އެމެރިކާގެ ޑިފެންސް ސެކްރެޓަރީ ޕީޓް ހެގްސެތު އިސްރާއީލަށް ކުރައްވަން ހަމަޖެހިފައި އޮތް ދަތުރުފުޅު ކެންސަލް ކުރައްވައިފި އެވެ.

އިސްރާއީލްގެ މީޑިއާ ތަކުން ހުކުރު ދުވަހު ބުނެފައިވާ ގޮތުގައި، އެމެރިކާގެ ރައީސް ޑޮނަލްޑް ޓްރަމްޕް ކުރިއަށް އޮތް ހަފުތާގެ ތެރޭގައި ގަލްފަށް ކުރައްވާ ދަތުރުފުޅުގެ ކުރިން، ހެގްސެތު އިސްރާއީލަށް ވަޑައިގަންނަވާ ގޮތަށް ހަމަޖެހިފައި އޮތް ކަމަށެވެ. 

އެހެން ނަމަވެސް، އިތުރު އެއްވެސް ތަފުސީލެއް ދިނުމެއް ނެތި އެ ދަތުރުފުޅު ކެންސަލް ކުރައްވާފައިވާ ކަމަށް އިސްރާއީލްގެ މީޑިއާ ތަކުގައި ވަނީ ބުނެފަ އެވެ. މި ދަތުރުފުޅާ ގުޅޭ ގޮތުން އެމެރިކާގެ ޕެންޓަގަން އިން ރަސްމީކޮށް އެއްވެސް އެއްޗެެއް ހާމަކޮށްފައި ނުވެ އެވެ.  

އެހެން ނަމަވެސް، އެމެރިކާގެ ރިޔާސީ ދެ ވަނަ ދައުރަކަށް ވަޑައިގެންނެވި ފަހުން ޓްރަމްޕް ކުރައްވާ ފުރަތަމަ ދަތުރުފުޅުގައި ހެގްސެތު ބައިވެރިވެ ވަޑައިގަންނަވާނެ ކަމަށް ވަނީ ރިޕޯޓުކޮށްފަ އެވެ. މި ދަތުރުފުޅުގައި ސައުދީ އަރަބިއްޔާ، ޤަތަރު އަދި ޔުނައިޓެޑޫ ޢަރަބް އެމިރޭޓްްސް އަށް ވެސް ޓްރަމްޕް ވަޑައިގަންނަވާނެ އެވެ. 

އެމެރިކާގެ ދިފާއީ އިސް އޮފިޝަަަލަކު ވިދާޅުވެފައިވާ ގޮތުގައި، އެމެރިކާގެ ސްޓޭޓް ސެކެރެޓަރީ މާކޯ ރޫބިއޯ އަދި ހެގްސެތު މެދު އިރުމަތީގައި އެއް ވަގުތެއްގައި ތިއްބަވާތީ، އެ ދެ ބޭފުޅުންގެ ދަތުރުފުޅު ވެސް ރައީސް ޓްރަމްޕްގެ ދަތުރުފުޅާ އެއްކޮށް ކުރައްވާ ގޮތަށް ހަމަޖެއްސީ ކަމަށެވެ. 

މިކަމާ ގުޅޭ ގޮތުން ޕެންޓަގަންގެ ތަރުޖަމާނު ވިދާޅުވެފައިވާ ގޮތުގައި، އިސްރާއީލަށް ކުރައްވާ ދަތުރުފުޅު ހެގްސެތު ކެންސަލް ކުރައްވާފައި ނުވެ އެވެ. އެހެން ނަމަވެސް، އޭގެ ކުރިން ރައީސް ޓްރަމްޕްގެ ދަތުރުފުޅާ ދިމާވާތީ، ޓްރަމްޕްގެ އަރިހުގައި ވަޑައިގެންނެވުމަށް ފަހު، އޭގެ ފަހުން އިސްރާއީލަށް ވަޑައިގަންނަވަން ބޭނުންފުޅު ވަނީ ކަމަށެވެ. 

މިފަހަކަށް އައިސް އިސްރާއީލާ މަޝްވަރާ ކުރުމެއް ނެތި ޓްރަމްޕް ބައެއް ނިންމުންތައް ނިންމަވާ ކަމަށް މީޑިއާ ތަކުގައި ވަނީ ބުނެފަ އެވެ. އެގޮތުން ހޫތީން އަށް ދެމުން އައި ހަމަލާތައް ހުއްޓާލުމަށް ވެސް ނިންމެވީ، އިސްރާއީލާ އެއްވެސް މަޝްވަރާ ކުރުމެއް ނެތި ކަމަށް ވަނީ ބުނެފަ އެވެ.

އެކަމާ ގުޅިގެން އިސްރާއީލް އިން ވަނީ ކަންބޮޑުވުން ފާޅު ކޮށްފަ އެވެ. އަދި އެ ނިންމުން އެމެރިކާ އިން ނިންމީ، ޔަމަނަށް އަމާޒުކޮށް އިސްރާއީލުން ހަމަލާ ދިން ފަހުންނެވެ.