ރާއްޖެ އިޝްތިހާރުކުރަން ކެޓްރީނާ ކައިފް، ގައުމިއްޔަތުގެ އިންތިހާ!

އެއްވެސް ކަމެއްގައި އިހްލާސްތެރިކަމެއް ނެތެއެވެ. ބަހަކާއި އަމަލަކާއި ދިމައެއް ނުވެއެވެ. ބުނާ ބަހެއްގައި އަމުދުން ތެދުވެރިކަމެއް ނެތެއެވެ.

ވެރިކަމަށް ވަޑައިގަންނަވަން ހުރިހާ ކެމްޕެއިނެއްގައި ގޮވަމުން ދިއަޔީ އިންޑިއާ އައުޓް ކަމަށެވެ. ވިދާޅުވަމުން ގެންދެވީ އިންޑިއާގެ އަޅުވެތި ކަމަށް ރާއްޖެދާ ވާހަކައެވެ. އިންޑިއާގެ އުނގަށް ރާއްޖެ ވެއްޓި އިންޑިއާ މީހުންނާއި ނުލައި އެއްވެސް ކަމެއް ސަރުކާރަށް ނުވާ ވާހަކައެވެ. އަޑު ހަރުކޮށް ވިދާޅުވަމުން ގެންދެވީ އިންޑިއާއިން ގެންނަ މުގާއި ،އަލުތްވާއި، ފިޔަޔާއި، ބިހާއި، ހަނޑޫ، ހަކުރު، ފުށްވެސް ބޭނުން ނުވާ ވާހަކައެވެ. އިންޑިއާއިން އުފައްދާ ބޭހަކީވެސް ލޯ ކުއަލިޓީ އެއްޗެއް ކަމަށާއި އޭގެ ބަދަލުގައި ބޭސް ގެންނާނީ ޔޫރަޕުން ކަމަށެއެވެ. މިހެންގޮސް އިންޑިއާއަށް ބޭސްފަރުވާއަށް ދިވެހިން ފޮނުވުންވެސް އެއީ ދެރަ ކަމަކަށްވެ، އެކަންވެސް ދުބާއީ އާއި ތައިލެންޑަށް ބަދަލުކުރާ ވާހަކައެވެ.

ދެވަނައަށް އެންމެ ގިނައިން ދެއްކެވި ވާހަކައަކީ ގައުމިއްޔަތުގެ ވާހަކައެވެ. އަމިއްލަ ވަންތަ ކަމުގެ ވާހަކައެވެ. އަމިއްލަ ފައިމައްޗަށް ދެތުވާ ވާހަކައެވެ. ދިވެހިންގެ ކަންކަން ދިވެހިން އަމިއްލައަށް ކުރަންޖެހޭ ވާހަކައެވެ.

އެކަމަކު ކަންހިނގާ މިދާ ގޮތް ފެނޭތޯއެވެ. ދެއްކެވި ހުރިހާ ވާހަކައެއް ދޮގަށްވެ، ވިދާޅުވި ހުރިހާ ޅެމެއް ފަރިއްސަވެ، ނިމުނީއެވެ. އެންމެ ފަހުން ރާއްޖޭގެ ފަތުރުވެރިކަން، ބޭރު ދުނިޔޭގައި އިޝްތިހާރުކުރާނެ ގްލޯބަލް އެބްސަރަޑރެއްވެސް މިހޯއްދެވީ އިންޑިއާއިންނެއެވެ.

އިންޑިއާގެ ފިލްމީ ތަރި ކެޓްރީނާ ކައިފްއާއި އެކު ރައީސް މުއިއްޒުގެ ސަރުކާރުން ރާއްޖޭގެ ފަތުރުވެރިކަން އިޝްތިހާރު ކުރުމުގެ އެއްބަސް ވުމެއް ހަދައިފިއެވެ. މިއީ ރާއްޖޭގެ ފަތުރުވެރިކަން ފެށުނީއްސުރެ، މިއަދާއި ހަމައަށް ދިވެހިން ކުރަމުން އައި، ފަޙްރުވެރި ދިވެހި ވަންތަ މަސައްކަތެކެވެ. މިވިޔަފާރި ފެށީވެސް ދިވެހިންނެއެވެ. މިވިޔަފާރި ތަރައްޤީކުރީވެސް ދިވެހިންނެއެވެ. އިޝްތިހާރުކުރީވެސް، ޕްރޮމޯޓްކުރީވެސް، ވިއްކީވެސް ހަމަ ދިވެހިންނެއެވެ.

