ޣައްޒާ އަށް އެހީ ފޯރު ކޮށްދިނުމަށް ޓްރަމްޕްގެ ޕްލޭން އިސްރާއީލް އިން ޤަބޫލު ކޮށްފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން، ޣައްޒާ އަށް ބޭނުންވާ އެހީ ފޯރުކޮށްދިނުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި ހުށަހެޅުން އިސްރާއީލް އިން ޤަބޫލު ކޮށްފި އެވެ.

އިސްރާއީލްގެ ޚާރިޖީ ވަޒީރު ގިޑިއަން ސާރް އާދީއްތަ ދުވަހު ވިދާޅުވީ، ޣައްޒާ އަށް އެހީ ފޯރުކޮށްދިނުމަށް އެމެރިކާގެ ރައީސްގެ ޚާއްސަ މަންދޫބު ހުށަހަޅާފައިވާ ހުށަހެޅުން އެ ޤައުމުން ޤަބޫލު ކޮށްފައިވާ ކަމަށެވެ. 

އިސްރާއީލް އިން ވަނީ މިއަހަރުގެ މާޗު މަހުގެ ކުރީ ކޮޅުން ފެށިގެން، ޣައްޒާ އަށް އެހީ ވެއްދުމަށް ހުރަސް އަޅައިފަ އެވެ. 

އެގޮތުން ޣައްޒާ އަށް ބޭނުންވާ ކާބޯ ތަކެއްޗާއި، ސާފު ފެނާއި، ތެޔޮ އަދި ބޭސްފަރުވާ އަށް ބޭނުންވާ އެންމެހާ ސާމާނު ވެއްދުމަށް އިސްރާއީލް އިން ދަތި ކޮށްފައިވާ ކަމަށް، އެހީ ފޯރުކޮށްދޭ ޖަމާއަތްތަކުން ވަނީ ބުނެފަ އެވެ. 

ޖަރުމަނުގެ ޚާރިޖީ ވަޒީރު ޖޮހާން ވަޑެފުލްއާ އެކު ޖެރޫސަލަމްގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ސާރް ވިދާޅުވީ، އެމެރިކާގެ އެމްބެސެޑަރު މައިކް ހަކަބީ މިދިޔަ ހުކުރު ދުވަހު ހުށަހަޅާފައިވާ ހުށަހެޅުމަށް އެ ޤައުމުން ތާއީދު ކުރައްވާ ކަމަށެވެ. 

ސާރް ވިދާޅުވީ އެ ޕްލޭންގެ ދަށުން ސީދާ އާންމު ރައްޔިތުންނަށް އެހީ ފޯރުކޮށްދެވޭނެ ކަމަށާއި، އެހީގެ ސާމާނު ވަގަށް ނަަގައި، ހަމާސް އަށް އެތަކެތި އެ މީހުންގެ ހަނގުރާމައިގެ ބޭނުމަށް ބޭނުން ކުރުމުގެ ފުރުސަތު ވެސް ނުލިބޭނެ ކަމަށެވެ. 

އެމެރިކާ އިން ހުށަހަޅާފައިވާ މި ޕްލޭނަށް ހަމާސްގެ އިސް އޮފިޝަލެއް ކަމަށްވާ، ބައްސާމް ނައީމް ވަނީ ފާޑު ވިދާޅުވެފައެވެ. 

އޭނާ ވިދާޅުވީ އެ ޕްލޭންގެ ދަށުން މިލިޓަރީ ބާރުތަކެއް ހިނގުމުގެ ފުރުސަތު އޮތް ކަމަށާއި، އެއީ އަނެއްކާ ވެސް ނުރައްކާތެރި ކަމަކަށް ވާނެ ކަމަށެވެ. އަދި އެމެރިކާ އިން ބޭނުން ވަނީ ޓްރަމްޕް ގަލްފުގެ ޤައުމުތަކަށް ކުރައްވާ ދަތުރުފުޅާ ދިމާކޮށް، މަންޒަރު ރީތި ކުރަން ކަމަށް ވެސް އޭނާ ވަނީ ތުހުމަތު ކޮށްފަ އެވެ. 

ޣައްޒާ އަށް ފޯރުކޮށްދެމުން އަންނަ އެހީގެ ސާމާނު ވެއްދުމަށް އިސްރާއީލް އިން ހުރަސް އަޅާފައި ވުމުގެ ސަބަބުން، ޣައްޒާގައި އިންސާނީ ބޮޑު ކާރިސާއެއް ކުރިމަތިވެދާނެ ކަމުގެ އިންޒާރު ވެސް ވަނީ ދީފަ އެވެ. 

އެހެންކަަމުން ޣައްޒާ އަށް ބޭނުންވާ އެހީ ވީ އެންމެ އަވަހަކަށް ވެއްދޭނެ އިންތިޒާމު ހަމަޖައްސައި ދިނުމަށް ވެސް ބައިނަލްއަޤުވާމީ ޖަމިއްޔާ ޖަމާއަތްތަކުން އަންނަނީ ގޮވާލަމުންނެވެ.