ރަސްމާލެއާއި މާލެއާ ދެމެދު ގުޅުވާލާ އަންޑަރވޯޓަރ ޓަނަލްގެ ވާހަކަ ވިދާޅުވީ ސަތޭކަ ޕަސެންޓް ޔަގީން ކަމާއެކުއެވެ. ހުންނާނެ ގޮތުގެ ވަރަށް ރީތި ފުރިހަމަ އެނިމޭޓެޑް ވީޑިއޯ އަކާއެކުގައެވެ. ވިދާޅުވީ ހުރިހާ ކަމެއް ނިމިފައިވާ ކަމަށެވެ. ޖަލްސާއަށް ހާޒިރުވެތިބި މީހުން އަތްޖެހީކީ ތިޔަހެނެއް ނޫނެވެ. އަތް ފޫދާހާ ބާރަށެވެ. އެހާވެސް ޔަގީން ކަމާއެކުގައެވެ.

އެވާހަކަ ބަދަލުވެގެން ދިޔައީ ދެމޫސުން ދޭތެރޭ ވައި އެނބުރޭ ހެނެވެ. މިހާރު އެވާހަކަ އޮބުނީއެވެ. އަމިއްލަ މިނިސްޓަރަކުވެސް އެއަށް ހަޖޫޖައްސަވާއި އެއީ އަދި މިހާތަނަށް ފެނިފައި އޮތް ޓެކްނޮލޮޖީއެއް ނޫނޭ ވިދާޅުވެ ދެއްކެވި ވާހަކައިން ވެރިމީހާގެ ހަގީގަތް ގިނަބަޔަކަށް ހާމަވީއެވެ.

ބަންކަރިންގެ ވާހަކައިން ހީވީ އެއީ މިސަރުކާރުން ސަރުކާރަށް ފައިސާ ވައްދަން ގާއިމް ކުރާ އޭޓީއެމް މެޝިނެއް ކަމަށެވެ. އެކަންވެސް ދިޔަގޮތް ފެންނަން އެއޮތީ ގެނައި ބާޖު އޮތްތަނުންނާ ކުޅުނު ޑްރާމާއާއި ބޭއްވި ބޮޑު ރަސްމިއްޔާތު ކަވަރ ކުރެވޭ ވަރުގެ އެއްޗެއްވެސް ފުރަތަމަ އަހަރު ނުލިބުނީމައެވެ.

ޑިވެލޮޕްމަންޓް ބޭންކާއެކު ރައްޔިތުންގެ ކުރިއެރުން އެތައް ގިއަރެއް މައްޗަށް ޖެހޭނެ ކަމަށް ހީކުރެވުނެވެ. ކޮންމެ މީހަކީވެސް ވިޔަފާރި ވެރިއަކަށް ވެވޭހާ ކުރިއަރާނެ ކަމަށް ބެލެވުނެވެ. ބޮޑުސިންގާ ރަސްމިއްޔާތެއް ބާއްވައިގެން ހުޅުވި އެބޭންކުން އަދި ޚިދުމަތެއް ލިބުނު މީހަކު މިއުޑުބަޅުކުރި ހިސާބަކު ނެތެވެ. އެކަމަކު އެތައް މިލިއަން ރުފިޔާއެއް އެކަމަށްވެސް ޚަރަދުވެ ނިމުނީއެވެ. ތަން ހިންގަން ގެނައި މީހާ އިސްތިއުފާދީ އޭނާވެސް ސަރުކާރު ކޯޓަށް އެދަމަނީ އޭނާގެ މުސާރަކޮޅުވެސް ނުދީ އޮތީމައެވެ.

މިހެންގޮސް ކިޔާނެ ކަމެއް ނެތެވެ. މިސަރުކާރުން ފެށިއްޔާ ފެށި ބޮޑު މަޝްރޫއެއްގެ ޖަލްސާ ވަރަށް ކުލަގަދައެވެ. އެހާމެ ފުރިހަމައެވެ. ދައްކާ ވާހަކަތައް އެހާމެ ބަލާޣާތްތެރިވެފައި ފަށުވި ވެފައި ފުރިހަމައެވެ.

