ހައްޖުވެރިން ފުރުމަށް ހަމަޖެހިފައިވާ ދުވަސްތަކުގައި އެއާޕޯޓު ތޮއްޖެހުން ބޮޑުވާނެ ކަމަށް ބެލެވޭތީ ސަމާލުވުމަށް އިލްތިމާސްކޮށްފި
އެދުވަސްތަކުގައި އިތުރު ފުލުހުން އެއާޕޯޓުގައި ހަރަކާތްތެރިވާނެ
ރާއްޖޭގެ ބައެއް ހައްޖާޖީން އެއާޕޯޓުގައި ފުރުމުގެ ކުރިން އާއިލާއެކު މެންބަރުންނާއެކު ވަގުތުކޮޅެއް ހޭދަކޮށްލަނީ - ފައިލް ފޮޓޯ
ހައްޖުވެރިން ފުރުމަށް ހަމަޖެހިފައިވާ ދުވަސްތަކުގައި ވެލާނާ އިންޓަނޭޝަނަލް އެއާޕޯޓް (ވީއައިއޭ)ޓްރެފިކް ތޮއްޖެހުން ބޮޑުވާނެ ކަމަށް ބެލެވޭތީ ސަމާލުވުމަށް ފުލުހުން އިލްތިމާސްކޮށްފިއެވެ.
ހޮނިހިރު ދުވަހު ފުލުހުން ބުނީ، ހައްޖުގެ މަތިވެރި އަޅުކަން އަދާކުރުމަށް ރާއްޖެއިން ފުރުމަށް ހަމަޖެހިފައިވާ ހައްޖުވެރިން 2025 މެއި 26، 27، 29، އަދި 30 ވަނަ ދުވަހު ފުރުމަށް ހަމަޖެހިފައިވާތީ އެދުވަސްތަކުގައި އެއާޕޯޓުގައި ޓްރެފިކް ތޮއްޖެހުން ބޮޑުވާނެ ކަމަށް ބެލެވޭ ކަމަށެވެ.
އެހެންކަމުން އޮމާންކަމާއެކު ޓްރެފިކް ފްލޯ ކުރިއަށް ގެންދިއުމަށް އެދުވަސްތަކުގައި އިތުރު ފުލުހުން އެއާޕޯޓުގައި ހަރަކާތްތެރިވަމުން ގެންދާނެ ކަމަށެވެ.
އެއާޕޯޓުން ފުރާ އެހެން މީހުންނަށްވެސް ޓްރެފިކް ތޮއްޖެހުމުގެ ސަބަބުން ލަސްތަކެއް ކުރިމަތިވުމަކީ އެކަށީގެންވާ ކަމެއްކަން ފާހަގަކޮށް ފުލުހުން ބުނީ އެދުވަސްތަކުގައި ފުރާ މީހުން ވެސް ދުރާލައި އެއާޕޯޓަށްދާން ޖެހޭ ކަމަށެވެ. އަދި ފުރުމުގެ އިންތިޒާމްތައް އަވަހަށް ނިންމުމަށް އިލްތިމާސްކޮށްފައިވެއެވެ.
މީގެ އިތުރުން ފުލުހުން ބުނީ، ހައްޖުވެރިންނާއެކު އެއާޕޯޓަށްދާއިރު، ގާތްތިމާގެ މީހުންނާއި އެއާޕޯޓަށް ދަތުރުކުރާ އެއްގަމު އުޅަނދު ދުއްވާ ފަރާތްތަކުން ވެސް ފުލުހުންގެ އިރުޝާދުތަކާ އެއްގޮތަށް އަމަލު ކުރުމަށް އެދޭ ކަމަށެވެ.
ހައްޖާޖީން ފުރުމުގެ ހުރިހާ އިންތިޒާމެއް އެހެން އަހަރުތަކެކޭ ވެސް އެއްފަދައިން ވަރަށް ފުރިހަމައަށް ހަމަޖެހިފައިވާ ކަމަށް ހައްޖު ކޯޕްރޭޝަނުން ބުނެއެވެ.
މި އަހަރުވެސް ހައްޖަށް ގެންދިއުމަށް ރާއްޖެއަށް ލިބިފައިވަނީ 1000 ކޯޓާއެވެ.
