ޓީޝާޓު އަދި ބޫޓު އުފެއްދުމުގެ ބަދަލުގައި އެމެރިކާ އިން ބޭނުން ވަނީ އަސްކަރީ ސާމާނު: ޓްރަމްޕް 

އެމެރިކާގެ ޓެރިފް ސިޔާސަތުގެ އަމާޒަކީ ކުދި ޓީޝާޓުތަކާއި، ބޫޓު ފަދަ ތަކެތި އުފެއްދުމުގެ ބަދަލުގައި އަސްކަރީ އާލާތްތަކާއި، ޓެކްނޮލޮޖީގެ އުފެއްދުން ތަކުގެ އުފެއްދުންތެރިކަން އިތުރު ކުރުން ކަމަށް، އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ނިއު ޖާސީގައި ހުންނަވާ، އެއާ ފޯސް އަށް އަރައިވަޑައިގަތުމުގެ ކުރިން ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ޓެކްސްޓައިލް ސިނާއަތެއް ކޮންމެހެން ބޭނުން ނުވާ ކަމަށެވެ. އަދި އެކަމާ ގުޅިގެން ޓްރެޒަރީ ސެކްރެޓަރީ ސްކޮޓް ބެސެންޓް ދެއްކެވި ވާހަކަތަކަށް ތާއީދު ކުރައްވާ ކަމަށް ވެސް ޓްރަމްޕް ވަނީ ވިދާޅުވެފަ އެވެ. 

ޓްރަމްޕް ވިދާޅުވީ އެމެރިކާ އިން ބޭނުން ވަނީ ސްނިކާސް އަދި ޓީޝާޓު އުފައްދަން ނޫން ކަމަށެވެ. އޭގެ ބަދަލުގައި އެމެރިކާ އިން ބޭނުން ވަނީ އަސްކަރީ އާލާތްތައް އުފައްދަން ކަމަށް ވެސް އޭނާ ވިދާޅުވި އެވެ. އަދި ވަކިން ޚާއްސަކޮށް އާޓިފިޝަލް އިންޓެލިޖެންސްގެ ކަންތައްތަކެއް ކުރަން ބޭނުންވާ ކަމަށް ވެސް ޓްރަމްޕް ވިދާޅުވެފައިވެ އެވެ.

މިކަމާ ގުޅިގެން އެމެރިކަން އެޕަަލް އެންޑް ފުޓްވެއާ އެސޯސިއޭޝަން އިން ބުނެފައި ވަނީ ޓެރިފްގެ ސިޔާސަތަކީ އެ ސިނާއަތަށް ރަނގަޅު ނިންމުމެއް ނޫން ކަމަށެވެ. އެ އެސޯސިއޭޝަންގެ ރައީސް ސްޓީވް ލަމާ ވިދާޅުވީ، އިތުރު ޓެރިފްތަކުން ލިބޭނީ އެމެރިކާގެ އުފެއްދުންތެރިންނަށް ގެއްލުން ކަމަށެވެ. އަދި އިތުރު ޚަރަދުތަކެއް ގޮސް، ރަނގަޅު އާމްދަނީއެއް ހޯދުމަށް ގޮންޖެހުންތަކެއް ހުންނާނެ ކަމަށް ވެސް އޭނާ ވިދާޅުވި އެވެ. 

ދުނިޔޭގެ މާކެޓުތަކަށް ބޮޑެތި ބަދަލުރަކެއް ގެނެސްފައިވާ ޓްރަމްޕްގެ ޓެރިފް ސިޔާސަތު އިތުރަށް ފުޅާ ކުރުމުގެ ގޮތުން ޔޫރަޕިއަން ޔޫނިއަންގެ މުދަލަށް 50 އިންސައްތަ ޓެރިފް ނެގުމަށް ވެސް ވަނީ ހުށަހަޅުއްވާފައި އެވެ. ނަމަވެސް، ހޯމަ ދުވަހު ވަނީ އެކަމުގެ ސުން ގަޑި ކުރިއަށް އޮޔް ޖުލައި މަހުގެ ނުވަ ވަނަ ދުވަހަށް ފަސްކޮށްފަ އެވެ. 

މީޑިއާ ތަކުގައި ބުނެފައިވާ ގޮތުން 2016 ވަނަ އަހަރު އެމެރިކާގައި އޮތް ރިޔާސީ އިންތިޚާބު އަދި 2024 ވަނަ އަހަރު އޮތް ރިޔާސީ އިންތިޚާބު ވެސް ޓްރަމްޕް ކާމިޔާބު ކުރަައްވާފައި ވަނީ އެމެރިކާގެ އުފެއްދުންތެރިކަމުގެ ދާއިރާ އިން ވަޒީފާތައް ގެއްލިފައިވާ މަސައްކަތްތެރިންގެ ތާއީދާ އެކު އެވެ.