ފުޅާ ދާއިރާއެއްގައި ރާއްޖެއަށް ބިދޭސީން ގެނައުމުގެ ވިޔަފާރިކުރަމުންދިޔަ ބިދޭސީއެއްގެ ބޭންކް އެކައުންޓުން 8 މިލިއަނަށްވުރެ ގިނަ ރުފިޔާ ދައުރުކޮށްފައިވޭ: ފުލުހުން

ގާނޫނާއި ގަވާއިދާ ހިލާފަށް ބަންގަލަދޭޝްގެ ރައްޔިތަކު ރާއްޖެއަށް ބިދޭސީން ގެނައުމުގެ ވިޔަފާރިކޮށް ޖިނާއީ ކުށް ކޮށްގެން ފައިސާ ހޯދައި މަނީލޯންޑާރ ކޮށްފައިވާކަމަށް ތުހުމަތު ކުރެވޭ ބަނގަލދޭޝްގެ ރައްޔިތެއްކަމަށްވާ ޝަހާދަތް ހުސައިންގެ ބެންކް އެކައުންޓުތަކުން 8 މިލިއަނަށްވުރެ ގިނަ ދިވެހި ރުފިޔާ ޖަމާވެ އަދި ދައުރުކޮށްފައިވާކަމަށް ފުލުހުން ބުނެފިއެވެ.

ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި މިމައްސަލައިގެ މައުލޫމާތު ހިއްސާކުރެއްވި ޗީފް އިންސްޕެކްޓަރު އޮފް ޕޮލިސް އަހްމަދު އަޒްމަތު އަބްދުﷲ ވިދާޅުވީ މި މައްސަލައަކީ ފުލުހުންގެ އިންޓެލިގެންސް އަށް ލިބުނު މައުލޫމާތަކާއި ގުޅިގެން ފުލުހުން ތަހުގީގު ކޮށްފައިވާ މައްސަލައެއް ކަމަށެވެ. އެގޮތުން މި މައްސަލާގައި ތުހުމަތުކުރެވޭ ބަންގަލަދޭޝްގެ ރައްޔިތެއްކަމަށްވާ ޝަހާދަތު ހުސެއިން ވަނީ ކޯޓު އަމުރެއްގެ ދަށުން ހައްޔަރު ކޮށްފައިކަމަށާއި އޭނާ އަދިވެސް ހުރީ ފުލުހުންގެ ބެލުމުގެ ދަށުގައިކަމަށް އަޒްމަތު ވިދާޅުވިއެވެ.

Advertisement

އަޒްމަތު ވިދާޅުވީ މިމައްސަލާގައި ހައްޔަރު ކުރެވުނު ޝަހާދަތު ހުސައިން ދިރިއުޅޭ ގެ ބަލައި ފާސްކޮށް މޯބައިލް ފޯން އަދި އިލެކްޓްރޯނިކް ޑިވައިސްތަށް ފުލުހުންގެ ބެލުމުގެ ދަށަށް ގެނެވިފައިވާކަމަށެވެ. އަދި އެތަކެތިން މައްސަލައާއި ގުޅުންހުރި ހެކި ގަރީނާ ހޯދިފައިވާކަމަށާއި ޝަހާދަތު ހުސައިންގެ މައްސަލަ ތަހުގީގުގެ މަރުހަލާ ނިންމައި ދައުވާ ކުރުމަށް ޕީޖީ އޮފީހަށް ފޮނުވާފައިވާކަމަށް އަޒްމަތު ވިދާޅުވިއެވެ.

ޝަހާދަތު ހުސައިން އަކީ 2014 ވަނަ އަހަރުން ފެށިގެން ޖުމްލަ 4 ވޯކްޕާމިތެއްގައި ރާއްޖޭގައި އުޅެފައިވާ މީހެއް ކަމަށައި އަދި 2019 ވަނަ އަހަރު ޝަހާދަތު ހުސައިންގެ ނަންމަތީ ބޭންކް އޮފް މޯލްޑިވެސްގެ ޖުމްލަ 6 އެކައުންޓް ހުޅުވާފައިވާކަމަށް އަޒްމަތު ވިދާޅުވިއެވެ. އެގޮތުން ދިވެހި ރުފިޔާގެ 3 އެކައުންތާއި ޔޫއެސް ޑޮލަރުގެ 3 އެކައުންޓް ހުޅުވާފައިވެއެވެ.

