އިދިކޮޅު މައި ޕާޓީ، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އަކީ ދިވެހި ރައްޔިތުންނަށް ހައްގުވާ މިންވަރު ހޯދައިދިން ޕާޓީ ކަމަށް، ރައްޔިތުންގެ މަޖިލީހުގެ ބިލެތްދޫ ދާއިރާގެ ކުރީގެ މެމްބަރު އަޙުމަދު ޙަލީމް (ދޮންބިލެތް) ވިދާޅުވެއްޖެ އެވެ.

ދޮންބިލެތް މިހެން ވިދާޅުވީ ހޯމަ ދުވަހުގެ ރޭ ރާއްޖެ ޓީވީގެ ފަލަސުރުޚީ ޕްރޮގްރާމްގައި ބައިވެރިވެ ވަޑައިގެން ވާހަކަ ދައްކަވަމުންނެވެ.

އެމްޑީޕީ އުފެދިގެން އައި ގޮތަށް އިޝާރާތް ކުރައްވަމުން ދޮންބިލެތް ވިދާޅުވީ އޭރު އެމްޑީޕީ އުފެދިގެން އައި އިސްލާޙީ މަސައްކަތްތަކެއް ކުރުމަށް ކަމަށެވެ. އެމްޑީޕީ އާއެކު އޭރު އުފެދިގެން އައި ދިވެހި ރައްޔިތުންގެ ޕާޓީ (ޑީއާރުޕީ) އުފެދުނީ އޭރު އޮތް ހުދުމުޚުތާރު ވެރިކަން ދިފާއު ކުރަން ކަމަށް ވެސް ދޮންބިލެތް ވިދާޅުވި އެވެ.

އެހެންކަމުން އޭރު އުފެދިގެން އައީ އިސްލާޙީ މަސައްކަތް ކުރާ ބަޔަކާއި، ޤައުމު އެހެން ގޮތަކަށް އަދި އެހެން މިސްރާާބެއްގައި ކުރިއަށް ގެންދަން މަސައްކަތް ކުރި ބައެއް ކަމަށް ދޮންބިލެތް ވަނީ ފާހަގަ ކުރައްވައިފަ އެވެ.

ދޮންބިލެތް ވިދާޅުވީ އެމްޑީޕީ އަކީ ދިވެހި ރައްޔިތުންނަށް ހައްގުވާ މިންވަރު ހޯދުމަށް މަސައްކަތް ކުރި ޕާޓީއެއް ކަމަށެވެ. އެގޮތުން އެންމެ ފުރަތަމަ ވެސް އެމްޑީޕީ އިން ދިވެހި ރައްޔިތުންނަށް ވިސްނައިދިނީ އޭރު ރައްޔިތުންނަށް ލިބެމުން އައި މިންވަރަކީ ހައްގު މިންވަރު ނޫން ކަމަށް ވެސް ވިދާޅުވި އެވެ. އަދި ދިވެހި ރައްޔިތުންނަށް އެއަށް ވުރެ ރަނގަޅު މިންވަރެއް މި ރާއްޖެ އިން ހައްގުވާ ކަމަށް ބުނެދިން ކަމަށް ވެސް ދޮންބިލެތް ވިދާޅުވި އެވެ.

އެގޮތުން ބޭސްފަރުވާގެ ނިޒާމަށް ސަލާމް ޖެހުމަކީ އޮންނަން ޖެހޭ ކަމެއް ނޫން ކަމަށާއި، ރާއްޖޭގެ ރައްޔިތުުންނަށް ރަނގަޅަށް ބޭސްފަރުވާ ކުރެވި، ފޮތް ފަންސޫރު ލިބި، ދަތުރު ފަތުރުގެ ނިޒާމުގެ ބޭނުން ކުރެވި، ދިވެހިންނަށް ވެސް ރަނގަޅު އަދި ރީތި ދިރިއުޅެއް އުޅެވިދާނެކަން އެމްޑީޕީ އިން ބުނެދިިން ކަމަށް ދޮންބިލެތް ވިދާޅުވި އެވެ.

މީގެ އިތުރުން ދޮންބިލެތް ވިދާޅުވެފައި ވަނީ ކުރީގެ ރައީސް އަލްއުސްތާޛް މައުމޫން ޢަބްދުލް ޤައްޔޫމުގެ 30 އަހަރުގެ ވެރިކަމުގައި ދުވަހުން ދުވަހަށް ޙާލަތު ދިޔައީ ދަށްވަމުން ކަމަށެވެ. އަދި ވަކިން ޚާއްސަކޮށް ރައްޔިތުން ލައްވައި ސަލާމް ޖެހުމުގެ ވަރަށް ބޮޑު ސަގާފަތެއް އޮތް ކަމަށް ވެސް ދޮންބިލެތް ވިދާޅުވި އެވެ.

އެގޮތުން އޭރު ބޭސްފަރުވާ އަށް ސަލާމް ޖަހަން ޖެހޭ މިނުވަރު ފާހަގަ ކުރައްވައި ދޮންބިލެތް ވިދާޅުވީ، ދެކޮޅު ޓިކެޓު އަދި 200 ޑޮލަރު ހޯދުމަށް ވެސް ތީމުގޭ ދޮށުގައި ގިނަ ރައްޔިތުން ކިއު ޖެހިގެން ތިބޭ ކަމަށެވެ. އަދި ސަރުކާރުން ބޭނުންވާ މީހެއްގެ ދަރިއަކަށް ނޫނީ މަތީ ތައުލީމު ޙާސިލު ކުރާނެ ފުރުސަތު ވެސް އޭރު ނެތް ކަމަށް އޭނާ ފާހަގަ ކުރެއްވި އެވެ.

އެހެން ނަމަވެސް އެމްޑީޕީ އުފެދިގެން އައިސް އެކަންކަން ބަދަލު ކުރި ކަމަށް ދޮންބިލެތް ވަނީ ވިދާޅުވެފަ އެވެ. އެގޮތުން ރާއްޖޭގެ އެންމެ އާދައިގެ ރައްޔިތުން މީހާ އަށް ވެސް މަސައްކަތް ކޮށްގެން ކުރިއަށް ދާނެ ފުރުސަތު އެމްޑީޕީ އިން ހުޅުވާލަ ދިން ކަމަށް ފާހަގަ ކުރެއްވި އެވެ.