ދަރުބާރު ގޭގައި ކަތުރުފަނީގެ އުނދަނގޫ ބޮޑުވެ މުވައްޒަފުން ނުރައްކަލަށް، ޖަވާބުދާރީ ވާނެ މީހަކު ނެތް!
23 މެއި 2025 | ހުކުރު 07:07ރައީސަށް ހުށަހެޅި ޕެޓިޝަންގައި ބުނެފައި ވަނީ މުވައްޒަފުންގެ ގަޔާއި މޭޒަށް ވެސް ކަތުރުފަނި ވެއްޓޭ ކަމަށް
ދަރުބާރު ގޭގައި މަސައްކަތް ކުރާ ބައެއް މުވައްޒަފުންނާއި ރާއްޖެޓީވީގެ ނޫސްވެރިއަކު ސުވާލު ކުރަނީ
ދަރުބާރުގޭގައި ކަތުރުފަނި އަޅާ ތަނުގެ އުމްރާނީ ހާލަތު ގޯހުން ގޯހަށް ދިއުމާއި މެދު ސުވާލުކުރުމުން، އެ މައުލޫމާތު ހޯދުމަށް ލިޔުމުން އެދުމަށް ރާއްޖެއެމްވީ އަށް އަންގައިފިއެވެ.
ދަރުބާރުގޭގައި ކަތުރުފަނިއަޅާ އެކަން މުވައްޒަފުންނަށް ތުރާލަކަށް ވެގެން އެކަން ރައީސް ޑރ.މުހައްމަދު މުއިއްޒުގެ ސަމާލުކަމަށް އެ ތަނުގައި މަސައްކަތް ކުރާ މުވައްޒަފުން ގެނެސްފައި ވަނީ މި ހަފްތާގެ ތެރޭގައެވެ. އެގޮތުން ރައީސަށް އެތަނުގައި މަސައްކަތް ކުރާ މުވައްޒަފުން ހުށަހެޅި ޕެޓިޝަނެއްގައި ބުނެފައި ވަނީ އެ ތަނުގެ ހާލަތު ގޯސްވެ ތަން ބޮލަށް ވެއްޓޭ ހާލަތަށް ގޮސްފައިވާ ކަމަށެވެ. ޖުމްލަ 122 މުވައްޒަފުން ސޮއިކޮށް ރައީސް އަށާއި ދައުލަތުގެ އިސްވެރިންނަށް ފޮނުވި ޕެޓިޝަނުގައި ބޮޑެތި ކަންބޮޑުވުންތަކެއް ވަނީ ފާހަގަކޮށްފައެވެ.
އެކަމާއި ގުޅޭ މައުލޫމާތު ސާފުކުރުމަށް ރާއްޖެއެމްވީން ބުރާސްފަތި ދުވަހު މެންދުރު ދަރުބާރު ގެއަށް ގޮސް އެންމެ ފުރަތަމަ ވަންނަ ދޮރާއި ކައިރީގައި ހުރި ކޮންސްޓްރަކްޝަން މިނިސްޓްރީގެ ކައުންޓަރގައި ތިބި މުވައްޒަފުންނާއި ސުވާލުކުރުމުން އެ މުވައްޒަފުން ބުނީ ކަތުރުފަނިއެޅުމުގެ މައްސަލަ ދިމާވެފައި ވަނީ އެންވައިރޮމެންޓް ޕްރޮޓެކްޝަން އެޖެންސީ އާއި ފިނޭންސް މިނިސްޓްރީގެ މުވައްފުން މަސައްކަތް ކުރި ބައިގައި ކަމަށެވެ.
އެހެންކަމުން އެ ދެ އިދާރާ ހުރި ތަނަށް ގޮސް އެތަނުގެ މުވައްޒަފުންނާއި ބައްދަލުކުރުމަށާއި އެތަނުގެ ހާލަތު ބުނެދެވޭނެ ފަރާތަކާއި ބައްދަލުކުރުމަށް ރާއްޖެއެމްވީން ވާނީ އެދިފައެވެ. އެހެންނަމަވެސް އެތަނުގެ މުވައްޒަފުން ރާއްޖެއެމްވީ އަށް ދިން ޖަވާބަކީ އެ ވުޒާރާގެ ޕީއެސް އާއި ސުވާލުކުރުމަށް ފަހު ޖަވާބުދެއްވާނެ ކަމަށެވެ.
5 ވަރަކަށް މިނިޓް ފަހުން އެ މުވައްޒަފުން ޕީއެސް އާއި ވާހަކަ ދެއްކުމަށް ފަހު އެންގީ މުވައްޒަފުން އިދާރީ މަސައްކަތްތައް ކުރަމުންދާ ގަޑީގައި ވީޑިއޯ ނުކުރެވޭނެ ކަމަށެވެ. މުވައްޒަފުން ނުހިމެނޭހެން ތަނުގެ ހާލަތު އެނގޭ ފަދަ ވީޑިއޯ އެއް ނެގުމަށާއި މައުލޫމާތު ދެވޭނެ ބޭފުޅަކު ހުރިތޯ އަނެއްކާވެސް ރާއްޖެއެމްވީގެ ޓީމުން ވަނީ ސުވާލުކޮށްފައެވެ.
