ސަމާލުވޭ! ހައްޖު ކޯޕަރޭޝަންގެ ނަމުގައި ސްކޭމް މެސެޖެއް ދައުރުވަނީ
13 ޖޫން 2025 | ހުކުރު 11:38ސްކޭމް މެސެޖުތަކަށް ވަރަށް ބޮޑަށް ސަމާލުވުމަށް މޯލްޑިވްސް ޙައްޖު ކޯޕަރޭޝަނުން ދައުލަތުގެ އިދާރާތަކަށާއި އާންމުންނަށް ވަނީ އެދިފަ
މޯލްޑިވްސް ޙައްޖު ކޯޕަރޭޝަން: އެ ކޯޕަރޭޝަންގެ ނަމުގައި ސްކޭމް މެސެޖުތަކެއް ދަނީ ދައުރުވަމުން
މޯލްޑިވްސް ހައްޖު ކޯޕަރޭޝަންގެ ނަމުގައި ސްކޭމް މެސެޖުތަކެއް ފޮނުވަމުންދާތީ މޯލްޑިވްސް ޙައްޖު ކޯޕަރޭޝަނުން ސަމާލުވާން އެދިއްޖެ އެވެ.
ބުރާސްފަތު ދުވަހާއި އެ ދުވަހުގެ ރޭގައި ވަރަށް ގިނަ ބަޔަކަށް ވަނީ މި ސްކޭމް މެސެޖު ލިބިފަ އެވެ. އެހެން ވެ އެކަމާއި ގުޅިގެން ޙައްޖު ކޯޕަރޭޝަނުން ވަނީ އެކަން ސަމާލު ކަމަށް ގެނެސް ބަޔާނެއް ވެސް ނެރެފައެވެ.
ހައްޖު ކޯޕަރޭޝަނުން ހުކުރު ދުވަހު ނެރުނު ބަޔާނުގައި ބުނީ އޮޅުވާލައިގެން ފައިސާ ހޯދުމުގެ މަގުސަދުގައި އެ ކޯޕަރޭޝަނުގެ ނަމުގައި އާންމުންގެ ފޯނަށް މެސެޖުތަކެއް ފޮނުވަމުންދާ ކަމުގެ މައުލޫމާތު ލިބެމުންދާ ކަމަށެވެ.
ހައްޖު ކޯޕަރޭޝަނުން ބުނީ އެއްވެސް ޕޭމަންޓެއް ނުވަތަ ފީ އެއް ދެއްކުމަށް އެސްއެމްއެސްގެ ޒަރިއްޔާއިން އެއްވެސް ލިންކެއް އެ ކޯޕަރޭޝަނުން ނުފޮނުވާނެ ކަމަށެވެ. އަދި އެ ކޯޕަރޭޝަނުން އެއްވެސް މީހަކަށް ގުޅައި ނުވަތަ މެސެޖުކޮށް އެއްވެސް އަމިއްލަ މީހެއްގެ އެކައުންޓަށް ފައިސާ ޖަމާކުރަން ނާންގާނެ ކަމަށް ވެސް ބުންޏެވެ.
އެގޮތުން ކޯޕަރޭޝަނުގެ ނަމުގައި ދައުރުވަމުންދާ ސްކޭމް އެސްއެމްއެސްއަށް ސަމާލުވުމަށް ހައްޖު ކޯޕަރޭޝަނުން ވަނީ އެދިފަ އެވެ.
މޯލްޑިވްސް ހައްޖު ކޯޕަރޭޝަނުން އެއްވެސް ފަރާތަކަށް ލިންކް ފޮނުވައިގެން ފައިސާ ދައްކަން މެސެޖެއް ނުކުރާނެ އެވެ. އަދި މި ކޯޕަރޭޝަނުގެ ފަރާތުން އެއްވެސް ފަރާތަކަށް ގުޅައި ނުވަތަ މެސެޖުކޮށް އެއްވެސް ފަރާތެއްގެ އެކައުންޓަށް ފައިސާ ޖަމާކުރާކަށް ނާންގާނެ އެވެ.މޯލްޑިވްސް ޙައްޖު ކޯޕަރޭޝަން
ހައްޖު ކޯޕަރޭޝަނުން ބުނި ގޮތުގައި އެ ކޯޕަރޭޝަނުގެ ހިދުމަތްތަކަށް ފައިސާ ޖަމާކުރަން އަންގާނީ ކޯޕަރޭޝަނުގެ ނަމުގައި ހެދިފައި ހުރި ރަސްމީ ބޭންކް އެކައުންޓުތަކަށެ އެވެ.
އޮޅުވާލައިގެން މިފަދަ ގޮތްގޮތަށް ފައިސާ ހޯދަން ކުރާ މެސެޖުތަކާއި ފޮނުވާ ލިންކުތަކަށް ސަމާލުވެ، ލިންކުތަކަށް ނުފިތުމަށާއި މިފަދަ މެސެޖެއް ނުވަތަ ކޯލެއް އައިސްފި ނަމަ ކަމާ ބެހޭ ފަރާތްތަކަށް ރިޕޯޓު ކުރުމަށް ހައްޖު ކޯޕަރޭޝަނުން ވަނީ އިލްތިމާސްކޮށްފަ އެވެ.
ސްކޭމްގެ މައްސަލަތައް ރާއްޖޭގައި ވަނީ ވަރަށް ބޮޑަށް އިތުރުވެފަ އެވެ. މިދިޔަ ހަފްތާގައި ވެސް ސްކޭމް މައްސަލަތަކުގެ ސަބަބުން 270,270 ރުފިޔާ ގެއްލިފައިވާ ކަމަށް ތަފާސް ހިސާބުތަކުން ވަނީ ދައްކާފަ އެވެ.
