އަޔަލޭންޑުގެ ކޮނާ މެކްގްރެގޯއާއި އެމެރިކާގެ ފްލޮއިޑް މޭވެދާ ބައްދަލު ކުރި ބޮކްސިން މެޗުން ފްލޮއިޑް މޭވެދާ މޮޅުވެއްޖެއެވެ.

މޭވެދާ ވަނީ މީގެ ދެ އަހަރު ކުރިން ރިޓަޔާ ކޮށްފައެވެ. އެހެން ނަމަވެސް އޭނާ އަލުން އަނބުރާ ބޮކްސިންގެ ތެރެއަށް އައީ މެކްގްރެގޯ ބަލިކުރުމަށް ކަމަށް އޭނާ ބުނެފައިވެއެވެ. މެކްގްރެގޯ އަކީ މަޝްހޫރު "އަލްޓިމޭޓް ފައިޓިން ޗެމްޕިއަންޝިޕް" (ޔޫއެފްސީ) ގައި ވާދަ ކުރާ އެތްލީޓެކެވެ. އެހެން ނަމަވެސް މި ދެ އެތްލީޓުން އެއްބަސްވެފައި ވަނީ ބޮކްސިން މެޗެއްގައި ވާދަކުރާށެވެ.  މި މެޗަކީ ޕްރޮފެޝަނަލް ބޮކްސިން މެޗެއްގައި އޭނާ ވާދަކުރި ފުރަތަމަ ފަހަރެވެ.

މޭވެދާ މި މެޗު ކާމިޔާބު ކުރީ 10 ރައުންޑްއިންނެވެ. ފުރަތަމަ ތިން ރައުންޑް މެކްގްރެގޯ ކާމިޔާބު ކުރިކަމުގައި  ވިޔަސް އޭގެ ފަހުން ކުރިޔަށް ދިޔަ ހަތް ރައުންޑް ވެސް ކާމިޔާބު ކުރީ މޭވެދާއެވެ. މޭވެދާ ވަނީ ފަހު ރައުންޑްތަކުގައި އޭނާގެ ތަޖުރިބާގެ ބޭނުން އެންމެ ފުރިހަމަ ގޮތުގައި ހިފާ މެކްގްރެގޯ މައްޗަށް ކާމިޔާބު ހޯދާފައެވެ.

މެޗުގެ 10 ވަނަ ރައުންޑުގައި ރެފްރީ ވަނީ މެކްގްރެގޯއަށް އިތުރަށް މެޗު ކުރިޔަށް ގެންދިޔުމުގެ ގާބިލްކަން ނެތް ކަމަށް ނިންމައި މޭވެދާ މޮޅުވި ކަމަށް އިއުލާން ކޮށްފައެވެ.

މި މޮޅާއިއެކު މޭވެދާ ވަނީ އޭނާ ދެވަނަ ފަހަރަށް ރިޓަޔާ ކުރިކަން އިއުލާން ކޮށްފައެވެ. އޭނާގެ ކެރިއަރުގައި ވާދަކުރި ހުރިހާ މެޗެއް ވެސް އޭނާ ވަނީ ކާމިޔާބު ކޮށްފައެވެ. އެގޮތުން 50 އެތުލީޓުން ވަނީ އޭނާ ހުއްޓުވަން މަސައްކަތްކޮށް ނާކަމިޔާބީއާއި ކުރިމަތިލާން ޖެހިފައެވެ. އެގޮތުން މި ލިސްޓަށް އެންމެ ފަހުވަގުތު  އިތުރު ވެގެން މިދިޔައީ ކޮނާ މެކްގްރެގޯއެވެ.  

މި ބޮކްސިން މެޗަކީ މިހާތަނަށް ދުނިޔޭގައި  ބޭއްވުނު އެންމެ އަގުބޮޑު ބޮކްސިން މެޗެވެ. އެގޮތުން މި މެޗުން މޮޅުވުމާއިއެކު މޭވެދާއަށް 300 މިލިއަން ޑޮލަރު ލިބިގެން ދާނެއެވެ. އަދި އޭނާ އާއި ވާދަކުރި މެކްގްރެގޯއަށް 100 މިލިއަން ޑޮލަރު ލިބޭނެއެވެ. މި މެޗަށް މީޑިއާ ތަކުގައި ދެވިފައިވާ ނަމަކީ "ދަ މަނީ ފައިޓް" އެވެ.