ފީއަލީގައި އީދު ފާހަގަކުރުމަށް ނުކުތް ބައެއް މުވައްޒަފުން ވަޒީފާއިން ކަނޑާލާނެކަމުގެ އިންޒާރު ވަނީ ދީފައި: ކައުންސިލް

ފ.ފީއަލީގައި އަޟްހާ އީދު ފާހަގަކުރުމަށް އިސްނަގައިގެން ނުކުތް ސަރުކާރުގެ ބައެއް މުވައްޒަފުން ވަޒީފާއިން ކަނޑާލާނެ ކަމަށް ބުނެ ސިޔާސީ ބޭފުޅުން އިންޒާރު ދީފައިވާ ކަމަށް އެރަށުގެ ކައުންސިލުން ބުނެފިއެވެ.

ރާއްޖެޓީވީގެ ފަށާއިރު ޕްރޮގްރާމްއަށް އެރަށު ކައުންސިލްގެ ރައީސް މޫސާ އަހުމަދު ވިދާޅުވީ އެރަށުގައި އަޟްހާ އީދު ފާހަގަކުރުމަށް ރޭވީ އެހެން އަހަރުތަކާ ތަފާތު ކޮށް ކަމަށާއި، ވަރަށް ބޮޑަށް ރަށުގެ ކުލަބު ޖަމިއްޔާތަކަށް ފުރުސަތު ދޭން ބޭނުންވި ކަމަށެވެ. އެއީ އެ ޖަމިއްޔާތައް ބާރުވެރި ކުރުވުމުގެ މަގުސަދުގައި ކަމަށް އޭނާ ވިދާޅުވިއެވެ.

Advertisement

އީދު ފާހަގަކުރުމަށް ކައުންސިލުން ހުޅުވާލި ފުރުސަތުގައި ރަށުގެ ދެ ޖަމިއްޔާ އަކުން ޕްރޮޕޯސަލް ހުށަހެޅިކަން ފާހަގަކުރައްވައި އަހުމަދު މޫސާ ވިދާޅުވީ އެންމެ ރަނގަޅު ޕްރޮޕޯސަލް ހުށަހެޅި ފަރާތަށް ކައުންސިލުން ވާނީ އީދު ޙަރަކާތް ކުރިއަށް ގެންދިޔުމަށް ހަވާލުކުރި ކަމަށެވެ. އަދި އީދުގެ ޙަރަކާތްތައް ކުރިއަށް ގެންދިޔުމަށް އެ ޖަމިއްޔާއާ އެކު އެއްބަސްވުމެއްގައި ސޮއިކުރިކަމަށް އޭނާ ވިދާޅުވިއެވެ.

ނަމަވެސް، ކައުންސިލުން މިގޮތަށް އީދު ފާހަގަ ކުރާތީ، ރަށުގެ މުއައްސަސާތަކުގައި ތިއްބެވި ބައެއް އިސްވެރިންގެ ފަރާތުން ކައުންސިލްއަށް އެއްބާރުލުން ނުލިބުނު ކަމަށާއި، ބައެއް މުއައްސަސާތަކުގެ އިސްވެރިން، އެ މުއައްސަސާތަކުގެ ބައެއް މުވައްޒަފުންނަށް ބިރު ދައްކައި، ކައުންސިލާ އެކު އީދު ފާހަގަ ކުރުމުގައި ބައިވެރިވެއްޖެ ނަަމަ، ވަޒީފާ އިން ވަކި ކުރާނެ ކަމަށް ބުނެ އިންޒާރު ދީފައިވާ ކަމަށް އަހުމަދު މޫސާ ވިދާޅުވިއެވެ.

އެގޮތުން ފެނަކަ ކޯޕަރޭޝަން ފީއަލީ ބްރާންޗުގައި މަސައްކަތް ކުރަމުން އަންނަ މުވައްޒަފުންނަށް އެފަދަ އިންޒާރުތަކާއި، ބިރު ދެއްކުން ކުރިމަތިކޮށްފައިވާ ކަމަށް ބައެއް މުވައްޒަފުންގެ ފަރާތުން މައުލޫމާތު ލިބިފައިވާ ކަމަށް އޭނާ ވިދާޅުވިއެވެ.

ދީނާ ހިލާފު ބައެއް ކަންކަން ހިނގާފައިވާ ބުނެ ދައުރުކުރާ ވާހަކަތަކަށް ރައްދު ދެއްވައި އަހުމަދު މޫސާ ވިދާޅުވީ އެފަދަ ކަމެއް ހިނގާފައިނުވާ ކަމަށާއި، އީދު ފާހަގަކޮށްފައިވަނީ އިސްލާމްދީނުގެ މިންގަނޑާ އެއްގޮތަށް ކަމަށެވެ. އަދި ނޭނގި ނަމަވެސް އެފަދަ ކަމެއް ހިނގާފައިވާ ކަމަށް މައާފަށް އެދޭ ކަމަށް އޭނާ ވިދާޅުވިއެވެ.

