މޯލްޑިވްސް ބްރޯޑްކާސްޓިންގ ކޮމިޝަނުގެ މުވައްޒަފުން ކޮމިޝަނުގެ މަސައްކަތް ހުއްޓާލާ ގެއަށްގޮސްފިއެވެ.

އެކޮމިޝަނުގެ އޮފީހަށް ހާޒިރުވި ގިނަ މުވައްޒަފުންތަކެއް މަސައްކަތް ހުއްޓާލާ ގެއަށް ގޮސްފައިވަނީ މިދިޔަ އާދިއްތަ ދުވަހު ކޮމިޝަނުގެ 18 މުވައްޒަފުން ލީ ޕެޓިޝަނާއި ގުޅިގެން ތަން ހިންގަން ހުރި އެންމެ އިސްވެރިޔާ ސަސްޕެންޑް ކޮށް ބަދަލު ހިފުމުގެ ރޫހެއްގައި މަސައްކަތް ކޮށްފައިވާތީއެވެ.

މުވައްޒަފުންނަށް އެސްޖީ ސަސްޕެންޑް ކުރިކަން އެނގުނީ މީޑިއާގެ ފަރާތުން ކަމަށާއި އަދި އެސްޖީ ސަސްޕެންޑް ކުރުމުގައި އެއްވެސް އިޖްރާތެއް ފުރިހަމަ ނުކޮށް އިދާރީ އޮނިގަނޑާއި ޚިލާފަށް މަސައްކަތް ކުރަމުންދާކަމަށް އެމުވައްޒަފުން ވަނީ ފާހަގަކޮށްފައެވެ.

ކޮމިޝަނުގެ މުވައްޒަފުން ފާހަގަކުރިގޮތުގައި މިދަނޑިވަޅުގައި ކޮމިޝަނުގެ ހިންގުން ހަވާލުވެހުރި އެންމެ އިސްވެރިޔާ ސަސްޕެންޑް ކުރުން މުވައްޒަފުންނަށް ސިފަވަނީ މުވައްޒަފުންނަށް ބިރުދެއްކުމަށް ކުރި އަމަލެއްގެ ގޮތުގައެވެ. އަދި އެ ކޮމިޝަނުގެ މަސައްކަތް ހުއްޓާލާ ގެއަށް ދިޔަ މައިގަނޑު ސަބަބަކީ އެއީކަންވެސް އެމުވައްޒަފުން ފާހަގަކުރެއެވެ.

މި މައްސަލައާ ގުޅިގެން ރާއްޖެއެމްވީން ކޮމިޝަންގެ މެންބަރެއްގެ އިންޓަވިޔުއެއް ނެގުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ. އެކޮމިޝަނަށް ރާއްޖެއެމްވީގެ ނޫސްވެރިން ދިޔަ ނަމަވެސް އެއްވެސް މެންބަރެއް ނުކުންނަވާފައެއްނުވެއެވެ. އަދި ރިސެޕްޝަންގައި އިން މުވައްޒަފު ބުނެފައިވަނީ މެންބަރުންގެ ބައްދަލުވުމެއް ކުރިއަށްދާ ކަމަށެވެ.

އޭގެ އިރުކޮޅެއްފަހުން ރާއްޖެއެމްވީން ބްރޯޑްކޮމްގެ ނައިބު ރައީސް ޝިފްލާ އިބްރާހިމް އަށް ހެނދުނުގެ ވަގުތު ގުޅާފައިވާތީ، އަނބުރާ ގުޅުއްވިއެވެ. ޓީވީއަށް އިންޓަވިއު ދެއްވުމަށް އެދުނު ނަމަވެސް އެކަމަށް ޝިފްލާ ވަނީ ދެކޮޅު ހައްދަވާ ފޯނު އިންޓަވިއު ދެއްވުމަށް އެއްބަސްވެފައެވެ. އަދި ފަހުން ފޯނު އިންޓަވިޔުއަކަށް ގުޅި ނަމަވެސް ފޯނު ނުނަންގަވައި ޝިފްލާ ވިދާޅުވީ ބައްދަލުވުމެއްގައި އިންނެވި ކަމަށެވެ.

މުވައްޒަފުންގެ ކަންބޮޑުވުންތައް ހިމެނޭ މި ޕެޓިޝަން ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށްވެސް ވަނީ ލާފައެވެ.