މަދަހަ މުބާރާތްތަކާއި ޤުރުއާން މުބާރާތްތައް ބާއްވަނީ އިސްލާމް ދީނަށް ލޯބި ކުރާ ޖީލެއް ބިނާ ކުރުމުގައި ސިޓީ ކައުންސިލްގެ ހިއްސާ ކަށަވަރުކުރުމަށް - އާޒިމް
23 މެއި 2025 | ހުކުރު 08:21އާޒިމް ވަނީ މަދަހަ މުބާރާތާއި ޤުރުއާން މުބާރާތަށް ރަނގަޅު ތަރުޚީބެއް ލިބުނުކަން ފާހަގަކުރައްވާފަ
މާލޭގެ މޭޔަރ އާދަމް އާޒިމް މާލޭ ސިޓީ ކައުންސިލުން ކުރިއަށް ގެންދިޔަ ޤުރުއާން މުބާރާތާއި މަދަހަ މުބާރާތުގެ ނަތީޖާ ފާޅުކުރުމުގެ ރަސްމިއްޔާތުގައި ވާހަކަދައްކަވަނީ 22.05.2025
މާލެސިޓީ ކައުންސިލުން މަދަހަ މުބާރާތްތަކާއި ޤުރުއާން މުބާރާތްތައް ބާއްވަނީ އިސްލާމް ދީނަށް ލޯބި ކުރާ ޖީލެއް އުފެއްދުމުގައި މާލެ ސިޓީ ކައުންސިލްގެ ހިއްސާ ކަށަވަރު ކުރުމަށްޓަކައި ކަމަށް މާލޭގެ މޭޔަރ އާދަމް އާޒިމް ވިދާޅުވެއްެޖެއެވެ.
އޭނާ އެފަދައިން ވިދާޅުވީ މާލޭ ސިޓީ ކައުންސިލުން ކުރިއަށް ގެންދިޔަ ޤުރުއާން މުބާރާތާއި މަދަހަ މުބާރާތުގެ ނަތީޖާ ފާޅުކުރުމުގެ ގޮތުން ބުރާސްފަތި ދުވަހުގެރޭ ބޭއްވި ޖަލްސާގައި ވާހަކަދައްކަވަމުންނެވެ.
ދީނާއި މެދު ލޯބި އުފެއްދުމަކީ މުއައްސަސާތަކުގެ މައްޗަށް އޮތް ޤައުމީ މަސްޢޫލިއްޔަތެއް ކަމަށް މޭޔަރ ވަނީ ވިދާޅުވެފައެވެ. އިސްލާމް ދީނަށް ލޯބިކޮށް އިސްލާމް ދީނުގެ މަތިވެރި ޝިއާރު ކުރިއަރުވަން ޖެހޭ ކަމަށާއި އެއީ ކޮންމެ މީހެއްގެ ވެސް ފަރުދީ ޒިންމާ އެއް ކަމަށް އާޒިމް ވަނީ ވިދާޅުވެފައެވެ. އެހެންކަމުން ދީނީ ހޭލުންތެރިކަން އިތުރުކޮށް ދީނަށް ލޯބި ޖެއްސުމަށް މާލޭ ސިޓީ ކައުންސިލުން ގިނަ މަސައްކަތްތަކެއް ކުރާ ކަމަށް އާޒިމް ވިދާޅުވިއެވެ.
އިސްލާމް ދީނުގައި މަދަހަ އަކީ ރަސޫލާގެ ރީތި ސީލަތު ފެންނަ ކަމަކަށް ވެފައި ޅެންވެރިކަމާއި މަދަހަ މެދުވެރިކޮށް ދިވެހި ބަހުގެ ފަންނު ކުރިއެރުވުމަށް ވެސް ފުރުސަތު ލިބޭ ކަމަށް އާޒިމް ވިދާޅުވިއެވެ. އެހެންކަމުން ސިޓީ ކައުންސިލުން ކުރިއަށް ގެންދިޔަ މަދަހަ މުބާރާތާއި ޤުރުއާން މުބާރާތް މެދުވެރިކޮށް ދީނީ ހޭލުންތެރިކަން އިތުރުކޮށް ދީނީ އަގީދާ ވަރުގަދަ ކުރުމަށް ލިބޭ ފުރުސަތެއް ކަމަށް ވެސް އާޒިމް ވަނީ ވިދާޅުވެފައެވެ.
ކީރިތި ޤުރުއާނަކީ އަޅުގަނޑުމެން އުޅޭންވީ ގޮތް ބަޔާންކޮށްދީފައިވާ ކަލާމްފުޅު. ގުރުއާނުގެ އިލްމު ފެތުރުން ވަރަށް މުހިންމު. ދީނީ އަގީދާ އަށް އޮތް ލޯބި އިތުރުކުރުމަކީ އެހާމެ މުހިންމު ކަމެއް.މާލޭގެ މޭޔަރ އާދަމް އާޒިމް
އާޒިމް ވަނީ މަދަހަ މުބާރާތާއި ޤުރުއާން މުބާރާތަށް ރަނގަޅު ތަރުޚީބެއް ލިބުނުކަން ފާހަގަކުރައްވާފައެވެ. އަދި އެ ދެ މުބާރާތުން ވަރަށް ހުނަރުވެރި ފަރާތްތައް ފެނުނު ކަމަށާއި އެކަމާއި މެދު އުފާކުރައްވާ ކަމަށް އާޒިމް ވިދާޅުވިއެވެ. އާޒިމް ވަނީ ކުރިއަށް އޮތްތަނުގައި ވެސް މިފަދަ މުބާރާތްތައް ބާއްވާނެ ކަމަށް ވިދާޅުވެފައެވެ. އެގޮތުން ކުރިއަށް އޮތް ރަމަޟާން މަހު ވެސް އެ މުބާރާތްތައް ބާއްވާނެ ކަމަށް އާޒިމް ވަނީ ވިދާޅުވެފައެވެ.
