ތަފާތު އެކި މައްސަލަތަކުގައި 50ށް ވުރެ ގިނަ ފަހަރު ހައްޔަރުކޮށްފައިވާ މީހަކަށް ދައުވާ ކުރަން ފޮނުވައިފި
ޕަރާއޯ ފިހާރައަށް ވަދެ، ވަޅިން ބިރުދައްކައި އެފިހާރައިގެ ވަތްގަނޑުގައި ހުރި ފައިސާ ފޭރިފައިވޭ
ފޭރުނު މައްސަލައެއްގައި ދަރުވާ ކުރަން ފޮނުވި ފަވާޒު ކަޅުތުއްތު
ތަފާތު އެކި މައްސަލަތަކުގައި 50ށް ވުރެ ގިނަ ފަހަރު ހައްޔަރުކޮށްފައިވާ މީހަކު އަނެއްކާވެސް މާލޭގެ ފިހާރައަކަށްވަދެ، ވަޅިން ބިރުދައްކައި ފޭރުނު މައްސަލައެއްގައި ދައުވާ ކުރަން ފޮނުވައިފިއެވެ.
މި މައްސަލައާ ގުޅިގެން ފުލުހުން ބުނީ، މައްޗަންގޯޅި ސަހަރާ ކައިރީގައި ހުންނަ ''ޕަރާއޯ'' ފިހާރައަށް ވަދެ، ވަޅިން ބިރުދައްކައި އެފިހާރައިގެ ވަތްގަނޑުގައި ހުރި ފައިސާ ފޭރުނު މައްސަލައިގެ ތަހުގީގު ނިންމާފައިވާ ކަމަށެވެ. އަދި ދައުވާކޮށްދިނުމަށް ޖޫން މަހުގެ 12 ވަނަ ދުވަހު ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވާ ކަމަށެވެ.
ފުލުހުން ބުނީ، މިދިޔަ މެއި މަހުގެ 1 ވަނަ ދުވަހުގެ 15:13 އެހާކަންހާއިރު މީހަކު އިސްކަންދަރުމަގު މައްޗަންގޯޅި ސަހަރާ ކައިރީގައި ހުންނަ ''ޕަރާއޯ'' ފިހާރައަށް ވަދެ ވަޅިން ބިރުދައްކައި ފިހާރައިގެ ވަތްގަނޑުގައި ހުރި ފައިސާ ފޭރިފައިވާ ކަމަށެވެ.
މިމައްސަލާގައި ދައުވާކުރުމަށް ފޮނުވާފައިވަނީ ހ. ރެދަން / މާލެ، ފަވާޒު ކަޅުތުއްތު (36އ) ގެ މައްޗަށެވެ.
މި މައްސަލައާ ގުޅިގެން ފަވާޒް ކަޅުތުއްތު ހައްޔަރުކޮށްފައިވަނީ ކޯޓު އަމުރެއްގެ ދަށުން 2025 މެއި 13 ވަނަ ދުވަހުއެވެ. އަދި އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތުން ގޮތެއް ނިމެންދެން ބަންދުގައި ބެހެއްޓުމަށް ވަނީ އަމުރުކޮށްފައެވެ.
މި މައްސަލާގައި ހައްޔަރުކޮށްފައިވާ ފަވާޒް ކަޅުތުއްތު އަކީ މީގެކުރިން ތަފާތު އެކި މައްސަލަތަކުގައި 52 ފަހަރު ހައްޔަރުކޮށްފައިވާ މީހެއް ކަމަށް ވެސް ފުލުހުން ބުނެއެވެ.
