ދިވެހީންގެ އުފެއްދުންތެރިކަމުގެ މައުރަޒު 2025ގެ ވަނަތައް ވިއްކާފައިވާ ކަމަށް ތުހުމަތުކޮށްފިއެވެ.

ރާއްޖެއެމްވީއަށް އެ މައުރަޒުގައި ބައިވެރިވި ބައެއް މީހުން ބުނީ ދިވެހީންގެ އުފެއްދުންތެރިކަމުގެ މައުރަޒުގެ ވަނަތައް ހޮވާފައިވަނީ އިންސާފުވެރިކޮށް ނޫން ކަމަށާއި، ވަނަތައް ވިއްކާފައިވާ ކަމަށެވެ. ކެއުމުގެ ތަފާތު ގިނަ ވަައްތަރުތައް ހުރިއިރު، އެ އުފެއްދުންތަކުން ވެސް ވަނީ ވަނަތައް ހޮވާފައެވެ.

އެ މައުރަޒުގައި ބައިވެރިވެ، އައިސްކްރިމް ހަދައި ވިއްކާ ޒުވާނެއް ބުނީ މައުރަޒުގައި ބައިވެރިވި ގިނަ މީހުންނާ މެދު އަމަލުކުރަމުންދަނީ ވަރަށް ތަފާތު ގޮތަކަށް ކަމަށާއި، ރަނގަޅު މައުލޫމާތު ވެސް ހިއްސާ ނުކުރާ ކަމަށެވެ. އަދި ވަނަތައް ދީފައިވާއިރު، އޭނާ ހަދާފައިވާ އައިސްކްރީމްއިން ރަހަބަލާފައިނުވާ ކަމަށާއި، ރަހަ ނުބަލައި ވަނަ ދޭނެ ގޮތް ނޭނގޭ ކަމަށް އޭނާ ބުނެފައިވެއެވެ.

މީގެ އިތުރުން ތުޅާދޫ ޒުވާނެއް ބުނީ، އަތްތެރި މަސައްކަތުގެ ބައިން ވެސް ވަނަ ދީފައިވަނީ އިންސާފުވެރިކޮށް ނޫން ކަމަށާއި، ވަނަ ހޮވުމުގައި ބަލާފައިވާ ގޮތް ނޭނގޭ ކަމަށެވެ. 1 ވަނަ ދީފައިވަނީ ލ.ފޮނަދޫ ޖަމިއްޔާއަކަށް ކަމަށާއި، އެއީ ތުޅާދޫ މީހެއް ލައްވާ ފައިސާ ދީގެން ހަދާފައިވާ ލިޔެލާ ޖެހި ދެ ފޫޓުގެ ވާސްއެއް ކަމަށް އެޒުވާނާ ބުނެފައިވެއެވެ. އަދި ތުޅާދޫއިން ލިޔެލާޖެހި 5 ފޫޓުގެ ވާސްއެއްގެ އިތުރުން، 5 ފޫޓާއި 4 އިންޗީގެ ވާސްއެއް ހުށަހެޅި ކަމަށާއި، ދެވަނަ 5 ފޫޓާއި 4 އިންޗީގެ ވާސްއަށް ލިބުނު ކަމަށް އެމީހާ ބުންޏެވެ.

ދިވެހީންގެ އުފެއްދުންތެރިކަމުގެ މައުރަޒަށްވާއިރު، އެއީ އަމިއްލަ އުފެއްދުންތޯ ބަލާފައިވަނީ ކިހައި މިންވަރަކަށްތޯ އެމީހުން ސުވާލު އުފައްދާފައިވެއެވެ.

ދިވެހީންގެ އުފެއްދުންތެރިކަމުގެ މައުރަޒުގައި ބައިވެރިވެ އެކި ދާއިރާތަކުން 1 ވަނަ ހާސިލުކުރި ފަރާތްތަކަށާއި، މުޅި މައުރަޒުން އެންމެ މަތިން މާކްސް ހޯދި 5 ފަރާތަށް ރަން ވަނަ ރައީސް ޑރ.މުހައްމަދު މުއިއްޒު ވަނީ ހަވާލުކޮށްދެއްވާފައެވެ.

ޖުމްލަކޮށް 275 ވަނައެއް ހޮވާ އިނާމު ހަވާލުކޮށްފައިވެއެވެ. ދިވެހީންގެ އުފެއްދުންތެރިކަމުގެ މައުރަޒުގައި ޖުމްލަ 383 ފަރާތަކުން ބައިވެރިވެފައިވެއެވެ. އެއީ 14 ކެޓެގަރީއަކުންނާއި 82 ސަބް ގިންތިއަކުންނެވެ.

އެގޮތުން އެންމެ ގިނައިން ބައިވެރިވެފައިވަނީ އަތްތެރި މަސައްކަތުގެ ދާއިރާއިންނެވެ. މި މައުރަޒުގައި ހދ އަތޮޅުން ފެށިގެން ލ އަތޮޅާއި ހަމައަށް ގިނަ ރަށްތަކަކުން ބައިވެރިވެފައި ވެއެވެ. މަޢުރަޒުގައި އެންމެ ގިނަ ތަކެތި ބައިވެރިކޮށްފައިވަނީ މާލެއާއި ބ.ތުޅާދޫ އިންނެވެ. މައުރަޒުގައި 3600އަށްވުރެ ގިނަ ތަކެތި ބައިވެރި ކުރުމަށް އެޕްލިކޭޝަން ފޯމް ފުރާފައިވެއެވެ.

ރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާ ކުރުމުގެ މަގުސަދުގައި، ވިޔަފާރިއާއި އުފެއްދުންތެރިކަމަށް އަމާޒުކޮށް ބާއްވާ މައުރަޒެކެވެ. މި މައުރަޒު ކުރިއަށްދާނީ 23 މެއި އިން ފެށިގެން 31 މޭގެ ނިޔަލަށެވެ. މި މައުރަޒު އާންމުންނަށް ހުޅުވާލާފައިވަނީ ހުކުރު ދުވަހުގެ ރޭ 8:30ގައެވެ.

މި މައުރަޒު، އިންތިޒާމްކޮށް ކުރިއަށް ގެންދަނީ، މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑާއި، ބިޒްނަސް ސެންޓަރ ކޯޕަރޭޝަން (ބީ.ސީ.ސީ) ގުޅިގެންނެވެ.