ޝަރުތެއް ނެތި، ޔުކްރެއިންގެ ހަނގުރާާމަ ހުއްޓާލަން ގޮވާލައްވައިފި

ރަޝިޔާ އިން ޔުކްރެއިންގައި ހިންގަމުން އަންނަ ހަނގުރާމަ، އެއްވެސް ޝަރުތަކާ ނުލައި ހުއްޓާލަން ޔޫރަޕިއަން ކޮމިޝަންގެ ރައީސް އުރުސުލާ ވޮން ޑެރ ލެޔެން ގޮވާލައްވައިފި އެވެ.

އުރުސުލާ ވިދާޅުވީ އެއްވެސް ޝަރުތު ކުރުމެެއް ނެތި، ހަނގުރާމަ ހުއްޓާލުމަަށް ރަޝިޔާ އިން އެއްބަސްވާން ޖެހޭނެ ކަމަށެވެ. އަދި ރަޝިޔާ އިން އެކަމާ ދެކޮޅު ހަދަައި، އެކަމާ ޚިލާފުވެއްޖެ ނަމަ، އެ ޤައުމާ ދެކޮޅަށް އިތުރު ފިޔަވަޅުތަކެއް ވެސް އަޅުއްވާނެ ކަމަށް އޭނާ ވަނީ ވިދާޅުވެފަ އެވެ.

އެކްސްގައި ކުރެއްވި ޕޯސްޓެއްގައި އުރުސުލާ ވިދާޅުވީ ރަޝިޔާ އިން ޔުކްރެއިން ގައި ހިންގަމުން އަންނަ ހަނގުރާމަ 30 ދުވަހުގެ މުއްދަތަކަށް ހުއްޓާލުމަށް ތާއީދު ކުރައްވާ ކަމަށެވެ. އަދި އެއީ މާނަވީ ސުލްހަވެރިކަމެއް ޤާއިމު ކުރުމަށް އެޅޭނެ އެންމެ ފުރަތަމަ ފިޔަވަޅު ކަމަށް ވެސް ވަނީ ވިދާޅުވެފަ އެވެ.

އުރުސުލާ މިހެން ވިދާޅުވެފައި މި ވަނީ ފްރާންސް، ޖަރުމަނު، އިނގިރޭސިވިލާތް އަދި ޕޮލެންޑުގެ ލީޑަރުން ޔުކްރެއިންގެ ވެރި ރަށް ކީވް އަށް ވަޑައިގެން އުޅުއްވާ ދަނޑިވަޅެއްގަ އެވެ. 

ހަތަރު ޤައުމުގެ ލީޑަރުންގެ މި ޒިޔާރަތުގެ އެންމެ ބޮޑު މަޤުސަދަކީ ޔުކްރެއިން އަށް އެއްބާރުލުން ދިނުމާއި، ހަނގުރާމަ ނިންމުމަށް މަޝްވަރާ ކުރުމުގެ އިތުރުން، ހަނގުރާމަ ނިންމުމަށް ރަޝިޔާ އަށް ބާރު އެޅުމެވެ. 

އެހެން ނަމަވެސް، ހަނގުރާމަ ހުއްޓާލުމަށް ރަޝިޔާ އިން ވަނީ ޝަރުތުތަކެއް ކަނޑައަޅައި، އެކަން އަންގައިފަ އެވެ. އެގޮތުން ޤައުމު ތަކުން ޔުކްރެއިން އަށް ހަތިޔާރު ފޯރުކޮށްދިނުން ހުއްޓާލުމަށް ރަޝިޔާ އިން ވަނީ ޝަރުތު ކޮށްފަ އެވެ. 

އެކަމާ ގުޅޭ ގޮތުން އިތުރަށް އުރުސުލާ ވިދާޅުވީ، އެ މައްްސަލައިގައި މިހާރު ވެސް ބޯޅަ އޮތީ ރަޝިޔާގެ ކޮޅުގައި ކަަމަށާއި، ހަނގުރާމަ ހުއްޓާލުމުގެ އެއްބަސްވުމާ ޚިލާފުވެއްޖެ ނަމަ، އިތުރު ދަތި ކުރުންތަކާ ރަޝިޔާ އިން ކުރިމަތިލާން ޖެހޭނެ ކަމަށެވެ. 

މީގެ އިތުރުން ޔުކްރެއިންގެ ދެމެހެއްޓެނިވި ސުލްހަ އަކީ މުޅި ޔޫރަޕުގެ ސަލާމަތާއި، ރައްކާތެރި ކަމަށް ވަރަށް މުހިންމު ކަމެއްގެ ގޮތުގައި ވެސް އުރުސުލާ ވަނީ ފާހަގަ ކުރައްވައިފަ އެވެ. 

ރަޝިޔާ އިން ޔުކްރެއިންގައި ހިންގަމުން އަންނަ ހަނގުރާމަ ހުއްޓާލުމަށް، އެމެރިކާގެ ރައީސް ޑޮނަލްޑް ޓްރަމްޕް ވެސް ގެންދަވަނީ ވަރަށް ބޮޑަށް މަސައްކަތް ކުރައްވަމުންނެވެ.