ޙައްޖާޖީންގެ ބޭހާއި ވެކްސިން އަދި މެޑިކަލް ޓެސްޓުތައް ހިލޭ ހެދޭނެ އިންތިޒާމު ހަމަޖައްސައިފި
3 ޖޫން 2025 | އަންގާރަ 04:41ދިވެހިން ޙައްޖަށްގޮސް ތިބޭއިރު ޑޮކްޓަރަށް ދެއްކުމަށްފަހު ނަގާ ބޭސް ހޯމަ ދުވަހުން ފެށިގެން ހިލޭ ލިބޭނެ
ރައީސް ޑރ. މުޙައްމަދު މުއިއްޒު ރާއްޖޭން ހައްޖަށް ދިއަ ފަރާތްތަކާއި ބައްދަލުކުރައްވައި ވާހަކަފުޅުދައްކަވަނީ
ދިވެހިން ޙައްޖަށްގޮސް ތިބޭއިރު ޑޮކްޓަރަށް ދެއްކުމަށްފަހު ނަގާ ބޭސް މިއަދުން ފެށިގެން ހިލޭ ލިބޭނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ވިދާޅުވެއްޖެއެވެ.
މިގޮތަށް ހަމަޖައްސަވައި އެކަން ރައީސުލްޖުމްހޫރިއްޔާ ހާމަކުރެއްވީ މައްކާގައި، ދިވެހި ޙައްޖާޖީން ތިބޭ ހޮޓަލުގައި ޙައްޖާޖީންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
މީގެ އިތުރުން، ކުރިއަށްއޮތް ތަނުގައި ރާއްޖޭގެ ކޮންމެ ރަށެއްގައި ހުރެގެންވެސް ޙައްޖަށް ދާއިރު ބޭނުންވާ މެޑިކަލް ކަންކަން ހިލޭ ފުރިހަމަ ކުރެވޭނެ ކަމަށާއި، ވެކްސިންވެސް ރަށުގައި ތިބެގެން ހިލޭ ޖެހޭނެގޮތް ފަހިކޮށް ދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި އެމަނިކުފާނު ވަނީ ދިވެހި ސަރުކާރުން އެންމެ އިސްކަމެއް ދެއްވާނީ ޙައްޖާޖީންގެ ކަންތައްތައް ވީހާވެސް ރަނގަޅަކަށް ފުރިހަމަކޮށް ދިނުމަށް ކަމުގައި ވިދާޅުވެފައެވެ.
ދިވެހި ޙައްޖާޖީންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ކުރިއަށްއޮތް ތަނުގައި ރާއްޖޭގެ ކޮންމެ ރަށެއްގައި ހުރެގެންވެސް ޙައްޖަށް ދާއިރު ބޭނުންވާ މެޑިކަލް ކަންކަން ހިލޭ ފުރިހަމަ ކުރެވޭނެ ކަމަށާއި، ވެކްސިންވެސް ރަށުގައި ތިބެގެން ހިލޭ ޖެހޭނެގޮތް ފަހިކޮށް ދެއްވާނެ ކަމުގައެވެ.
އަދި އެމަނިކުފާނު ވަނީ ދިވެހި ސަރުކާރުން އެންމެ އިސްކަމެއް ދެއްވާނީ ޙައްޖާޖީންގެ ކަންތައްތައް ވީހާވެސް ރަނގަޅަކަށް ފުރިހަމަކޮށް ދިނުމަށް ކަމުގައި ވިދާޅުވެފައެވެ.
އެގޮތުން މިއަހަރަކީ ސަޢުދި ޢަރަބިއްޔާއިން ރާއްޖެއަށް ކުރިން ދީފައި ނުވާ އެތައް ލުއިތަކެއް ދެއްވި އަހަރެއްކަމަށާއި، އެކަންކަން ހަމަޖެހިގެން ދިޔައީ ސަޢުދީ ސަރުކާރުގެ ވަރަށް ބޮޑު އެހީއަކާއެކުކަމަށް ވިދާޅުވިއެވެ.
