ކުރީ ސަރުކާރުގައި މަކުނުދޫގައި އެއަރޕޯޓު އެޅުމަށް ނިންމައި، ބިންހިއްކި ނަމަވެސް މިސަރުކާރުން އަދިވެސް ކުރަމުންދަނީ މަޝްވަރާ
12 މެއި 2025 | ހޯމަ 08:22އެއަރޕޯޓުގެ އެޅުމުގެ މަސައްކަތް ކުރިއަށް ގެންދިއުމުގައި ދެވިސްނުމެއް އެބައޮތް
ރައްޔިތުން މަޖިލީހުގައި ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވާހަކަދައްކަވަނީ
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ހދ.މަކުނުދޫގައި އެއަރޕޯޓު އެޅުމަށް ނިންމައި، ބިންހިއްކި ނަމަވެސް މިމަޝްރޫއު ކުރިއަށް ގެންދިއުމުގައި އަދިވެސް މަޝްވަރާކުރަމުންދާކަން ހާމަވެއްޖެއެވެ.
ހޯމަ ދުވަހު ރައްޔިތުންގެ މަޖިލީހުގައި މަކުނުދޫ ދާއިރާގެ މެންބަރު އާދަމް ޝަފީގު ވަނީ މަކުނުދޫ އެއަރޕޯޓު އެޅުމަށްޓަކައި ހިއްކާފައިވާ ބިން ޝޯ ޕްރޮޓެކްޝަން ނިންމާލެވޭނެ ތަރީހާ ގުޅޭގޮތުން ސުވާލު ކުރައްވާފައެވެ. އަދި ރަންވޭގެ މަސައްކަތް ފެށިގެންދާނީ ކިހައިތާކުތޯ ސުވާލު ކުރެއްވިއެވެ.
މި ސުވާލުތަކަށް މިނިސްޓަރު މުއްތަލިބު ވިދާޅުވީ އެއަރޕޯޓު އެޅުމަށް ހިއްކި ބިމުގެ ސަރަހައްދުގެ ޝޯ ޕްރޮޓެކްޝަންގެ މަސައްކަތް ކުރިއަށްދާ ކަމަށެވެ.
އެއަރޕޯޓުގެ އެޅުމުގެ މަސައްކަތް ކުރިއަށް ގެންދިއުމުގައި ދެވިސްނުމެއް އޮތްކަން ފާހަގަކުރައްވައި މިނިސްޓަރު މުއްތަލިބު ވިދާޅުވީ މިމަޝްރޫއު ކުރިއަށް ގެންދިއުމަށް ކުންފުންޏެއް ނުލިބިއްޖެނަމަ މިއަހަރުގެ ތެރޭގައި އެމްޓީސީސީއާ ހަވާލުކޮށްގެން ކުރިއަށް ގެންދާނެ ކަމަށެވެ.
އަޅުގަނޑުމެން މިއަހަރުގެ ތެރޭގައި އިރާދަކުރެއްވިއްޔާ އެ ކޮންޓްރެކްޓަރ ފައިނޭންސްގެ އުސޫލުން ނޫނީ އެހެން ގޮތަކަށް ވެސް މަކުނުދޫ އެއާޕޯޓުގެ މަސައްކަތް ރަންވޭ މަސައްކަތް ކުރާނެ ފަރާތެއް ނުލިބިއްޖެ ކަމަށްވަންޏާ އެމްޓީސީސީއާ ހަވާލުކޮށްގެން ނަމަވެސް ޕްރޮޖެކްޓް ކުރިއަށް ގެންދާނަން. އަޅުގަނޑުމެން ދެ ގޮތަކަށް މި މަސައްކަތް ކުރަނީ. އެއްގޮތަކީ އަޅުގަނޑުމެން ކޮންޓްރެކްޓަރ ފައިނޭންސްގެ އުސޫލުން ޕާޓީއަށް އައިސްގެން މަސައްކަތް ކުރުން. އެކަން ނުކުރެވޭ ކަމަށްވަންޏާ އިރާކުރެއްވިއްޔާ މިއަހަރުގެ ތެރޭގައި އަޅުގަނޑުމެން ރަންވޭއާ ޓާމިނަލްގެ މަސައްކަތް ކުރުމަށްޓަކައި އެމްޓީސީސީއާ ހަވާލުކުރާނެ ވާހަކަ ދަންނަވަން.ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި މަކުނުދޫގައި އެއަރޕޯޓު އެޅުމަށް ނިންމައި، އެއަރޕޯޓަށް ބޭނުންވާ 43.12 ހެކްޓަރުގެ ބިން ވަނީ ހިއްކާފައެވެ. އަދި 3493 މީޓަރުގެ ސަރަހައްދެއްގައި ރިވެޓްމެންޓް ޖަހާފައިވެއެވެ.
އެއަރޕޯޓް އެޅުމަށް ހިނގާނެ ހަރަދުގެ ގޮތުގައި މަކުނުދޫ އެއަރޕޯޓަށް ސަރުކާރުން އަންދާޒާ ކޮށްފައިވަނީ 23,300,000 ޑޮލަރެވެ.
