ކުރީގެ ޕީޖީ ޝަމީމަށް ހަމަލާދިން މީހުންގެ މައްޗަށް ކުށް ސާބިތު ނުވާކަމަށްކުރި ހުކުމް އިސްތިއުނާފް ކުރަނީ
24 މެއި 2025 | ހޮނިހިރު 12:33ސާބިތު ނުވާކަމަށް ކޯޓުން ކަނޑާއެޅި މައިގނަޑު ސަބަބަކީ ސީސީޓީވީ ފުޓޭޖުގައިވާ ގަޑިއާއި އެ ހާދިސާ ހިނގި ގަޑިއާއި ދުިމާނުވާތީއެ
ކުރީގެ ޕީޖީ ޝަމީމް އަދި ޝަމީމަށް ހަމަލާދިން ކަމުގެ ތުހުމަތުގައި ހައްޔަރު ކުރި މީހުން
ކުރީގެ ޕްރޮސިކިއުޓާރ ޖެނެރަލް (ޕީޖީ) ހުސައިން ޝާމީމް އަށް ހަމަލާދިން ކަމުގެ ތުހުމަތުގައި ހައްޔަރު ކުރި މީހުންގެ މައްޗަށް ކުށް ސާބިތުނުވާކަމަށް ކްރިމިނަލް ކޯޓުން ކުރި ހުކުމް އިސްތިއުނާފް ކުރުމަށް ޕީޖީ އޮފީހުން ނިންމައިފިއެވެ.
މަގުމަތިން ދިމާކޮށް ޝަމީމް އަށް ހަމަލާދިން ކަމުގެ ތުހުމަތުގައި ދައުވާ ކޮށްްފައިވަނީ ރ. އަލިފުށި، ރިވެލި، މިދުހަތު އާދަމް އާއި، ލ. ގަން، ތުނޑި، ޖަވާހިރުވިލާ، މުހައްމަދު ޖަޒްލާން އާއި ދަފްތަރު ނަންބަރު ދރ 2247، އަހުމަދު މައިސާން ހާޝިމް އާއި ލ. މާމެންދޫ، މުރިނގު، ރަޖުވާން ލަތީފް އާއި، ތ. ގާދިއްފުށި، މުސްތަރީގެ، ޝަމާލް ހުސައިން އާއި ތ. ދިޔަމިގިލި، ރުވާ، އަބާން އަބްދުލްހަންނާނުގެ އަދި އދ. މާމިގިލި، ކެމީހިޔާ، ޒަޔާން ނަސީރުގެ މައްޗަށެވެ.
އެމީހުންގެ މައްޗަށް ދައުލަތުން އުފުލީ ތޫނު ހަތިޔާރެއް ބޭނުންކޮށްގެން ގަސްދުގައި މީހަކު މަރާލަން އުޅުނުކަމުގެ ކުށުގެ ދައުވާއެވެ. ކްރިމިނަލް ކޯޓުން ވަނީ އެ މީހުންގެ މައްޗަށް ކުށް ސާބިތުނުވާކަމަށް ހުކުމްކޮށްފައެވެ.
މައްސަލަ ސާބިތު ނުވާކަމަށް ކޯޓުން ކަނޑައެޅި މައިގަނޑު ސަބަބަކީ މި މައްސަލަ ސާބިތުކުރަން ދައުލަތުން ހުށަހެޅި އެންމެ މުހިންމު ހެކި ކަމުގައިވާ ސީސީޓީވީ ފުޓޭޖުގައިވާ ގަޑިއާއި އެ ހާދިސާ ހިނގި ގަޑިއާއި ދިމާނުވާތީއެވެ.
މީގެއިތުރުން ދައުވާ ސާބިތު ކުރުމަށް ދައުލަތުން ހުށަހެޅި އެހެން ހެކިތަކަށް ބަލާއިރު، ކުށް ކުރީ ދައުވާ ލިބޭ މީހުން ކަމަށް ބާރުދޭ އިތުރު އެއްވެސް ހެއްކެއް ނުވަތަ ގަރީނާއެއް ހުށަހަޅާފައެއް ނެތް ކަމަށް ކޯޓުން ބުނެ އެވެ.
ޝަމީމަށް ހަމަލާދިނީ ސައިކަލު ޕާކޮށްފައި ގެެއަށް ވެދެވަޑައިގަންނަވަނިކޮށް ކަމަށް ފުލުހުން ބުނެ އެވެ. އަދި ޝަމީމަށް ހަމަލާދީފާ ވަނީ މަރުތޭލަކުން ކަމަށާއި އެ ހަމަލާގެ ސަބަބުން އޭނާގެ ވާއަތު ވައަތުގެ އުޅަނބޮށިން ތިރީގެ ބައެއް ކަށިތަކުގައި ރެނދުލާފައިވާކަމަށް ފުލުހުން ބުނެފައިވެއެވެ.
