ޣައްޒާ ހަނގުރާމަ ހުއްޓުވުމަށް އެމެރިކާ އިން އައު ހުށަހެޅުމެއް ހުށަހަޅަނީ

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓުވުމަށް ކުރަމުން އަންނަ މަސައްކަތުގައި އެމެރިކާ އިން އައު ހުށަހެޅުމެއް ހުށަހަޅަން ނިންމައިފި އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ އިސް ނެގުމުގެ މަތިން ހަނގުރާމަ ހުއްޓުވުމަށް ކުރަމުން އަންނަ މަސައްކަތުގެ އައު ހުށަހެޅުން ބުދަ ދުވަހު ވަނީ ހުށަހަޅައިފަ އެވެ. 

އެމެރިކާގެ ރިޔާސީ ގަނޑުވަރު ވައިޓް ހައުސްގައި ނޫސްވެރިންނާ ވާހަކަ ދައްކަވަމުން، އެމެރިކާގެ ރައީސް ޓްރަމްޕްގެ ޚާއްސަ މަންދޫބު ސްޓީވް ވިކްޓޮފް ވިދާޅުވީ އައު ޝަރުތުތަކެއް އަދި ހުށަހެޅުންތަކެއް ހިމެނޭ އެއްބަސްވުމެއް ބުދަ ދުވަހު ހުށަހަޅާނެ ކަމަށެވެ. 

ވިކްޓޮފް ވިދާޅުވީ އިސްރާއީލާއި ހަމާސްއާ ދެމެދު ހިނގަމުން އަންނަ ހަނގުރާމަ ވަގުތީ ގޮތުން ހުއްޓުވުމަށާއި، ދާއިމީ ސުލްހަވެރިކަމަކަށް ވާސިލުވުމާ ގުޅޭ ގޮތުން ރަނގަޅު އުންމީދުތަކެއް އޭނާ އަށް ކުރެވޭ ކަމަށެވެ.

އެއްބަސްވުމުގެ ވާހަކައިގެ އިތުރުން، ޣައްޒާގެ ރައްޔިތުންނަށް ބޭނުންވާ އިންސާނީ އެހީ އާއި ކާބޯތަކެތި ފޯރުކޮށްދިނުގެ މައްސަަލައާ ގުޅޭ ގޮތުން ވެސް ވާހަކަ ދައްކަވައިފަ އެވެ. 

އޭނާ ވިދާޅުވީ ޣައްޒާގައި މިހާރު ހިނގަމުން ދަނީ ވަރަށް ނުރައްކާތެރި ޙާލަތެއް ކަމަށެވެ. އަދި ޣައްޒާގެ ރައްޔިތުންނަށް ބޭނުންވާ އިންސާނީ އެހީ އާއި، ކާބޯ ތަކެއްޗާއި، ސާފު ބޯފެން ފޯރުކޮށްދިނުމުގެ މަސައްކަތް ކުރަމުން އަންނަ ކަމަށް ވެސް ވިދާޅުވި އެވެ. 

ޣައްޒާ ހަނގުރާމަ ހުއްޓުވުމާ ގުޅޭ ގޮތުން އެމެރިކާގެ ރައީސް ޓްރަމްޕް ވެސް ވަނީ ވާހަކަ ދައްކަވައިފަ އެވެ. އަދި އެ ހަނގުރާމަ ހުއްޓުވުމަށް ބޭނުންވާ ކަމަށާއި، އެކަމަށް ބާރު އަޅުއްވާނެ ކަމަށް ވެސް އޭނާ މީގެ ކުރިން ވިދާޅުވެފައިވެ އެވެ.

ނަމަވެސް އެމެރިކާ އަކީ އިސްރާއީލަށް އެންމެ ބޮޑަށް ވާގިވެރިވާ ޤައުމުތަކުގެ ތެރެއިން އެއް ޤައުމެވެ. މިފަހުން އައިސް ޓްރަމްޕް ގެންދަވަނީ ޣައްޒާ ހަނގުރާމަ ހުއްޓުވުމާ ގުޅޭ ގޮތުން ގިނަ ވާހަކަތަކެއް ދައްކަވަމުންނެވެ.