ޔުކްރެއިން-ތުރުކީ-އެމެރިކާ އިސްތަންބޫލުގައި ބައްދަލު ކޮށްފި
ތުރުކީ ގައި ފުރަތަމަ ފަހަރަށް ޔޫކްރެއިން އާއި ރަޝިޔާ އިން ބާއްވާ ސީދާ ބައްދަލުވުމުން ހަނގުރާމަ ހުއްޓާލުމަށް ކަމެއް ނިންމިދާނެ ކަމަކަށް ނުބެލެވޭ.
ރަޝިޔާ އާއި ޔޫކްރެއިންގެ ސީދާ ވާހަކަތަކުގެ ކުރިން އެމެރިކާ އިން ތުރުކީ އާއި ޔޫކްރެއިން އާ އެކު މަޝްވަރާތައް ބޭއްވި ތުރުކީގެ ރިޔާސީ އޮފީހުގެ ދޮރުމަތީގައި ސަލާމަތީ ފަރާތްތަކުން ހަރަކާތްތެރިވަނީ -16 މެއި 2025
ރަޝިޔާ އާއި ޔޫކްރެއިން އާ ދެމެދު ތިން އަހަރު ފަހުން ބޭއްވޭ ފުރަތަމަ ސީދާ މަޝްވަރާތަކުގެ ކުރިން، ހުކުރު ދުވަހު ތުރުކީ އާއި ޔޫކްރެއިންގެ މަންދޫބުންނާ އެކު އިސްތަންބޫލުގައި އެއް ގަޑިއިރުގެ ބައްދަލުވުމެއް އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ ބާއްވަވައިފިއެވެ.
އިސްތަންބޫލްގެ ރިޔާސީ ރަސްމީ ގަނޑުވަރުގައި ބޭއްވުނު މި މަޝްވަރާތަކުގައި ތުރުކީގެ ފޮރިން މިނިސްޓަރ ހަކަން ފިދާން އާއި ޔޫކްރެއިންގެ ފޮރިން މިނިސްޓަރ އަންދްރީ ސައިބިގާ އަދި އެ ތިން ޤައުމުގެ އެހެނިހެން އިސް ފެންވަރުގެ އޮފިޝަލުން ބައިވެރިވެ ވަޑައިގަތެވެ.
ރަޝިޔާ އާއި ޔޫކްރެއިން އިން ތިން އަހަރު ފަހުން ފުރަތަމަ ސީދާ ސުލްހަ މަޝްވަރާތައް ބާއްވާނެ ކަމަށް އެ ދެ ޤައުމުން ބުނެފައިވީ ނަމަވެސް ތުރުކީގައި ބޭއްވޭ މި ބައްދަލުވުމުން ކުރިއެރުމެއް ލިބޭނެ ކަމުގެ އުންމީދު ކުޑަކަމަށް ރިޕޯޓްތައް ބުނެއެވެ.
ރަޝިޔާ، ޔޫކްރެއިން އަދި އެމެރިކާގެ އޮފިޝަލުން މި މަޝްވަރާތަކަށް ހުކުރު ދުވަހުގެ ހެނދުނު އިސްތަންބޫލަށް ވަނީ ވަޑައިގެންފައެވެ. މިއީ 2022 ވަނަ އަހަރުގެ ފެބްރުއަރީ މަހު ރަޝިޔާ އިން އެ ގައުމުގެ އަވައްޓެރި ޔޫކްރެއިން އަށް ހަމަލާދިން ފަހުން ބޭއްވޭ ފުރަތަމަ މަޝްވަރާތަކެވެ.
ނަމަވެސް، ތުރުކީގެ އޮފިޝަލުންވެސް ބައިވެރިވާ މި މަޝްވަރާތަކުން ހަނގުރާމަ ހުއްޓާލުމަށް ފާހަގަކުރެވޭ ކުރިއެރުމެއް ލިބޭނެ ކަމުގެ އުންމީދު ކުޑައެވެ. ބައްދަލުވުމާ މެދު ކުރެވުނު އުއްމީދު ކުޑަވީ، ރަޝިޔާގެ ރައީސް ވްލަޑިމިއަރ ޕުޓިން، ޔުކްރެއިންގެ ރައީސް ވޮލޮޑިމީރ ޒެލެންސްކީ ތުރުކީގައި ދެ ބޭފުޅުން ބައްދަލުކުރުމަށް ހުށަހެޅި ހުށަހެޅުން ޕުޓިން ބަލައިނުގަތުމުގެ ސަބަބުންނެވެ.
ޒެލެންސްކީ ވިދާޅުވީ އޭނާގެ ޑިފެންސް މިނިސްޓަރުގެ އިސްވެ ހުންނަވާ ގޮތައް ޓީމެއް މި މަޝްވަރާތަކަށް އިސްތަންބޫލަށް ފޮނުއްވާ ކަމަށެވެ. އެހެންނަމަވެސް، ރަޝިޔާގެ ވަފުދުގައި "އެއްވެސް ނިންމުމެއް ނިންމާނެ މީހަކު ނުހިމެނޭ" ކަމަށް ވިދާޅުވެ، މޮސްކޯއިން ހަނގުރާމަ ނިންމުމަށް މަސައްކަތް ނުކުރާ ކަމަށް ޒެލެންސްކީ ތުހުމަތު ކުރެއްވިއެވެ.
