ފަހަތުން އަރައި ބެންފީކާ އިން ބޮކާ ޖޫނިއާސްއާ އެއްވަރުކޮށްފި

ފީފާ ކުލަބު ވޯލްޑް ކަޕްގެ ގުރޫޕް ސީގައި ބެންފީކާ އާއި ބޮކާ ޖޫނިއާސް ބައްދަލު ކުރި މެޗު އެއްވަރުވެގެން ނިމިއްޖެ އެވެ.

ހޯމަ ދުވަހުގެ ރޭ ހާޑް ރޮކް ސްޓޭޑިއަމްގައި ކުޅުނު މެޗު ނިމުނީ ދެ ޓީމު 2-2 އިން އެއްވަރުވެގެންނެވެ. މެޗުގައި ބޮކާ ޖޫނިއާސް އިން ދެ ލަނޑު ޖަހައި ކުރި ހޯދާފައި ވަނިކޮށް، ބެންފީކާ އިން ވަނީ ފަހަތުން އަރައި ދެ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗު ފަށައިގެން 21 ވަނަ މިނެޓުގައި ބޮކާ ޖޫނިއާސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ މިހުއޭލް މެރެންޓިއޭލް އެވެ. އެއީ ލައުޓާރޯ ބަލަންކޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ހަ މިނެޓު ފަހުން ބޮކާ ޖޫނިއާސް އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އައިޓަން ކޮސްޓާ ތަނަވަސްކޮށްދިން ފުރުސަތެއްގައި އެ ޓީމުގެ ދެ ވަނަ ލަނޑު ޖެހީ ރޮޑްރީގޯ ބަޓްގްލިއާ އެވެ.

އޭގެ ފަހުން މެޗުގެ ފުރަތަމަ ހާފުގެ 45 ވަނަ މިނެޓުގައި ބޮކާ ޖޫނިއާސްގެ އެންޑާ ހެރޭރާ އަށް ވަނީ ސީދާ ރަތް ކާޑު ދައްކައި ދަނޑުން ފޮނުވާލައިފަ އެވެ. އޭގެ ސަބަބުން މެޗުގެ ބާކީ ބައި އެ ޓީމުން ފުރިހަމަ ކުރަން ޖެހުނީ އެއް ކުޅުންތެރިޔަކު މަދުކޮށެވެ.

ބެންފީކާ އަށް ލިބުނު ޕެނަލްޓީ ކާމިޔާބުކޮށް އެންހެލް ޑި މާރިއާ އެ ޓީމަށް ފަރަގު ކުޑަ ކޮށްދިނީ މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. އޭގެ ފަހުން މެޗުގެ ދެ ވަނަ ހާފުގެ 70 ވަނަ މިނެޓުގައި ބެންފީކާގެ އަންޑްރިއާ ބެލޮޓީ އަށް ވަނީ ސީދާ ރަތް ކާޑު ދައްކައި ދަނޑުން ފޮނުވާލައިފަ އެވެ.

މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށް ބެންފީކާގެ ދެ ވަނަ ލަނޑު ޖަހައި ނަތީޖާ ހަމަހަމަ ކޮށްދިނީ ނިކޮލަސް އޮޓަމެންޑީ އެވެ.

މުބާރާތުގައި ބޮކާ ޖޫނިއާސްގެ ދެ ވަނަ މެޗުގައި އެ ޓީމު ނިކުންނާނީ ޖަރުމަނުގެ ބަޔާން މިއުނިކާ ދެކޮޅަށެވެ. ބެންފީކާގެ ދެ ވަނަ މެޗުގައި އެ ޓީމު ނިކުންނާނީ އޯކްލޭންޑް ސިޓީއާ ދެކޮޅަށެވެ.