އިންޓަރ މިލާނަށް އިރުޝާދު ދެމުން އަންނަ ސިމޯން އިންޒާގީ، އޭނާގެ ކުރިމަގާ މެދު ގޮތެއް ނިންމުމަށް ކުލަބުގެ އިސްވެރިންނާ ބައްދަލު ކުރަން ނިންމައިފި އެވެ.

އުމުރުން 49 އަހަރުގެ އިންޒާގީ އިންޓަރ މިލާންގެ ކޯޗުކަމާ ހަވާލުވީ 2021 ވަނަ އަހަރު އެވެ. އެންމެ ފުރަތަމަ އެ ކުލަބާ އޭނާ ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެން ނަމަވެސް، 2023 ވަނަ އަހަރު އޭނާ ވަނީ އިތުރު ދެ އަހަރަށް އެއްބަސްވުން އައު ކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ ޖޫން މަހުގެ ނިޔަލަށެވެ.

އިންޒާގީގެ ކުރިމަގާ މެދު މީގެ ކުރިން ވެސް އޮތީ ސުވާލުތަކެއް އުފެދިގަ އެވެ. ޚާއްސަކޮށް ބައެއް އެހެން ކުލަބުތަކެއްގެ ހުށަހެޅުން އޭނާ އަށް ލިބިފައި އޮތުމާ އެކު، އިންޒާގީ ހުރީ ވެސް މުސްތަޤުބަލާ މެދު ވަކި ގޮތެއް ނިންމައިގެން ނޫނެވެ. އިންޒާގީ ހޯދުމަށް ޝައުޤުވެރިކަން ފާޅު ކޮށްފައިވާ ކުލަބުތަކުގެ ތެރޭގައި ސައުދީ ޕްރޯ ލީގުގެ އަލް ޙިލާލް ހިމެނެ އެވެ.

މި ސީޒަންގެ ޔުއެފާ ޗެމްޕިއަންސް ލީގުގެ ފައިނަލްގައި އިންޓަރ މިލާން ވަނީ، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަތުން ބަލިވެފަ އެވެ. މިއީ އިންޒާގީގެ އިރުޝާދުގެ ދަށުން ކުޅެ، ޗެމްޕިއަންސް ލީގުގެ ފައިނަލްގައި އިންޓަރ މިލާން ބަލިވި ދެ ވަނަ ފަހަރެވެ. މީގެ ކުރިން 2023 ވަނަ އަހަރުގެ ފައިނަލްގައި ވަނީ މެންޗެސްޓަރ ސިޓީ އަތުން ބަލިވެފަ އެވެ.

ޗެމްޕިއަންސް ލީގުގެ ފައިނަލަށް ފަހު މުސްތަޤުބަލާ ގުޅޭ ގޮތުން ނޫސްވެރިން އިންޒާގީއާ ސުވާލު ކުރުމުން އޭނާ ބުނެފައި ވަނީ، އެ ވަގުތަކީ އޭނާގެ މުސްތަޤުބަލާ ގުޅޭ ގޮތުން ވާހަކަ ދައްކަން އެންމެ އެކަށީގެންވާ ރަނގަޅު ވަގުތު ނޫން ކަމަށެވެ.

މީޑިއާ ތަކުގައި ބުނެފައިވާ ގޮތުން، އިންޒާގީ އޭނާގެ ކުރިމަގާ މެދު ގޮތެއް ނިންމާނީ މި ހަފުތާގެ ތެރޭގައި އިންޓަރ މިލާންގެ ބޯޑު މެމްބަރުން އަދި ކުލަބުގެ އިސްވެރިންނާ އެކު ބައްދަލުވުމެއް ބާއްވައި، އެކަމާ މެދު މަޝްވަރާ ކުރުމަށް ފަހު އެވެ. ބައެއް މީޑިއާ ތަކުގައި ބުނެފައިވާ ގޮތުން، އިންޒާގީ އިންޓަރ މިލާން ދޫކޮށްލުމުގެ ފުރުސަތު ވެސް އެބަ އޮތެވެ.

އިންޒާގީގެ އިރުޝާދުގެ ދަށުން އިންޓަރ މިލާނުން ވަނީ ހަ ތައްޓެއް ކާމިޔާބު ކޮށްފަ އެވެ. އެއީ އިޓާލިއަން ލީގު އެއް ފަހަރު، އިޓާލިއަން ކަޕް ދެ ފަހަރު އަދި އިޓާލިއަން ސުޕަ ކަޕް ތިން ފަހަރު އެވެ. އޭނާގެ އިރުޝާދުގެ ދަށުން އިންޓަރ މިލާނުން މި ސީޒަން ނިންމާލީ އެއްވެސް ތައްޓެއް ކާމިޔާބު ނުކުރެވި އެވެ. މި ސީޒަންގެ އިޓާލިއަން ލީގު ނަޕޯލީން ކާމިޔާބު ކުރީ އެންމެ ފަހު މެޗުން މޮޅުވެގެންނެވެ.