މި ސަރުކާރުގެ ކަންނެތްކަމުން އާރްޓީއެލް ފެރީގެ ޚިދުމަތް ރަނގަޅަށް މެއިންޓެއިން ނުކުރެވޭނެ: މޭޔަރު އާޒިމް
22 މެއި 2025 | ބުރާސްފަތި 09:10އާރްޓީއެލް ފެރީގެ ޚިދުމަތަކީ އަތޮޅުތެރޭގެ ރައްޔިތުންނަށް ވަރަށް ބޭނުންވާ ޚިދުމަތެއް
ޓީވީޓޯކް ޕްރޮގްރާމްގައި މާލެސިޓީގެ މޭޔަރު އާދަމް އާޒިމް ވާހަކަދައްކަވަނީ
މި ސަރުކާރުގެ ކަންނެތްކަމުން އާރްޓީއެލް ފެރީގެ ޚިދުމަތް ރަނގަޅަށް ގާއިމްނުކުރެވޭނެ ކަމަށް މާލެސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މޭޔަރު އާޒިމް ވިދާޅުވީ އާރްޓީއެލް ފެރީގެ ޚިދުމަތަކީ އަތޮޅުތެރޭގެ ރައްޔިތުންނަށް ވަރަށް ބޭނުންވާ ޚިދުމަތެއް ކަމަށާއި، މި ޚިދުމަތް ފުޅާކޮށް، ދެމެހެއްޓެނިވި ގޮތެއްގައި ގާއިމް ކުރަންޖެހޭ ކަމަށެވެ.
ކުރީ ސަރުކާރުގައި މި ޚިދުމަތް ގާއިމްކޮށްފައިވަނީ ހަމައެކަނި ލޯންޗު ބަދެގެން ނޫންކަން ފާހަގަކުރައްވައި މޭޔަރު އާޒިމް ވިދާޅުވީ ލޯންޗުތައް ޑިޒައިން ކުރުމުގެ އިތުރުން މުޅި ރާއްޖެ ސޮފްޓްވެއަރ އަކުން ގުޅާލާފައިވާ ކަމަށެވެ. މި ޚިދުމަތުގެ ފައުންޑޭޝަން އަޅާ ނިންމާފައިވަނީ ހަ މަސް ދުވަސް ތެރޭގައި ކަމަށާއި، ރައްޔިތުން އާރްޓީއެލް ފެރީގެ ޚިދުމަތް ބަލައިގަނެފައިވާ ކަމަށް އޭނާ ވިދާޅުވިއެވެ.
މޭޔަރު އާޒިމް ވިދާޅުވީ ރަނގަޅަށް ޚިދުމަތް ނުދެވުމުން ކުރީ ސަރުކާރު ކުށްވެރި ކުރި ނަމަވެސް މި ޚިދުމަތް މެއިންޓެއިން ކުރުމަކީ މިސަރުކާރުގެ ޒިންމާއެއް ކަމަށެވެ. ނަމަވެސް މެއިންޓެއިން ކުރުމަކީ ބޮޑު މަސައްކަތެއް ކަމަށާއި، މިމަސައްކަތް ކުރެވޭނީ ވަރަށް މުރާލި ވެގެން ކަމަށް އޭނާ ވިދާޅުވިއެވެ. އަދި ވިދާޅުވީ ކަންނެތް ސަރުކާރަކަށް މި ޚިދުމަތް ފުޅާކޮށް، މެއިންޓެއިން ނުކުރެވޭނެ ކަމަށެވެ.
މިހާރު އެވެގެން އުޅޭގޮތަކީ އެބޭފުޅުންނަށް އޭތި މެއިންޓެއިންއެއް ނުކުރެވޭ. މިހާރު މެއިންޓެއިން ކުރުމަކީ ވަރަށް ބޮޑު މަސައްކަތެއް. ވަރަށް މުރާލި މީހުންނަށް ވާ ކަމެއް. އެބޭފުޅުންގެ ކަންނެތްކަންމަތީގައި މިކަމެއް ނުވާނެ. އެހެންވީމަ ކަންނެއް މީހުންނަށްވާނެ ކަމެއް ނޫން މިއީ. އަޅުގަނޑުމެން ގަބޫލުކުރާ ގޮތުގައި މި މީހުންނަށް ހަމަ އޮންނާނީ އަބަދުވެސް ކުރީ ސަރުކާރޭ ކިޔާފައި ވާހަކަ ދެއްކުން އެމީހުންނަށް އެނޫން ކަމެއް ނޫނީ ނުކުރެވޭނެ. ގާބުރިވެސް ނުބޭއްވޭ މި ބުނަނީތާ.މާލެސިޓީގެ މޭޔަރު އާދަމް އާޒިމް
މޭޔަރު އާޒިމް ވިދާޅުވީ އެމްޑީޕީގެ ސަރުކާރުގައި އާރްޓީއެލް ފެރީގެ ޕްރޮޖެކްޓް އެންމެ ލަސްވެގެން 2025 ވަނަ އަހަރު އެއްކޮށް ނިންމުމަށް ކަނޑައަޅާފައިވާ ކަމަށެވެ. ނަމަވެސް މިސަރުކާރުން މި ޕްރޮޖެކްޓް ނިންމުމަށް ކަނޑައަޅާފައިވަނީ 2028 ނުވަތަ 2029 ކަމަށެވެ.
އާރްޓީއެލް ޚިދުމަތް ފުޅާކުރުމަށް އިންޑިއާއިން ރާއްޖެ އަށް 100 މިލިއަން ރުފިޔާގެ އެހީގައި މިއަށްވުރެ އަވަހަށް ނިންމުމަށް މަސައްކަތް ކުރާނެ ކަމަށް އުންމީދުކުރާ ކަމަށް މޭޔަރު އާޒިމް ވިދާޅުވިއެވެ.
މީގެ ކުރީގެ ސަރުކާރުގައި ވަރަށް ރަނގަޅަށް ދެމުންއައި އާރްޓީއެލް ފެރީގެ ޚިދުމަތަށް މިސަރުކާރުން ވަރަށް ބޮޑަށް އިހުމާލުވެފައިވާ ކަމަށް ބައެއް އާއްމު ރައްޔިތުން ދަނީ ބުނަމުންނެވެ. ދަތުރު ކަނޑައަޅާ ޝެޑިއުލްއާ އެއްގޮތަށް ދަތުރުނުކުރާ ކަމުގެ ޝަކުވާއާއި، ހުކުރު ދުވަހު ދަތުރުތައް މެދުކަނޑާލާފައިވާތީ އެކަމުގެ ކަންބޮޑުވުން ވެސް އާއްމު ރައްޔިތުން ކޮށްފައިވެއެވެ. އަދި ހުކުރު ދުވަހު ދަތުރުތައް ނެތުމަކީ ހަފްތާ ބަންދުގައި ރަށްރަށަށް ދަތުރުކުރަން ބޭނުންވާ މީހުންނަށް ލިބޭ ވަރަށް ބޮޑު ގެއްލުމެއް ކަމަށް އެމީހުން ބުނެއެވެ.
