"ރައީސް މުއިއްޒު، ސަލީމް ސުޕްރީމް ކޯޓަށް އައްޔަންކުރައްވަން ބޭނުންފުޅުވީ ހައިކޯޓުގައި އަޅުގަނޑުގެ މައްސަލަ ތާށިކުރުމުން ކައްފާރާ ދެއްކުމަށް."
ދެ ފަނޑިޔާރުންނަށް ވެސް ރުހުން ދީފައިވަނީ އެ ވޯޓުގައި ބައިވެރިވެވަޑައިގެން މެންބަރުންގެ އިއްތިފާގުން
ކުރީގެ ރައީސް އަބްދުﷲ ޔާމީން ޕީއެންއެފްގެ ޖަގަހަ ޖަލްސާގައި ވާހަކަދައްކަވަނީ - 12.06.2025
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ސުޕްރީމް ކޯޓުގެ ފަނޑިޔާރުކަމުގެ މަޤާމަށް ހައި ކޯޓު ކުރީގެ ފަނޑިޔާރު އަލްއުސްތާޛް މުޙައްމަދު ސަލީމް އައްޔަންކުރައްވާފައި ވަނީ ކައްފާރާ ދެއްކުމަށް ކަމަށް ކުރީގެ ރައީސް ޔާމީން އަބްދުލް ޤައްޔޫމް ވިދާޅުވެއްޖެއެވެ.
ކުރީގެ ރައީސް ޔާމީން އެފަދައިން ވިދާޅުވީ ޕީއެންއެފް ޖަގަހަ ޖަލްސާގައި ވާހަކަދައްކަވަމުންނެވެ.
އެމަނިކުފާނު ވިދާޅުވީ ރައީސް މުއިއްޒު ވެރިކަމަށް ވަޑައިގަތީ ކުރީގެ ރައީސް ޔާމީނަށް ކޮށްފައިވާ ޙުކުމަކީ ޙަރާމް ޚުރުމެއް ކަމަށް ބުނެ އެ ކަމާއި މެދު ފިޔަވަޅު އަޅާނެ ކަމަށް ވައުދުވެގެން ކަމަށެވެ. އެހެންނަމަވެސް ވެރިކަމަށް ވަޑައިގެން ޢަމަލުކުރެއްވީ އެ މަނިކުފާނު ވެވަޑައިގެންނެވި ވައުދާއި ޚިލާފަށް ކަމަށް ވެސް ރައީސް ޔާމީން ވަނީ ވިދާޅުވެފައެވެ. އަދި ހައިކޯޓުގެ ކުރީގެ ފަނޑިޔާރު ސުޕްރީމް ކޯޓަށް އައްޔަންކުރުމަށް ރައީސް މުއިއްޒު ބޭނުންފުޅުވި ސަބަބަކީ 2018 ވަނަ އަހަރު ރައީސް ޔާމީންގެ ކެނޑިޑެސީ ބާތިލް ވަންދެން އެ މަނިކުފާނުގެ މައްސަލަ ހައިކޯޓުގައި ތާށިކޮށްފައި ބޭއްވުމަށް މަގުފަހިކޮށްދިން ބޭފުޅަކީ ސަލީމްކަމަށް ވުމުން ކަމަށް ރައީސް ޔާމީން ވަނީ ވިދާޅުވެފައެވެ.
"މުއިއްޒު އަށް ކޮން ކޮމްޕަލްޝަން އެއްތޯ އޮތީ ސަލީމް ސުޕްރީމް ކޯޓަށް ގެންދަން." ރައީސް ޔާމީން ވިދާޅުވިއެވެ. ހައިކޯޓުގައި ރައީސް ޔާމީނާއި ގުޅުން ހުރި މައްސަލަ ކުރިއަށް ދިޔަ އިރު ސުވާލު އުފެދޭ ފަދަ ކަންތައްތަކެއް ހިނގި ކަމަށް ފާހަގަކުރައްވާ ރައީސް ޔާމީން ވަނީ އެކަމަށް ފާޑު ވިދާޅުވެފައެވެ. އަދި ސަލީމް ދޮޅުމަސް ވަންދެން ފިލާ ހުންނެވި ކަމަށް ވެސް ރައީސް ޔާމީން ވިދާޅުވިއެވެ. އެފަދަ ބޭފުޅަކު ސުޕްރީމް ކޯޓަށް އައްޔަންކުރުމުން ސަލީމް ސުޕްރީމްކޯޓަށް އައްޔަން ކުރުމަށް ރައީސަށް ބާރު ލިބޭ ސަބަބާއި މެދު އެމަނިކުފާނު ސުވާލު އުފެއްދެވިއެވެ. ރައީސް ޔާމީން ވަނީ އެއީ ރައީސް މުއިއްޒު ސަލީމަށް ދައްކަން ޖެހޭ ދަރަންޏެއް ދެއްކުމަށް ކުރި ކަމެއް ކަމަށް ވެސް ސިފަކުރައްވާފައެވެ.