މިމައްސަލައާ ގުޅިގެން އެރަށުގެ ކައުންސިލުން ނެރުނު ބަޔާނުގައި ބުނީ، ރައީސް ޑރ.މުހައްމަދު މުއިއްޒަށް، ގާނޫނު އަސާސީގެ 115 ވަަނަ މާއްދާގެ ދަށުން ލިބިދީފައިވާ ބާރުގެ ދަށުން އައްޔަން ކުރައްވާފައި ތިއްބެވި ސިޔާސީ ބޭފުޅުން ވެސް އީދު ފާހަގަ ކުރުމަަށް ހުރަސްއަޅާފައިވާ ކަމަށެވެ. އެގޮތުން ފީއަލީ ސިއްހީ މަރުކަޒުގެ ސީނިއާ އެޑްމިނިސްޓްރޭޓަރ ހެލްތު ސާވިސް މުހައްމަދު ޝިފާއު އަދި ފީއަލީ ޒުވާނުންގެ މަރުކަޒުގެ ކޯޑިނޭޓަރު މުހައްމަދު އާމިރު އިސްވެ ތިއްބަވައި، އެކި ފަރާތްތަަކަށް ބިރު ދައްކައި، އިންޒާރު ދީފައިވާކަމަށް އެ ބަޔާނުގައި ބުނެފައިވެއެވެ.

ކައުންސިލްގެ މި ތުހުމަތުތަކާ ގުޅިގެން ރާއްޖެއެމްވީއަށް ޝިފާއު ވިދާޅުވީ، މަސައްކަތް ކުރަމުންދަނީ ސިއްހީ މަރުކަޒުގައި ކަމަށާއި، ސިއްހީ މަރުކަޒުގެ އެއްވެސް މުވައްޒަފަކަށް ނުފޫޒެއް ފޯރުވާފައިނުވާނެ ކަމަށެވެ. އަދި ކައުންސިލްގެ ހުރިހާ ތުހުމަތުތަކެއް ދޮގުކުރައްވައި އޭނާ ވިދާޅުވީ ކައުންސިލުން އެދޭ ކަންކަމަށް އެހީތެރިކަމާ އެއްބާރުލުން ދެމުން ގެންދާ ކަމަށެވެ.

މީގެ އިތުރުން ކައުންސިލުން ވެސް ވަކި ޖަމިއްޔާއަކަށް ނާޖާއިޒު މަންފާ ހޯދައިދިނުމަށް މަސައްކަތް ކޮށްފައިވާ ޝިފާއު ތުހުމަތު ކުރެއްވިއެވެ.

މި މައްސަލައާ ގުޅިގެން ފީއަލީ ޒުވާނުންގެ މަރުކަޒުގެ ކޯޑިނޭޓަރު އާމިރުގެ ބަހެއް ވަނީ ލިބޭ ގޮތްނުވެފައެވެ.

ބަޔާނުގައި ބުނީ، ކޮންމެ ރަށެއްގައި ވެސް އީދުގެ މުނާސަބަތު ކުލަ ގަދަ ގޮތެއްގައި ފާހަގަ ކުރުމަކީ އަދުގެ ސަރުކާރުން ނުހަނު އިސްކަން ދެމުން އަންނަ ކަމަކަށްވީއިރު، ސަރުކާރުގެ ކުންފުނިތަކުގެ އިސްވެރިންގެ އިތުރުން، ރައީސް އައްޔަން ކުރައްވާފައި ތިއްބެވި ސިޔާސީ ބޭފުޅުން ކައުންސިލަށް މިކަމުގައި ހުރަސް އެޅުމަކީ ބަލައި ގަނެވޭނެ ކަމެއް ނޫން ކަމަށެވެ.

މިއީ ކަންބޮޑުވާ މައްސަލައެއްކަން ފާހަގަކޮށް ބަޔާނުގައި ބުނީ، އެރަށުގެ ތަރައްގީއަށް ކުރެވޭ މަސައްކަތާއި، ރައްޔިތުންގެ އެކުވެރިކަމާއި އެއްބައިވަންތަކަމަށް ކުރެވޭ ކޮންމެ ކަމެއްގައި ކައުންސިލުން އިސްނަގާނެ ކަމަށެވެ.