ކޮވިޑް 19ގެ ހާލަތުގައި ދުނިޔޭގެ ހުރިހާ ބޯޑަރުތަކެއް ބަންދުކޮށްފައި، އޮތް އިރު ރާއްޖެއަށް އެންމެ ގިނަ ފަތުރުވެރިން އަންނަމުންދިޔައީ އިންޑިއާއިންނެއެވެ. ރާއްޖޭގެ ގެސްޓްހައުސްތައް އިންޑިއާގެ ފަތުރުވެރިންނާއިގެން ފުރި ގޭގެއިންވެސް އެނދު ވިއްކަމުން ދިޔައެވެ. އޭރު މިހާރުގެ ސަރުކާރުގެ ބޭފުޅުން ތިއްބެވީ އިދިކޮޅުގައެވެ. ރައީސް މުއިއްޒުވެސް ހިމެނިވަޑައިގަންނަވާ ގޮތުންނެއެވެ. އެދުވަހު އޭރުގެ އިދިކޮޅު ފަރާތްތަކުން އެކަމާއިވެސް ގޮވީ އެއްޗެސްއެވެ. ކުރަމުން ގެންދިއައީ ފުރައްސާރައެވެ. އާހިރުގައި މިސަރުކާރުގެ ވިޔާނުދާ އަމަލުތަކުގެ ސަބަބުން އިންޑިއާގެ ފިލްމީ ތަރިން ރާއްޖޭގެ ފަތުރުވެރިކަން ބޮއިކޮޓް ކުރުމަށް ގޮވައި ކެމްޕެއިންތައްވެސް ހިންގިއެވެ.

އެކަމަކު މިހާރު މިޖެހުނީ ކޮންތާކުތޯއެވެ. ގައުމިއްޔަކުން ސަލާމަތްނުވެވިގެން އުޅޭ ބޭފުޅަކު، ގައުމިއްޔަތުން ހެދުން ކަނޑައިގެން ލައި އުޅޭ ބޭފުޅަކު، ގައުމިއްޔަތުން ފަނި ގިރައިގެން ބޮއެ އުޅޭ ބޭފުޅަކު، ގައުމު އިޝްތިހާރު ކުރަން މިހޯއްދެވީ އެއްކަލަ އެބުނާ އިންޑިއާގެ ފިލްމީ ތަރިއެކެވެ. އެއީ ދިވެހިންނަށް ބުލީ ކުރާ ކަމަށް ރައީސް މުއިއްޒު އަމިއްލަފުޅަށް ވިދާޅުވި އިންޑިއާއެވެ. ލަދު ނޫންތޯއެވެ.

ޤަބޫލުފުޅުކުރައްވާށެއެވެ. ގައުމިއްޔަތު މިނިސްޓްރީއެއް ހެއްދެވުމަކުން، އެތަނުގެ ވަޒީރަކަށް ޅެންވެރިއަކު ލެއްވުމަކުން، ދިދައާއި ވާހަކަ ދެއްކެވުމަކުން، އަނގަނުޖެހި ގައުމިއްޔަތޭ ވިދާޅުވުމަކުން، އަދި ގައުމީ މީހަކަށް މީހާއެއް ނުވެއެވެ. ވާހަކަފުޅެއް ދައްކަވާނަމަ، ދެ ބަހުން އެއްބަސް ވިދާޅުވަނީ އިނގިރޭސިބަހުންނެއެވެ. ދިވެހިންގެ ސަތޭކަ އިންސައްތަ އުފެއްދުމެއް ކަމުގައިވާ ދިވެހި ފަތުރުވެރިކަން އިޝްތިހާރުކުރަންވެސް ހޯއްދެވުނު ކަމަށް މިވީ ބިދޭސީއެކެވެ. މަނިކުފާނާއި މަނިކުފާނުގެ ސަރުކާރާއި، މަނިކުފާނުގެ ވިސްނުންފުޅާއި، ކިހާ ދޭސީތޯއެވެ. ފަހަރުގައި ކެޓްރީނާ ކައިފް ތިޔަ ނެންގެވީ، ޖުލައި މަހުގެ 26 ވަނަ ދުވަހު ރާއްޖޭގެ މިނިވަން ދުވަހުގެ ރަސްމިއްޔާތަށް އިންޑިއާގެ ބޮޑުވަޒީރު ގެންނަވާތީ އިތުރަށް މަތި އޮމާންކޮށްލަން ކަމަށްވެސް ވެދާނެ ނޫންތޯއެވެ. ނުވަތަ މަނިކުފާނު އައްޔަންކޮށްފައި ތިބި ސިޔާސީ ބޭބޭފުޅުން އިންޑިއާ އަށާއި އިންޑިއާގެ ބޮޑުވަޒީރަށް ގޮވާފައިހުރި ހުތުރު އެއްޗެސްއާއި ކުރަހާފައިހުރި ހުތުރު ކާޓޫނުތައް މިދަތުރުފުޅާއި ދިމާކޮށް ބަޔަކު ނަގައިގެން ދައްކަފާނެތީ ދުރާލާ ރޭއްވެވި، ހީލަތްތެރި ރޭއްވެވުމަކަށްވެސް ވެދާނެ ނޫންތޯއެވެ. ކޮންމެއަކަސް ތިޔަ ކުރެއްވެވީ ވަރަށްމޮޅު ކަމެއް ކަމަށް އަރިސް ބޭފުޅުން ވިދާޅުވަމުން ދިޔަ ނަމަވެސް، ތިޔަ ކަމުގެ ސަބަބުން ރައްޔިތުންގެ ކުރިމަތީގައި އަނެއްކާވެސް ގެއްލުނީ މަނިކުފާނުގެ އިތުބާރު ނޫންތޯއެވެ.