ބެލެންޑިއޯ ހައްޤީ ޑެމްބެލޭ އަށް: އެންރީކޭ

ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު ހައްގީ، ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ފްރާންސްގެ އޮސްމާން ޑެމްބެލޭ އަށް ކަމަށް، އެ ޓީމުގެ ކޯޗު ލުއިސް އެންރީކޭ ބުނެފި އެވެ.

އެންރީކޭ މިހެން ބުނީ މި ސީޒަންގެ ޔުއެފާ ޗެމްޕިއަންސް ލީގުގެ ފައިނަލް މެޗަށް ފަހު ވާހަކަ ދައްކަމުންނެވެ. މި ސީޒަންގެ ޗެމްޕިއަންސް ލީގުގެ ފައިނަލްގައި އިންޓަރ މިލާން ބަލިކޮށް، ޕީއެސްޖީ އިން ވަނީ ފުރަތަމަ ފަހަރަށް ޗެމްޕިއަންސް ލީގު ކާމިޔާބު ކޮށްފަ އެވެ.

އެ މެޗަށް ފަހު ވާހަކަ ދައްކަމުން އެންރީކޭ ބުނީ، އޭނާ ބެލެންޑިއޯ އެބޯޑު ދޭނީ ޑެމްބެލޭ އަށް ކަމަށެވެ. ޚާއްސަކޮށް ޗެމްޕިއަންސް ލީގުގެ ފައިނަލް މެޗުގައި ޑެމްބެލޭގެ ފަރާތުން ފެނުނު ކުޅުމާއި، އޭނާގެ މޮޅު ކަމަށް އެކަނި ވެސް ބެލެންޑިއޯ ހައްގު ކަމަށް އެންރީކޭ ބުންޏެވެ.

އެކަން ފާހަގަކޮށް އެންރީކޭ ބުނީ، އެއީ ކުޅުންތެރިން ޓީމު ލީޑުކޮށް، ޓީމު ގޮވައިގެން ކުރިއަށް ދާން ޖެހޭ ގޮތް ކަމަށެވެ. މެޗުތަކުގައި ލަނޑު ޖެހުމާއި، ޓީމާ އެކު ތަށިތައް ކާމިޔާބު ކުރުމާއި، ލީޑާޝިޕް އަދި ޑިފެންޑިން އަކީ ޚާއްސަވާ ކަންކަން ކަމަށް ވެސް އޭނާ ބުންޏެވެ.

އެންރީކޭ ބުނީ އޭނާ ދެކޭ ގޮތުގައި ބެލެންޑިއޯ އެވޯޑު ހައްޤީ ޑެމްބެލޭ އަށް ކަމަށެވެ. އަދި ޑެމްބެލޭ އަކީ ބެލެންޑިއޯ އެވޯޑު ކާމިޔާބު ކުރާނެ ކުޅުންތެރިޔާ ކަމަށާއި، އެކަމާ މެދު އެއްވެސް ޝައްކެއް މިހާރު ނުކުރެވޭ ކަމަށް ވެސް އެންރީކޭ ބުންޏެވެ.

ޑެމްބެލޭ ވަނީ މި ސީޒަންގައި ޕީއެސްޖީ ގައި މޮޅު ކުޅުމެއް ދައްކައިފަ އެވެ. މި ސީޒަންގައި ޕީއެސްޖީ އަށް ޖުމުލަ ކުޅެދިން 54 މެޗުގައި އޭނާ ވަނީ 35 ލަނޑު ޖަހައިފަ އެވެ. މީގެ އިތުރުން 13 ލަނޑު ޖެހުމަށް އޭނާ ވަނީ ފުރުސަތު ތަނަވަސްކޮށްދީފަ އެވެ.

ފްރާންސް ލީގުގެ އެންމެ ގިނަ ލަނޑު ޖެހި ކުޅުންތެރިޔާ އަށް ދޭ ރަން ބޫޓު ވެސް ހޯދީ ޑެމްބެލޭ އެވެ. ޕީއެސްޖީ އާއެކު އޭނާ ވަނީ މި ސީޒަންގައި ހަތަރު ތައްޓެއް ކާމިޔާބު ކޮށްފަ އެވެ. އެއީ ފްރާންސް ލީގު، ފްރާންސް ކަޕް، ފްރާންސް ސުޕަ ކަޕް އަދި ޔުއެފާ ޗެމްޕިއަންސް ލީގެވެ.