މީގެ އިތުރުން ސަލީމަކީ ސުޕްރީމް ކޯޓުގެ ފަނޑިޔާރުކަމަށް ޝަރުތު ހަމަވާ ބޭފުޅެއް ނޫން ކަމަށާއި އެއަށް ވުރެ ބޮޑަށް ޤާބިލް، އެއަށް ވުރެ ތައުލީމީ މީހުން އެބަ ތިބި ކަމަށް ރައީސް ޔާމީން ވަނީ ވިދާޅުވެފައެވެ. ޖޭއެސްސީ އަށް ނުފޫޒު ނުފޯރުވާ ކަމަށް ރައީސް މުއިއްޒު ވަކާލާތުކުރެއްވި ނަމަވެސް ސަލީމް ސުޕްރީމް ކޯޓުގެ ފަނޑިޔާރުކަމަށް ޝަރުތު ހަމަވާ ކަމަށް ޖޭއެސްސީން ނިންމީ ރައީސް މުއިއްޒުގެ ނުފޫޒާއި އެކު ކަމަށް ރައީސް ޔާމީން ވަނީ ވިދާޅުވެފައެވެ.
ޕީއެންއެފް ޖަގަހަ ޖަލްސާގައި އިތުރަށް ވާހަކަދައްކަވަމުން އެމަނިކުފާނު ވަނީ ރާއްޖޭގެ ޝަރުއީ ދާއިރާގެ އިންސާފުވެރިކަމާއި މެދު ސުވާލު އުފައްދަވާ ވާހަކަދައްކަވާފައެވެ. އެގޮތުން ޝަރުޢީ ދާއިރާގެ ދިގު އަތް ކުށްވެރިންނާއި ހިސާބަށް ފޯރާ އިރު މައްސަލަ އޮންނަނީ މަރުވެފައި ކަމަށް އެ މަނިކުފާނު ސިފަކުރެއްވިއެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ސުޕްރީމް ކޯޓުގެ ފަނޑިޔާރުކަމުގެ މަޤާމަށް ހައި ކޯޓު ކުރީގެ ފަނޑިޔާރުން ކަމަށްވާ އަލްއުސްތާޛް މުޙައްމަދު ސަލީމާއި އަލްއުސްތާޛް ޢަބްދުﷲ ހަމީދު އައްޔަންކުރައްވާފައި ވަނީ 11 ޖޫން 2025 ގައެވެ.
ޖޫން 11 ވަނަ ދުވަހުގެ މެންދުރުފަހު ރައީސުލްޖުމްހޫރިއްޔާގެ އޮފީހުގައި ބޭއްވެވި ޚާއްޞަ ރަސްމިއްޔާތެއްގައި މި ދެ ބޭފުޅުންނަށް ސުޕްރީމް ކޯޓުގެ ފަނޑިޔާރުކަމުގެ މަޤާމުގެ ހުވާ ކުރައްވާފައިވެއެވެ. ސުޕްރީމް ކޯޓަށް ސަލީމާއި ހަމީދު އައްޔަންކުރަން, ރައީސް ޑރ. މުޙައްމަދު މުއިއްޒު އެ ދެ ބޭފުޅުންގެ ނަން މަޖިލީހަށް ފޮނުއްވީ މި ހިނގާ ޖޫން މަހު ދެވަނަ ދުވަހެވެ. އަދި އެ މަހުގެ ހަތަރުވަނަ ދުވަހު ޖުޑީޝަރީ ކޮމިޓީން ވަނީ ދެ ބޭފުޅުންނަށް ވެސް ރުހުންދޭން ފާސްކޮށްފައެވެ. އެ ބޭފުޅުންނަށް މަޖިލީހުގެ ތަޅުމުން ރުހުން ދީފައި ވަނީ ވެސް ޖޫން 11 ވަނަ ދުވަހުއެވެ.
ދެ ފަނޑިޔާރުންނަށް ވެސް ރުހުން ދީފައިވަނީ އެ ވޯޓުގައި ބައިވެރިވެވަޑައިގެން މެންބަރުންގެ އިއްތިފާގުންނެވެ. އެ ގޮތުން، ފަނޑިޔާރު ހަމީދަށް ރުހުން ލިބުނީ 60 ވޯޓުންނެވެ. އަދި، ފަނޑިޔާރު ސަލީމަށް ރުހުން ލިބުނީ 61 ވޯޓުންނެވެ.
ރައީސުލްޖުމްހޫރިއްޔާ ސުޕްރީމް ކޯޓުގެ ދެ މަގާމެއް ހުސްވީ ސުލޫކީ މައްސަލައެއްގައި އެ ކޯޓުގެ ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު މަހާޒް ޢަލީ ޒާހިރު މަޤާމުން ވަކިކުރުމާ ގުޅިގެންނެވެ. ސުޕްރީމް ކޯޓުގައި 7 މެންބަރުން ތިއްބަވައެވެ.
އެ ފުރުސަތުގައި ކުރިމަތިލެއްވި ފަރާތްތަކުގެ ތެރެއިން ރައީސުލްޖުމްހޫރިއްޔާ މަޖިލީހަށް ހައި ކޯޓުގެ ފަނޑިޔާރު މުހައްމަދު ސަލީމާއި އެ ކޯޓުގެ ކުރީގެ ފަނޑިޔާރު އަބްދުﷲ ހަމީދުގެ ނަން ފޮނުއްވެވީ ޖޭއެސްސީގެ ލަފަޔާއެކުގައެވެ.
