އީރާނުން އެމެރިކާ އަށް ހަމަލާ ދީފި ނަމަ، މިހާތަނަށް ނުފެންނަ ވަރުގެ ޖަވާބެެއް ދޭނެ ކަމަށް ޓްރަމްޕް ވިދާޅުވެއްޖެެ

އީރާނުން އެމެރިކާ އަށް އަމާޒުކޮށް އެއްވެސް ހަމަލާއެއް ދީފި ނަމަ، މިހާތަނަށް ނުފެންނަ ވަރުގެ ޖަވާބެއް އެމެރިކާ އިން ދޭނެ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވައިފި އެވެ.

އާދިއްތަ ދުވަހު ޓްރަމްޕް ވިދާޅުވެފައި ވަނީ، އީރާނުން އެއްވެސް ގޮތަކަށް އެމެރިކާ އަށް ހަމަލާ ދީފި ނަމަ، އެމެރިކާގެ އަސްކަރިއްޔާ އިން މިހާތަނަށް ނުފެންނަ ވަރުގެ ބާރު ހުރި ޖަވާބެއް އީރާނަށް ދޭނެ ކަމަށެވެ. ޓްރަމްޕް މިހެން ވިދާޅުވެފައި ވަނީ އޭނާގެ ޓްރުތު ސޯޝަލް މީޑިއާގައި ކުރެއްވި ޕޯސްޓެއްގަ އެވެ.

އެ ޕޯސްޓުގައި ޓްެރަމްޕް ވިދާޅުވެފައި ވަނީ އީރާނަށް އަމާޒުކޮށް އިސްރާއީލް އިން ދެމުން އަންނަ ހަމަލަތަކާ، އެމެރިކާއާ އެއްވެސް ގުޅުމެއް ނޯންނާނެ ކަމަށެވެ. އަދި އޭނާ ވިދާޅުވީ، އީރާނާއި އިސްރާއީލާ ދެމެދު އެއްބަސްވުމަކަށް އާދެވި، މިހާރު ހިނގަމުން އަންނަ ލޭއޮހޮރުވުންތައް ނިންމާލުމަކީ އެމެރިކާ އަށް ކުރެވިދާނެ، "ފަސޭހެ" ކަމެއް ކަމަށެވެ. 

ޓްރަމްޕް މިހެން ވިދާޅުވެފައި ވަނީ ހޮނިހިރު ދުވަހުގެ ރޭ އީރާނާއި އިސްރާއީލާ ދެމެދު ވަރުގަދަ ހަމަލާތަކެއް ބަދަލު ކޮށްފައިވާ ދަނޑިވަޅައެއްގަ އެވެ. އީރާނަށް އަމާޒުކޮށް އިސްރާއީލް އިން ދިން ހަމަލާތަކުގެ ބަދަލުގައި އީރާނުން އަންނަނީ ވަރުގަދަ ހަމަލާތަކެއް ދެމުންނެވެ. 

އީރާނާއި އިސްރާއީލާ ދެމެދު ހަމަލާތައް ބަދަލު ކުރަން ފެށުމާ އެކު، މެދު އިރުމަތީގެ ހަނގުރާމައިގެ ޙާލަތު ގޯސްވެދާނެ ކަމުގެ ބިރު އިންތިހާ އަށް ބޮޑުވެފައިވާ މި ދަނޑިވަޅުގައި، ޓްރަމްޕް މިހެން ވިދާޅުވުމަކީ ކަންބޮޑުވުންތަކަށް އިތުރު ބާރެއް ލިބިގެން ދާނެ ކަމެއް ކަމަށް ސިޔާސީ މާހިރުން އަންނަނީ ފާހަގަ ކުރަމުންނެވެ. 

އެމެރިކާ އަކީ އިސްރާއީލަށް އެންމެ ބޮޑަށް ވާގިވެރިވާ ޤައުމެވެ. އިސްރާއީލް އިން އީރާނަށް ދިން ހަމަލާތަކާ ގުޅިގެން، އީރާނުން ަނީ އެކި އިންޒާރުތައް ދީފަ އެވެ. އެގޮތުން އިސްރާއީލާ ގުޅުން ހުރި ޓާގެޓުތަކަށް ވެސް ހަަމަލާ ދިނުމުގައި އެ ޤައުމުން ފަސް ނުޖެހޭނެ ކަމަށް ބުނެ އީރާނުން ވަނީ އިންޒާރު ދީފަ އެވެ.