ދައުލަތަށް ހިދުމަތް ކުރުމުގެ އިނާމަށް 141 މީހުން ނަން ހުށަހަޅައިފި
ކޮމިޓީން މިއަދު ވަނީ އިންޓަރވިޔު ކުރައްވަން ފަށްޓަވާފައި
ގައުމީ އިނާމް
ދައުލަތަށް ކިދުމަތް ކުރުމުގެ އިނާމަށް 141 މީހުން ނަން ހުށަހަޅާފައިވާކަމަށް ގައުމީ އިނާމާއިބެހޭ ކޮމެޓީން މިއަދު ބުނެފިއެވެ.
އިނާމަށް ނަން ހުށަހެޅުމުގެ މުއްދަތު ހަމަވީ މިއަހަރުގެ މާރިޗު މަހުގެ 18 ވަނަ ދުވަހުއެވެ.
އެކޮމެޓީން ބުނީ، އިނާމަށް ހުށަހެޅުއްވި ބޭފުޅުން ހުށަހެޅުއްވި ވަޒީފާގެ ލިޔުންތައް ކޮމިޓީން މިހާރުވަނީ ބައްލަވައި، އޭގެތެރެއިން އިންޓަރވިޔުއަށް ޝަރުޠުހަމަވާ ބޭފުޅުން ކަނޑައަޅުއްވާފައިކަމަށެވެ. އަދި އެ ބޭފުޅުންނާ ކޮމިޓީން މިއަދު ވަނީ އިންޓަރވިޔު ކުރައްވަން ފަށްޓަވާފައިކަމަށް އެކޮމެޓިން ބުނެއެވެ.
ދައުލަތަށް ޚިދުމަތްކުރުމުގެ އިނާމަކި، ދިވެހި ދައުލަތަށް 35 އަހަރަށްވުރެ ދިގު މުއްދަތަކަށް ޚިދުމަތް ކުރައްވާފައިވާ މުވައްޒަފުންގެ ތެރެއިން، މަގާމުގެ މަސްއޫލިއްޔަތު އަދާކުރުމާއެކު، ޤާބިލްކަމާއި، އިޚްލާޞްތެރިކަމާ އެކުގައި ކޮށްފައިވާ ޚިދުމަތްތަކަށާއި، އެ މުއައްސަސާއަކަށް ކޮށްދީފައިވާ ޚިދުމަތްތަކުގެ އަގު ވަޒަންކުރުމުގެ ގޮތުން ޤައުމީ ފެންވަރުގައި ދައުލަތުން ރައީސުލްޖުމްހޫރިއްޔާ ދެއްވާ ޝަރަފުވެރި އިނާމެކެވެ.
ދައުލަތަށް ޚިދުމަތް ކުރުމުގެ އިނާމުގެ ގޮތުގައި ރައީސުލްޖުމްހޫރިއްޔާ ދެއްވަނީ އައްޑަނައަކާއި، ޝަރަފުގެ ބެޖަކާއި، ހަނދާނީ ލިޔުމެކެވެ. ދިވެހި ދައުލަތަށް ޚިދުމަތް ކުރުމުގެ އިނާމު ދެއްވުމުގެ ޖަލްސާ މިއަހަރު އޮންނާނީ މިނިވަން ދުވަހުގެ މުނާސަބަތާއި ގުޅުވައިގެންނެވެ.
ދިވެހި ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންގެ ޚިދުމަތުގެ އަގު ވަޒަން ކުރައްވައި 2024 ވަނަ އަހަރު 53 ބޭފުޅަކަށް ޝަރަފުގެ ބެޖާއި އައްޑަނަ ދެއްވާފައިވެއެވެ.
ދިވެހި ދައުލަތަށް ޚިދުމަތް ކުރުމުގެ އިނާމު ދެއްވާނެ ބޭފުޅުން ކަނަޑައެޅުއްވުމުގެ މަސައްކަތް ކުރެއްވާނީ ޤައުމީ އިނާމާބެހޭ ކޮމިޓީންނެވެ.