ރައީސް ވަނީ މިއަހަރު ޙައްޖާޖީންނަށް ދޭ ޚިދުމަތުގެ ފެންވަރުގެ ކެޓަގަރީ މަތިކޮށްފައިވާކަންވެސް ފާހަގަކުރައްވާފައެވެ. އަދި ދިވެހި ޙައްޖާޖީން ތިބޭ ހޮޓަލުގައި ފުރިހަމަ ކްލިނިކެއް ޤާއިމްކުރުމުގައިވެސް ސަޢުދީ ސަރުކާރުން ދެއްވި އެހީތެރިކަން އެމަނިކުފާނު ފާހަގަކުރެއްވިއެވެ.
ޙާޖީންގެ ފަރާތުން ރައީސުލްޖުމްހޫރިއްޔާއަށް ހުށައަޅަން ބޭނުންވާ ކަންކަން ހުށައެޅުމުގެ ފުރުޞަތުވެސް އެމަނިކުފާނު ދެއްވިއެވެ. މިއާއެކީ ބައެއް ޙާޖީންވަނީ މިއަހަރުގެ ޙައްޖުގެ އިންތިޒާމުތަކުގެ ފުރިހަމަކަން ފާހަގަކޮށްފައެވެ.
އަދި ހޮޓަލުގައި ހުރި ކްލިނިކުން ބޭސް ގަންނަން ޖެހޭ ޖެހުމަށް ބަދަލެއް ގެނެސްދިނުމަށް އެދިފައިވެއެވެ. އަދި ޙައްޖަށް އައުމުގެ ކުރިން އަތޮޅުތަކުގައި ވެކްސިން ފުރިހަމަކޮށް، ހިލޭ ޓެސްޓުތައް ހެދޭނެގޮތް ހަމަޖެހުމަށްވެސް ބައެއް ހާޖީން އެދުނެވެ.
އެ ވާހަކަތައް އަޑުއައްސަވައި ރައީސް ވަނީ، ދިވެހި ޙައްޖާޖީންނަށް މައްކާގައި ހުރި ކްލިނިކުން ހިލޭ ބޭސް ލިބޭނެ އިންތިޒާމު ވަގުތުން ހަމަޖައްސަވައިދެއްވާފައެވެ. މާލީ ވަޒީރުވެސް އިންނެވި އެ ބައްދަލުވުމުގައި ރައީސް ވިދާޅުވީ މިއަދުން ފެށިގެން ހިލޭ ބޭސް ލިބޭނެ އިންތިޒާމު މާލީ ވަޒީރު ހަމަޖައްސަވައި ދެއްވާނެ ކަމަށެވެ.
މީގެ އިތުރުން ޙައްޖާޖީން ފުރިހަމަކުރަންޖެހޭ ވެކްސިންތަކާއި، ހަދަންޖެހޭ ޞިއްޙީ އެކި ޓެސްޓުތައްވެސް ހިލޭ ހެދޭނެ އިންތިޒާމު ހަމަޖައްސަވާނެކަމަށް ރައީސް ވިދާޅުވިއެވެ.
ޙައްޖާޖީން ގަންނަންޖެހޭ ބޭހާއި ވެކްސިން ހިލޭ ލިބޭނެ އިންތިޒާމު ހަމަޖެހިގެންދާނެ. އަދި މެޑިކަލް ޓެސްޓުތައް ހެދުންވެސް އިރާދަކުރެއްވިއްޔާ ހިލޭ ހެދޭނެ އިންތިޒާމު ހަމަޖެހިގެންދާނެ.ރައީސް ޑރ މުޙައްމަދު މުއިއްޒު
މީގެއިތުރުންވެސް ރައީސް ވަނީ ކިއުގައި ޙައްޖަށް ނާދެވިތިބި ޙައްޖާޖީންނަށް އަވަހަށް ޙައްޖުގެ އަޅުކަން އަދާކުރެވޭނެ އިންތިޒާމު ހަމަޖެއްސުމަށް ސަޢުދީ ސަރުކާރާއެކު މަސައްކަތްތަކެއް ކުރައްވަމުން އަންނަކަމަށްވެސް ވިދާޅުވެފައެވެ.
މިއަހަރުވެސް ޙައްޖުގެ މަތިވެރި އަޅުކަން އަދާކުރުމަށް 1000 ޙައްޖު ކޯޓާ ރާއްޖެއަށް ވަނީ ދީފައެވެ.