ދައްކާން މިއުޅެނީކީ އަމުދަކުން މިވާހަކައެއް ނޫނެވެ. ދައްކާން މިއުޅެނީ މިސަރުކާރުގެ އަސްލު ތަރައްޤީއަކީ މިފަދަ ބޮޑު ރަސްމިއްޔާތު ކަމެވެ. ދޭދޭ ދެމިނިސްޓަރުން ދިމާވިއަސް ބޮޑު ބައްދަލު ވުމެކެވެ. ބޮޑު ސިންގާ ރަސްމިއްޔާތެކެވެ. އެއް މިނިސްޓްރީއެއްގެ ދެޑިޕާޓްމަންޓަކުން ކަމެއް ކުރިއަސް އެކަން ހަވާލުކުރާން ބާއްވާ ހެޔޮވަރު ވަރުގެ ބޮޑު ރަސްމިއްޔާތެކެވެ. ބިލެއް ތަސްދީގް ކުރައްވަންވެސް ބޮޑުސިންގާ ރަސްމިއްޔާތެކެވެ. ކަމެއް ކުރާނަމޭ ވިދާޅުވާންވެސް ހަފްލާއެކެވެ. އެކަން ކުރުމުގެ އެއްބަސްވުމުގައި ސޮއިކުރުމަށް އަނެއް ހަފްލާއެވެ. އަދި އޭގެ ދެތިންދުވަހެއް ފަހުން އެކަން އެބަޔަކާ ހަވާލު ކުރުމަށްވެސް އަނެއްކާ އަނެއް ރަސްމިއްޔާތެވެ.

ހަނދާނަށް އަންނަނީ ސަރުކާރުގެ އެންމެ ކުރީކޮޅެވެ. ކުރެއްވި ބޮޑެތި މަސައްކަތްތަކެވެ. އެތައް ބަޔަކު އެއްވެ ބޭއްވި ބޮޑެތި ކާމިޔާބީ ހަފްލާއެވެ. އެކަކަމަކު އެއީ ކުރިން ނުވަދެވޭ މަގެއް ހުޅުވާލުމެވެ. ތަނެއްގައި ހުރި ބޭނުން ނުކުރާ ވެހިކަލްތަކެއް ނަގާލާ ސާފުކޮށްލުމެވެ. އެއްކޮޅަށް ދުއްވޭ މަގެއް ދެކޮޅަށް ދުއްވޭގޮތް ހަދާލުމެވެ. އެއްކަމަކަށް ބޭނުންކުރި އޮފީހެއް އެހެންކަމަކަށް ބޭނުންކުރަން އެތަނުގެ ނަންފިލާ ގަނޑު ބަދަލުކޮށްލުމެވެ.

ކޮންމެއަކަސް މިހާރު މިފެންނަނީ އަނެއްކާވެސް އެފަދަ ހަފްލާތަކެކެވެ. ކޮންމެ ކަމެއްގައިވެސް އެއަށްވުރެ ބޮޑުކޮށްގެން ދެއްކުންތެރިކަމުގެ ހަފްލާތަކެކެވެ. އެއްކަމެއް ތިންހަތަރު ފަހަރަށް ބާއްވާ ޖަލްސާއެވެ. ބޭނުމަކީ ހަމަ އެންމެ ބޭނުމެކެވެ. ކަމެއް ނުކުރެވުމެވެ. އެތައް މަޝްރޫއެއް ހިންގަން ހަވާލުކުރިކަމަށް ވިދާޅުވާއިރު އެއިންކަމެއް ގެޒެޓް ކުރެވިފައިވެސް ނޯންނާތީއެވެ. ސަރުކާރުގެ ކުންފުނިތަކުގައި ކަންކަން ކުރުމުގެ ކެޕޭސިޓީއެއް ނެތޭ ބުނެފައި އޭގެ ހަފްތާއެއްގެ ފަހުން ހަމަ އެކުންފުންޏަށް އޭގެ މަޝްރޫއެއް ހަވާލުކޮށް ސޮއިކުރުމުގެ ރަސްމިއްޔާތެއް ބޭއްވިއަސް އެއިން ކަމެއް އާއްމު ރައްޔިތަކަށް ފެންނާން ނެތުމެވެ. ހިންގަމޭ ކުރަމޭ، ހަވާލުކޮށްފީމޭ، ސޮއިކޮށްފީމޭ ވިދާޅުވިއަސް އެއިން ކަމެއް ވުޖޫދުވާނޭ ގޮތެއް ނެތުމެވެ. އެކަމާހުރެ ރަށްރަށުންނާއި އާއްމު މީހުން ކިޔާ އެއްޗިއްސަށް އަނެއްކާ އެކަންކުރައްވާނޭ ކަމަށް ވައުދު ވުމެވެ. ކުރުކޮށް ފޮނިކޮށް ބުނަންޏާ ކަންނުވެ ނޫނީ ކަންނުކޮށް ދެއްކެން އުޅުމެވެ. މިއީ ކަންނުކޮށް ނަންވާން އުޅޭ ކަންދެއްކުމުގެ ސަރުކާރެކެވެ.