ޔުއެފާ ޗެމްޕިއަންސް ލީގުގެ ފައިނަލްގައި ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށް ނިކުންނައިރު، އެ ޓީމަކީ ވަރަށް ނުރައްކާތެރި ޓީމެއް ކަމަށް، އިންޓަރ މިލާންގެ ކޯޗު ސިމޯން އިންޒާގީ ބުނެފި އެވެ.

އޭނާ މިހެން ބުނީ ހޮނިހިރު ދުވަހުގެ ރޭ ދަންވަރު ޕީއެސްޖީއާ ދެކޮޅަށް ކުޅޭ ޗެމްޕިއަންސް ލީގުގެ ފައިނަލްގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.

އިންޒާގީ ބުނީ ފައިނަލް މެޗު ކާމިޔާބު ކުރުމަށްޓަކައި އިންޓަރ މިލާނުން ހުރިހާ ކަމެއް ކުރަން ޖެހޭނެ ކަމަށެވެ. އެގޮތުން މެޗަށް ރަނގަޅަށް ފޯކަސްކޮށްގެން، ޕީއެސްޖީ ހުއްޓުވާނެ ގޮތް ތަކަށް ސަމާލުކަން ދޭން ޖެހޭނެ ކަމަށް ވެސް އިންޒާގީ ބުންޏެވެ.

ޕީއެސްޖީ އަކީ ވަރަށް ވަރުގަދަ ޓީމެއްކަން ފާހަގަކޮށް އިންޒާގީ ބުނީ، އެ ޓީމަަކީ ވަރަށް ނުރައްކާތެރި ވެސް ޓީމެއް ކަމަށެވެ. ޚާއްސަކޮށް އެ ޓީމަށް އިރުޝާދު ދެމުން އަންނަ ސްޕެއިންގެ ލުއިސް އެންރީކޭ އަކީ ތަޖުރިބާ ހުރި، މޮޅު ކޯޗެއް ކަމަށް އިންޒާގީ ފާހަގަ ކުރި އެވެ. އަދި އެންރީކޭ އަށް ނުހަނު އިޙުތިރާމް ކުރާ ކަމަށް ވެސް އިންޒާގީ ބުންޏެވެ.

ޗެމްޕިއަންސް ލީގުގެ ފައިނަލަށް ނިކުންނައިރު، ވާދަވެރި ރޭހަކަށް ފަހު އިންޓަރ މިލާނަށް ވަނީ މި ސީޒަންގެ އީޓާލިއަން ލީގު ކާމިޔާބު ކުރެވޭ ގޮތް ނުވެފަ އެވެ. އިންޒާގީ ބުނީ އެކަމުގެ ހިތްދަތިކަން މިހާރު ޓީމުން ފިލައިގެން ގޮސް، ކުޅުންތެރިން ނަފްސާނީ ގޮތުން ރަނގަޅު ޙާލަތެއްގައި ތިބި ކަމަށެވެ.

މީގެ ކުރިން އިންޓަރ މިލާނުން ވަނީ ޗެމްޕިއަންސް ލީގުގެ ފައިނަލްގައި މެންޗެސްޓަރ ސިޓީ އަތުން ބަލިވެފަ އެވެ. އެކަމަށް އިޝާރާތް ކުރަމުން އިންޒާގީ ބުނީ، އެ އަހަރު ވެސް ފޭވަރިޓުންނަކީ އިންޓަރ މިލާން ނޫން ކަމަށެވެ. އެހެން ނަމަވެސް، އިންޓަރ މިލާނަށް ވެސް ވާދަ ކުރެވޭނެކަން އެ ޓީމުން ސާބިތު ކޮށްދީފައި ވާނެ ކަމަށް އިންޒާގީ ވަނީ ބުނެފަ އެވެ.

އިތުރަށް ވާހަކަ ދައްކަމުން އިންޒާގީ ބުނީ ދެ ޓީމަކީ ވެސް ވާދަވެރި ދެ ޓީމު ކަމަށާއި، ފައިނަލް މެެޗު ވެގެން ދާނީ އުނދަގޫ މެޗަކަށް ކަމަށެވެ. އެހެން ނަމަވެސް، އިންޓަރ މިލާނުން އޮތީ މެޗަށް ފުރިހަމަ އަށް ތައްޔާރަށް ކަމަށާއި، އެ ޓީމުގެ ވައްޓަފާޅީގައި ކުޅެ، ޗެމްޕިއަންސް ލީގު ކާމިޔާބު ކުރުމަށް ހުރިހާ ހިތްވަރެއް ލާނެ ކަމަށް ވެސް އޭނާ ބުންޏެވެ.

އިންޓަރ މިލާނުން ޗެމްޕިއަންސް ލީގުގެ ފައިނަލްގެ ޖާގަ ހޯދީ، ސެމީ ފައިނަލްގައި ސްޕެއިންގެ ބާސެލޯނާ ބަލި ކުރުމަށް ފަހު އެވެ. ސެމީ ފައިނަލްގެ ފުރަތަމަ ލެގު އެއްވަރުވީ ނަމަވެސް، ދެ ވަނަ ލެގުގައި ވާދަވެރި ކުޅުމަކަށް ފަހު އިންޓަރ މިލާނުން ވަނީ ބާސެލޯނާގެ މައްޗަށް ކުރި ހޯދައިފަ އެވެ.