އިދިކޮޅު މެމްބަރުންގެ ކަންބޮޑުވުންތަކަށް ބެލުމެއް ނެތި ލާމަރުކަޒީ ގާނޫނަށް އިސްލާހު ގެނައުމުގެ ބިލް ދިރާސާކުރުމަށް ލާމަރުކަޒީ ކޮމިޓީ އަށް ފޮނުވައިފިއެވެ.

މި ބިލު ބަލައިގަނެ ލާމަރުކަޒީ ކޮމިޓީ އަށް ދިރާސާކުރުމަށް ފޮނުވާފައި ވަނީ 20 ވަނަ މަޖިލީހުގައި އޮތް ސަރުކާރުގެ މެޖޯރިޓީގެ ބޭނުންކޮށްގެންނެވެ. އެ ބިލު ބަލައިގަތުމަށް ފެންނަ ކަމަށް 58 މެމްބަރުން ވޯޓު ދެއްވި އިރު ބިލު ބަލައިގަންނަން ނުފެންނަކަމަށް 9 މެމްބަރުން ވޯޓުދެއްވިއެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ހުށަހެޅުއްވީ ހޯރަފުށި ދާއިރާގެ ޕީއެންސީގެ މެންބަރު އަލީ މޫސާއެވެ. އޭނާ ހުށަހަޅުއްވާފައި ވަނީ 15، 29، 45 ގެ އިތުރުން 56-6 ވަނަ ނަންބަރަށް ބަދަލު ގެނައުމަށެވެ.

މި ބިލު އޮތް ގޮތަށް ބަލާއިރު، ކައުންސިލަރުންނާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ (ޑަބްލިއުޑީސީ)ގެ މެންބަރުންގެ ދައުރުގައި ބާކީ 548 ދުވަސް އޮންނަ ހާލަތުގައި ބައި-އިލެކްޝަން ބާއްވަން ނުޖެހޭ ގޮތަށް ވަނީ އިސްލާހެއް ހުށަހަޅާފައެވެ. އަދި އެކަމާއި މެދު އިދިކޮޅު މެމްބަރުން ވަނީ ބިލުގެ އިބްތިދާއީ ބަހުސްގެ މަރުހަލާގައި ވަރަށް ބޮޑަށް ކަންބޮޑުވުން ފާޅުކޮށްފައެވެ.

އިންތިހާބުތައް ނުބާއްވަން ސަރުކާރުން ކުރާ މަސައްކަތަކީ ހަމައެކަނި ޚަރަދު ކުޑަކުރުމުގެ ވިސްނުމުގައި ކުރާ ކަމެއް ކަމަށް އިދިކޮޅު އެމްޑީޕީގެ މެމްބަރުން ވަނީ ފާހަގަކޮށްފައެވެ. އަދި ކައުންސިލް ގޮނޑި ހުސްކޮށް އޮތުމަކިީ ބަލައިގަނެވޭ ކަމެއް ނޫން ކަމަށް ވެސް މެމްބަރުން ފާހަގަކުރިއެވެ. ނަމަވެސް ސަރުކާރު ހިންގާ ޕީއެންސީ އަށް ނިސްބަތްވާ މެމްބަރުން ވަނީ އެ ބިލު މިހާރު އޮތް ގޮތަށް ފާސްކުރުމަށް ވަކާލާތުކުރައްވާފައެވެ. ނަމަވެސް ބައެއް މެމްބަރުން ވަނީ ކޮމިޓީ މަރުހަލާގައި ބިލު ފުޅާކޮށް ދިރާސާކުރުން މުހިންމު ކަމަށް ވެސް ވިދާޅުވެފައެވެ.

މިހާރު ޤާނޫނު އޮތް ގޮތުން ނަމަ ގާނޫނުގައި ކައުންސިލަރެއްގެ މަޤާމް ހުސްވާ އިރު، ކައުންސިލް އުމުރުގެ ބާކީ 365 ދުވަހަށްވުރެ ކުރު ނޫން ނަމަ ބައި-އިލެކްޝަން ބާއްވަން ޖެހެ އެވެ.