އެހެންނަމަވެސް ޕީއެސް އޮފީހުގައި ނޫޅުއްވާ ކަމަށް ފާހަގަކުރައްވެމަށް ފަހު ދެން އިތުރަށް އެތަނުގެ ސްޓާފުން ރާއްޖެއެމްވީގެ ނޫސްވެރިންނަށް ޖަވާބެއް ނުދެއްވައެވެ. އީޕީއޭ އިން މަސައްކަތް ކުރާ ތަނުގެ ބޭރުގައި ހުރި މުވައްޒަފަކާއި ސުވާލުކުރުމުން އެ މުވައްޒަފު ވަނީ ޕީއެސް ގުޅުއްވާފައިވާ ކަމަށާއި ވީޑިއޯ ކުރުމަކީ މަސްލަހަތު އޮތް ގޮތަކަށް ނުވުމުން އެ ހުއްދަ ދެވެން ނެތް ކަމަށް ޕީއެސް އަންގަވާފައިވާ ކަމަށް ވިދާޅުވެފައެވެ.
އެ މުވައްޒަފުން އިޝާރާތްކުރި ޕީއެސް އަކީ އަޖުވަދުއެވެ. އެންވަޔަރަންމަންޓް މިނިސްޓްރީ އާއި ޓޫރިޒަމް މިނިސްޓްރީ އެއްކޮށްލުމާ އެކު މަގާމުން ވަކިކުރި، އެންވަޔަރަންމަންޓް މިނިސްޓްރީގެ ޕާމަނަންޓް ސެކްރެޓަރީ (ޕީއެސް) އަކަށް ހުންނެވި އަޖުވަދު މުސްތަފާ އަލުން ޕީއެސްގެ މަގާމަށް އައްޔަން ކުރީ މިދިޔަ މަރޗް މަހުގެ ކުރީކޮޅެވެ.
އެ ދެ އިދާރާއިން ޖަވާބެއް ނުލިބުނު ނަމަވެސް އެ ތަނަށް ދިޔަ ރާއްޖެ އެމްވީ އަށް ކޮންސްޓްރަކްޝަން މިނިސްޓްރީ ހުރި ބައިގައި ވެސް ކަތުރުފަނިއަޅާފައިވާކަން، ފެނުނު މަންޒަރުތަކުންނާއި މުވައްޒަފުންގެ ވާހަކަތަކުން އެނގުނެވެ. ރާއްޖެއެމްވީ އިން ވާނީ އެ ތަނުގެ ހާލަތު އޮޅުން ފިލުވުމަށް ވެސް މަސައްކަތް ކޮށްފައެވެ. ނަމަވެސް މީޑިއާ އަށް ޖަވާބުދެވޭ ފެންވަރުގެ ބޭފުޅަކު އަންނަ ކަމަށް ބުނުމަށް ފަހު 2 ޖެހުމުން އެ ތަން ބަންދު ކުރި އިރު ވެސް ޖަވާބުދާރީވާނެ މީހަކު އިދާރާ އިން ބޭރަކަށް ނުނިކުމެއެވެ. އެހެންކަމުން އެ ވުޒާރާގެ ބަހެއް ވެސް ވަނީ ލިބޭ ގޮތް ނުވެފައެވެ.
ދަރުބާރުގޭގައި މަސައްކަތް ކުރާ މުވައްޒަފުންގެ މަސައްކަތް ދަރުބާރުގެއަށް ބަދަލުކުރީ މިދިޔަ ޑިސެމްބަރު މަހު މާލޭގައި ހިނގި އަލިފާނުގައި ހާދިސާގައި ކުރިން އެ ވުޒާރާތައް ހިންގަމުންދިޔަ އިމާރާތް އެނދުމުންނެވެ.
އެ އިދާރާތަކުން މައުލޫމާތު ނުދިން ނަމަވެސް ރައީސަށް ހުށަހެޅި ޕެޓިޝަންގައި ބުނެފައި ވަނީ މުވައްޒަފުންގެ ގަޔާއި މޭޒަށް ވެސް ކަތުރުފަނި ވެއްޓޭ ކަމަށެވެ. އަދި ރާއްޖެ އެމްވީ އާއި ވާހަކަދެއްކި މުވައްފުން ވަނީ ކަތުރުފަނި ގިނަވެ އެތަނުގެ ސާފުތާހިރުކަން އެއްކޮށް ގެއްލިފައިވާ ކަމަށް ބުނެފައެވެ. އަދި އުޅެން އުނދަނގޫވުމުގެ އިތުރުން ކާބޯތަކެތި ގެންގުޅޭ އިރު އެއަށް ވެސް ކަތުރުފަނި ވެއްޓިފައި ހުންނަ ކަމަށް އެ މުވައްޒަފުން ވަނީ ބުނެފައެވެ.
