ލިބިފައިވާ ހަދިޔާ އެއް ކަމަށް ބުނެ ހިޔަލައިގެ އީދު ލަވަ ޕީއެސްއެމްއިން ދެއްކުމުން ގާނޫނީ ފިޔަވަޅު އަޅަނީ
9 ޖޫން 2025 | ހޯމަ 12:38މި ކަމުގައި މިހާތަނަށް ޕީއެސްއެމްއިން ބަހެއް ބުނެފައެއް ނުވެ
"އީދު ބޯމަތިވަނީ" މި ނަމުގައި ހިޔަލަ ގްރޫޕުން އީދަށް ހާއްސަކޮށް ނެރުނު ލަވައިގެ ތެރެއިން
ބޮޑު އީދަށް ޙާއްސަކޮށް ހިޔަލަ ގުރޫޕުން ނެރުނު އީދު ލަވަ ހުއްދަ ނުހޯދައި ޕަބްލިކް ސާވިސް މީޑިއާގެ ޗެނަލްއެއް ކަމައްވާ ޓީވީއެމުން ދެއްކި ކަމަށް ބުނެ، ޕީއެސްއެމްއާ ދެކޮޅަށް ގާނޫނީ ފިޔަވަޅު އެޅުމަށް ނިންމާފައިވާކަމަށް އެ ގުރޫޕުން ބުނެފިއެވެ.
"އީދު ބޯމަތިވަނީ" މި ނަމުގައި ހިޔަލަ ގްރޫޕުން އީދަށް ހާއްސަކޮށް ނެރުނު ލަވަ ޔޫޓިއުބްގައި ރިލީޒްކުރުމަށްފަހު، މިހާތަނަށް 92،000 އަށްވުރެ ގިނަ މީހުން ބަލާފައިވެއެވެ. އަދި އެހެނިހެން ސޯޝަލް މީޑިއާ ޕްލެޓްފޯމް ތަކުގައި ވެސް މި ލަވަ ވަނީ ޓްރެންޑްވެފައެވެ.
ހިޔަލަ ގުރޫޕުގެ އީދު ލަވަ ޓީވީއެމްގެ އީދު ކަވަރޭޖުގެ ތެރެއިން އާދިއްތަ ދުވަހު ވަނީ ދައްކާފައެވެ. ޓީވީއެމްގެ އީދު ކަވަރޭޖުގެ ތެރެއިން މި ލަވަ ދައްކާފައިވަނީ ލިބިފައިވާ ހަދިޔާއެއް ކަމަށް ބުނެއެވެ.
ނަމަވެސް ހިޔަލަ ގްރޫޕުން ވަނީ މި މައްސަލައާ ގުޅިގެން ހިތްހަމަނުޖެހުން ފާޅުކޮށްފައެވެ. އެ ގްރޫޕުން ފޭސްބުކްގައި ކުރި ޕޯސްޓެއްގައި ބުނެފައިވަނީ އެ ގްރޫޕްގެ ހުއްދަ ނުހޯދައި ލަވަ ދެއްކުމުން ވަރަށް ބޮޑަށް ކަންބޮޑުވާ ކަމަށެވެ. އަދި ޕީއެސްއެމް އާއި އިތުރު އެހެން އެއްވެސް ފަރާތަކަށް ލަވަ ދެއްކުމުގެ ހުއްދަ ދީފައިނުވާ ކަމަށް ވެސް ބުނެފައިވެއެވެ.
ރާއްޖެއެމްވީ އާއި ވާހަކަ ދައްކަމުން ހިޔަލަ ގުުރޫޕުގެ މެނޭޖަރ އަޙްމަދު އަބްދުﷲ ބުނީ، އެ ލަވަޔަކީ އާޓިސްޓުންތަކެއްގެ ބުރަ މަސައްކަތެއްކަމަށާއި އެކުދިންގެ އަގު ވަޒަން ކުރަންޖެހޭކަމަށެވެ. އަދި އެ ލަވަ އެއްވެސް ޓީވީ ޗެނަލް އަކުން ދެއްކުމުގެ ހުއްދަ ދީފައި ނުވާކަމަށް އޭނާ ބުންޏެވެ.
މީގެ އިތުރުން އޭނާ ބުނީ، ކަމާބެހޭ އިދާރާތައް ހުޅުވުނާ އަވަހަކަށް އެ މައްސަލަ ބަލައި ގާނޫނީ ގޮތުން އެޅެން ހުރި ފިޔަވަޅުތަށް އެޅުމަށް ހުށަހަޅާނެކަމަށެވެ.
ކޮޕީރައިޓާއި އެއާ ގުޅޭ އެހެނިހެން ހައްގުތަކުގެ ގާނޫނުގައިވާ ގޮތުން، އުފެއްދުމެއް ބްރޯޑްކާސްޓްކުރުމަކީ އެ އުފެއްދުމެއް އުފެއްދި މީހާއަށް ނުވަތަ އޭގެ ވެރިފަރާތަށް ލިބިގެންވާ އިގްތިސާދީ ހައްގެކެވެ. ތިންވަނަ ފަރާތަކަށް އެ ބޭނުންކުރެވޭނީ ވެރިފަރާތުގެ ހުއްދަ އޮވެގެންނެވެ.
މި ކަމުގައި މިހާތަނަށް ޕީއެސްއެމްއިން ބަހެއް ބުނެފައެއް ނުވެއެވެ.