ޕުޓިން ވަޑައިނުގަތުމުން، އެމެރިކާ އިންނާއި ހުޅަނގު ޔޫރަޕްގެ ލީޑަރުން ފާއިތުވި މަސްތަކުގައި ކުރި މަސައްކަތުން ހަނގުރާމަ ހުއްޓުވުމަށް ކުރިއެރުމެއް ލިބޭނެ ކަމުގެ އުންމީދުތައް ފަނޑުވެފައެވެ. އަދި މީގެ ސަބަބުން ޔޫކްރެއިންގެ ބައެއް އެކުވެރިން ރަޝިޔާގެ މައްޗަށް އިތުރު ފިޔަވަޅުތައް އަޅަފާނެ ކަމުގެ ފުރުސަތު އޮތް ކަމަށް ބެލެވެއެވެ.
ޔޫކްރެއިންގެ ވަފުދުގެ އިސްކޮށް ހުންނަވާނީ ޑިފެންސް މިނިސްޓަރ ރުސްތަމް އުމެރޮވް ކަމަށާއި، މަޤްޞަދަކީ "މަދުވެގެން ހަނގުރާމަ ނިމުމަކަށް ގެނައުމަށް ފުރަތަމަ ފިޔަވަޅުތައް އެޅުމަށް މަސައްކަތް ކުރުން؛" ކަމަށް ޒެލެންސްކީ ވިދާޅުވިއެވެ.
ޒެލެންސްކީ އިތުރަށް ވިދާޅުވީ މަޝްވަރާތަކަށް އޭނާ ފޮނުއްވާ ވަފުދަށްވެސް އެއްވެސް ކަމެއް ނިންމުމުގެ އިޚްތިޔާރު ނޯންނާނެ ކަމަށާއި، އެހެން ކަމުން ކުރެވޭނީ ފަންނީ މަޝްވަރާތަކެއް ކަމަށް ދެކެވަޑައިގަންނަވާ ކަމަށެވެ.
ރަޝިޔާގެ ޓީމުގެ އިސްކޮށް ހުންނަވާނީ ރައީސްގެ މުޝީރު ވްލަޑިމިއަރ މެދިންސްކީ އެވެ. އޭނާއަކީ ކުރީގެ ކަލްޗަރ މިނިސްޓަރެވެ. އޭނާ ވިދާޅުވީ ކީވް އާއެކު ކުރެވޭ މަޝްވަރާތަކަކީ އޭނާ ދެކެވަޑައިގަންނަވާ ގޮތުގައި، 2022 ގައި ކުރެވުނު ނާކާމިޔާބު މަޝްވަރާތައް ކުރިއަށް ގެންދިއުން ފަދަ ކަމެއް" ކަމަށެވެ.
މެދިންސްކީ ޓެލެގްރާމްގައި ވިދާޅުވީ އޭނާގެ ޓީމުން ބުރާސްފަތި ދުވަހުގެ ރޭ ތުރުކީގެ ފޮރިން މިނިސްޓަރ ހަކަން ފިދާންއާއެކު "ބިނާކުރަނިވި" މަޝްވަރާތަކެއް ކުރިއަށް ގެންގޮސްފައިވާ ކަމަށާއި، ހުކުރު ދުވަހު ހެނދުނު ޔޫކްރެއިންގެ މަންދޫބުން އިސްތަންބޫލްގައި މަޝްވަރާތަކަށް ހާޒިރުވާނެ ކަމަށް އޭނާ އުންމީދުކުރައްވާ ކަމަށެވެ.
ޕުޓިންއާއި ޒެލެންސްކީ އިސްތަންބޫލްގައި ސީދާ ބައްދަލުކުރުމަށް އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ ބާރުއަޅުއްވާފައެވެ. ޕުޓިން މަޝްވަރާ ތަކަށް ވަޑައި ނުގަތުމުން ޓްރަމްޕްވެސް ވަނީ އެކަމަށް ފާޑުވިދާޅުވެފައެވެ.
މެދުއިރުމަތީގެ ދަތުރުފުޅުގެ ތިންވަނަ މަންޒިލް ކަމުގައިވާ ޔޫއޭއީ އަށް އެއަރ ފޯސް ވަންގައި ދަތުރު ކުރައްވަމުން ޓްރަމްޕް ނޫސްވެރިންނަށް ވިދާޅުވީ، ރަޝިޔާގެ ރައީސް ވްލަޑިމިއަރ ޕުޓިން އާއި އޭނާ އާ ބައްދަލުވުމެއް ނުބޭއްވޭހާ ހިނދަކު "އެއްވެސް ކަމެއް ނުހިނގާނެ،" ކަމަށެވެ.