ޝަހާދަތު ހުސައިން އެންމެ ފަހުން ވޯކްޕާމިޓް ބަދަލުކޮށްފައިވާ ކުންފުނީގެ ވަޒީފާއަކީ އޮފިސް ބޯއީއެއްކަމަށް ވީނަމަވެސް މީނާގެ ވަޒީފާ ހަމަޖެހުނު ލެޓާ އޮފް އެޕޮއިންޓްމަންޓްގެ ލިއުމުގައިވަނީ މުސާރަ 3000 ޑޮލަރުކަމަށް އަދި އެކްސްޕަޓް ސިސްޓަމްގައި ޖަހާފައިވަނީ އޮފިސް ކްލީނާރް ކަމަށާއި މުސާރައަކީ ހަމަ 3000 ޑޮލަރުކަމަށް

ޗީފް އިންސްޕެކްޓަރު އޮފް ޕޮލިސް އަހްމަދު އަޒްމަތު އަބްދުﷲ

މީގެ އިތުރުން އޭނާ މާލޭގައި ދިރިއުޅެފައިވަނީ 18،000 ރުފިޔާއަށްދޭ ދެކޮޓަރީގެ އެޕާޓްމެންޓެއް ކުއްޔަށް ނަގައިގެންކަމަށް ފުލުހުންގެ ތަހުގީގަށް އެނގިފައިވާކަމަށް އަޒްމަތު ވިދާޅުވިއެވެ.

ޝަހާދަތު ހުސައިންގެ މޯބައިލް ފޯނާއި ލެޕްޓޮޕް އިން ފެނިފައިވަނީ:

• އެކި ކުންފުނިތަކުގެ ރަޖިސްޓްރީ
• ލޯގޯ
• ސްޓޭމްޕް
• ބިދޭސީންނާއި ދިވެހިން ހިމެނޭގޮތަށް އެކި މީހުންގެ ސޮއި
• ވޯކްޕާމިޓް ކޯޓާ ނެގުމަށް ބޭނުންވާ ޑޮކިއުމަންޓްސް
• ބިދޭސީންގެ ޕާސްޕޯޓު ކޮޕީ
• ދިވެހިންގެ އައީޑި ކަޑު ފޮޓޯ

މީގެ އިތުރުން ވޯކްޕާމިޓް ސައިޓްތަކަށް ވަދެފައިވާކަމުގެ ވެބް ހިސްޓްރީ ފެނިފައިވާކަމަށެވެ. އަދި އޭނާގެ މޯބައިލް ފޯނު ، ލެޕްޓޮޕުން ފެނިފައިވާ އެކްސްޕަޓް ސިސްޓަމަށް ލޮގިން ކުރުމަށް ބޭނުންކުރާ މައުލޫމާތަށް ބަލާއިރު:

• އަމިއްލަ ފަރުދުންގެ ވިޔަފާރިތަކުގެ ނަމުގައި 153 އެކައުންޓް -އަޑި ޕާސްވޯޑާއިއެކު
• ފޮރިންކޮމްޕެނީތަކުގެ ނަމުގައި 7 އެކައުންޓް – އައީޑީ ޕާސްވޯޑާއިއެކު
• ޕްރައިވެޓް ލިމިޓެޑް ކޮމެޕެނީ ތަކުގެ ނަމުގައި 283އެކައުންޓް – އައިޑީ ޕާސްވޯޑާއިއެކު
• އެކިއެކި އަމިއްލަ ފަރާތްތަކުގެ ނަމުގައި 126 އެކައުންޓް – އައިޑީ ޕާސްވޯޑާއިއެކު
• ޕާޓްނާޝިޕް ތަކުގެ ނަމުގައި އެކްސްޕަޓް ސިސްޓަމްގައި ރިލޭޝަން ގާއިމުކޮށްފައިވާ 5 އެކައުންޓް – އައިޑި ޕާސްވޯޑާއިއެކު

ޝަހާދަތު ހުސައިންގެ މިމަސައްކަތުގެ ފަހަތުގައި މޯލްޑިވްސް އިމިގެރޭޝަންގެ ބަޔަކާއި އާންމު ދިވެހި އެތަށް ބަޔަކު ވާކަމަށް ތަހުގީގަށް އެނގިފައިވާކަމަށް އަޒްމަތު ވިދާޅުވިއެވެ. އަދި ކުންފުނިތަކުގެ ނަމުގައި ކޯޓާ ނަގައި ބިދޭސީން ގެނެސް އެބިދޭސީންނަށް ވަޒީފާ ނުދީ މާލެތެރެއަށް ދޫކޮށް އޯޕަން ކޯޓާގެ ނަމުގައި މާލީ މަންފާ ހޯދާފައިވާކަމް އަޒްމަތު ފާހަގަކުރެއްވިއެވެ.

ޝަހާދަތު ހުސައިންގެ މޯބައިލް ފޯނުން ސައްހަނޫން ވޯކްޕާމިޓާއި ގުޅޭ ލިޔެކިއުންތަށް ހެދުމަށްފަހު ބިދޭސީންނަށް ފޮނުވާ ބަންގަލަދޭޝްގައި ހުޅުވާފައިވާ އެކައުންޓަކަށް ފައިސާ ޖަމާކުރުވާކަން އެނގިފައިވާކަމަށް އަޒްމަތުވިދާޅުވިއެވެ.