މާފަންނު މަދަރުސާގައި ކުޑަކުދިންގެ ދުވަސް ވަރަށް ކުލަގަދަކޮށް ފާހަގަކޮށްފި
400 އެއްހާ ތުއްތު ކުދިން ކިޔަވަމުން އަންނަ މާފަންނު މަދަރުސާގައި ކުޑަކުދިންގެ ދުވަސް ފާހަގަ ކުރީ ވަރަށް ކުލަގަދަކޮށް
މާފަންނު މަދަރުސާގައި ކުދަކުދިންގެ ދުވަސް ފާހަގަކުރުން
ކުޑަކުދިންގެ ދުވަހަކީ ރާއްޖޭގެ އެކި ކަންކޮޅުތަކުގައި ކުލަގަދަ ގޮތެއްގައި ފާހަގަކުރަމުން އަންނަ ދުވަހެކެވެ. މި ދުވަހާ ގުޅުވައިގެން އެކި ސުކޫލްތަކުގައި ތަފާތު ހަރަކާތްތައް ކޮންމެ އަހަރަކުވެސް ހިންގައެވެ. އެގޮތުން މި އަހަރުވެސް މާލޭގެ އެކި ސުކޫލްތަކުގައި ކުޑަކުދިންގެ ދުވަސް ވަނީ ކުލަގަދަކޮށް ފާހަގަކޮށްފައެވެ.
ޕްރީ ސްކޫލުތަކާއި ޕްރައިމަރީ ސްކޫލުތަކުގެ އިތުރުން ސެކަންޑްރީ ސުކޫލްތަކުގައިވެސް ވަނީ މި ދުވަސް ތަފާތު ގޮތަކަށް ފާހަގަކޮށްފައެވެ. ގިނަ ސުކޫލްތަކުން އެކި ތީމްތަކުގެ މައްޗަށް ބިނާކޮށް ކުޑަކުދިންގެ ދުވަސް އެކި ހަރަކާތްތަކާ އެކީ ވަނީ ކުރިއަށް ގެންގޮސްފައެވެ.
އެގޮތުން 400 އެއްހާ ތުއްތު ކުޑަކުދިން ކިޔަވަމުން އަންނަ މާފަންނު މަދަރުސާގައި ވެސް ވަނީ މި ދުވަސް ވަރަށް ކުލަގަދަކޮށް ފާހަގަކޮށްފައެވެ. މާފަންނު މަދަރުސާގައި އެންމެ އިސްކަމެއް ދިނީ ވެސް އެ ސްކޫލަށް ކިޔަވަން އަންނަ ތުއްތު ކުދިންނަށް ހިތްހަމަ ޖެހުމާއި އެކު ތައުލީމު އުނގެނުމަށް ރަނގަޅު ތަނަވަސް މާހައުލެއް ތަނަވަސް ކޮށްދިނުމެވެ.
ހުރިހާ ކުދިންނަށް ވެސް ހަމަކަމާއި އެކު ފުރުސަތުތައް ހޯދައިދީގެން ކޮންމެ ކުއްޖަކީވެސް މުހިންމު ކުއްޖެއްކަމުގައި ދެކިގެން އެ ސްކޫލުން ގިނަ ހަރަކާތްތަކެއް އަބަދުވެސް ހިންގައެވެ. އެގޮތުން މާފަންނު މަދަރުސާގެ ގޯތިތެރޭގައި ތަފާތު އެކި ޑިޒައިންތަކަށް ކުލާސްރޫމުތައް ވެސް ހެދިފައިވާއިރު، އެތަނުގައި ކުދިންނާއި ގުޅޭ އެކިއެކި މަޖާ، ކުދިންގެ ވިސްނުން ތޫނުފިލިކުރުމަށް ބޭނުން ކުރާ ގިނަ ތަކެތި ހުރެއެވެ.
މިއަހަރަުގެ ކުޑަކުދިންގެ ދުވަސް އެ ސްކޫލުގައި ފާހަކޮށްފައި ވަނީ ތަފާތު ތީމެއްގައެވެ. އެއީ "ބީޗް ތީމް" އަށެވެ. މިއީ ކުޑަކުދިންނަށް މި ދުވަހު ފެންކުޅި ކުޅެލައި، ބައުންސިންގ ކާސަލްއަސް އަރައި، ފްރީކޮށް ކުދިން ކުޅެލުމަށެވެ. މީގެ އިތުރުން ކުޑަކުދިންގެ ދުވަހު އެ ސްކޫލުން ވަނީ އައިސް ކްރީމް، ޕޮޕް ކޯން ޔޯގަޓް ކަހަލަ ތަފާތު ކެއުމަށް ބޭނުންކުރާ ތަކެތި ވެސް ކުދިންނަށް ލިބޭ ގޮތަށް ހަދާފައެވެ.
މިއަދު މާފަންނު މަދަރުސާގައި ފާހަގަކުރި ކުޑަކުދިންގެ ދުވަސް ފާހަގަވެގެން ދިއައީ އެ ސްކޫލުގެ ހުރިހާ ކުދިންނަށް ވެސް އުފާވެރި ވަރަށް ހިތްހަމަ ޖެހުން ގެނުވި ދުވަހަކަށެވެ. ހުރިހާ ކުދިންގެ މޫނުމަތިންވެސް ފެނުނީ އުފާވެރިކަމާއި އުޖާލާކަމެވެ.
