅަށް ކުޅެމުންދަނިކޮށް 77 ވަނަ މިނެޓުގައި ވެލެންސިއާގެ ކޮންޑޮބިއާ ވަނީ އެޓީމަށް ފުރަތަމަ ފަހަރަށް މެޗުގެ ލީޑު ނަގައިދީފައެވެ.
އެހެން ނަމަވެސް މެޗުގައި މޮޅު ކުޅުމެއް ދެއްކި މާކޯ އެސެންސިއޯ ވަނީ މެޗު ނިމެން ފަސް މިނެޓަށްވެފައި ވަނިކޮށް ރެއާލް އަށް ނަތީޖާ ހަމަހަމަ ކޮށްދީފައެވެ. ރެއާލް އަށް ވަނީ މެޗުގެ ފަހުވަގުތުކޮޅު ލީޑު ނެގުމަށް ވެސް ފުރުސަތު ލިބިފައެވެ. އެގޮތުން ކަރިމް ބެންޒެމާ އަށް ލިބުނު ހުސް ފުރުސަތުތައް ހިމެނެއެވެ.
