ދީނުގެ ތެރެއަށް ގެންނަ އައު ކަންކަން ބަލައިނުގަތުމަށް އަރަފާތު ޚުތުބާ ގައި ގޮވާލައިފި

ޢަރަފާތް ދުވަހުގެ ޚުޠުބާ ދެއްވަމުން، މައްކާ މަސްޖިދުލް ޙަރާމުގެ އިމާމު ޝައިޚް ޑރ. ޞާލިޙް ބިން ޙުމައިދު މުސްލިމުންނަށް ތަޤްވާވެރި ވުމަށާއި އިސްލާމް ދީނަށް ތަބާވުމަށާއި ޢާއިލީ ގުޅުންތަކާއި، ތެދުވެރިކަމާއި، ރިވެތި އަޚްލާޤާއި، ނަމާދުގެ ރޫޙާނީ ފައިދާ ލިބިގަތުމަށް ގޮވާލައްވައިފިއެވެ.

އަދި މިއީ ޙަޤީޤީ އީމާންކަމުގެ މުހިންމު ބައިތަކެއް ކަމުގައި އިމާމު ފާހަގަ ކުރެއްވި އެވެ.

ބުރާސްފަތި ދުވަހު ޙައްޖުވެރިން ޢަރަފާތުގައި ހުންނަ ނަމީރާ މިސްކިތަށް ޖަމާވެ މާތް ރަސޫލާގެ ސުންނަތާ އެއްގޮތަށް މެންދުރާއި ޢަޞުރު ނަމާދު ޖަމާޢަތުގައި އަދާކުރިއެވެ.

އެތައް ލައްކަ ހައްޖުވެރިން މިސްކިތަށް ޖަމާވި އިރު ސަލާމަތީ ކަންކަމާއި އެހެނިން ޚިދުމަތްތައް ހުރީ ވަރަށް ފުރިހަމަ އަށް އިންތިޒާމު ވެފައެވެ.

އިމާމު ޝައިޚް ޑރ. ޞާލިޙް ބިން ޙުމައިދު އަރަފާތު ދުވަހުގެ ޚުތުބާ ގައި ރަސޫލާ މުޙައްމަދު ޞައްލަﷲ ޢަލައިހި ވަސައްލަމަ އަކީ އެންމެ ފަހު ރަސޫލާކަން ޤަބޫލުކުރުމުގެ ތެރޭގައި، އެކަލޭގެފާނުގެ އުގަންނަވައިދެއްވި ކަންތައްތަކަށް ފުރިހަމަ އަށް ކިޔަމަންވުމާއި، އެކަލޭގެފާނު ދެއްކެވި ގޮތާ އެއްގޮތަށް ޢަމަލުކުރުމާއި، ދީނަށް ތައާރުފް ކުރެވޭ އައު ކަންކަމަށް ނޫނެކޭ ބުނުން ހިމެނޭ ކަމަށެވެ.

ޚުތުބާގައި އިމާމު ވިދާޅުވީ ނަމާދަކީ އަޅާ ﷲ އާ ގުޅުވައިދޭ އެއްޗަކަށް ވުމުގެ އިތުރުން، އަމިއްލަ ނަފްސު ހަރުދަނާކޮށް، ސާފުކޮށް، ރޫޙާނީ ގޮތުން ހޭލުންތެރިކަން އިތުރުކޮށްދޭ އެއްޗެއް ކަމުގައެވެ.

ޢަރަފާތު ގައި އެންމެ ފާހަގަކޮށްލެވޭ ދީނީ ތަންތަނުގެ ތެރެއިން އެއް ބިނާ ކަމުގައިވާ ނަމީރާ މިސްކިތައް އަރަފާތު ދުވަހު އެތައް ހާސް ހައްޖުވެރިން އެއްވިއެވެ.

މި މިސްކިތަކީ އެންމެ ފުރަތަމަ ޢައްބާސީ ޚިލާފަތުގެ ދައުރުގައި ބިނާކުރެވުނު މިސްކިތެކެވެ. މިއީީ ފަހުން ސަޢޫދީ ވެރިކަމުގެ ދަށުން ވަރަށް ބޮޑަށް ބޮޑު ކުރެވި ތަރައްގީ ކުރެވިފައިވާ މިސްކިތެކެވެ.

މި މިސްކިތުގެ ބޮޑުމިނަކީ 110,000 އަކަ މީޓަރެވެ. މިސްކިތުގައި 350,000 އަށް ވުރެ ގިނަ މީހުންނަށް ނަމާދު ކުރަން ޖާގަ ލިބެއެވެ. މި މިސްކިތުގައި 6 މުންނާރާއި، 3 ގުއްބާއާއި، 64 ދޮރާއެކު 10 މައި ދޮރާށި ހުރެއެވެ.