ފުލުހުންގެ މުއައްސަސާއަށް އިތުބާރު ހޯދުމަށް އާންމުކުރެވެން ހުރި މައުލޫމާތުތައް ހާމަކުރަންޖެހޭ: ޑެޕިއުޓީ ކޮމިޝަނަރ އޮފް ޕޮލިސް
9 މެއި 2025 | ހުކުރު 08:21ފުލުހުންގެ ޒިންމާ އަދާކުރުމުގައި މުވާސަލާތު ކުރުމުގެ ހުނަރުގެ މުހިއްމު
އިސްކަންދަރުކޮށީގައި ކުރިއަށް ގެންދިޔަ ބައްދަލުވުމުގައި ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން ވާހަކަދައްކަވަނީ
ފުލުހުންގެ މުއައްސަސާއަށް ރައްޔިތުންގެ އިތުބާރު ހޯދުމަށް ހާމަކަންބޮޑުގޮތެއްގައި އާންމުކުރެވެން ހުރި މައުލޫމާތުތައް ހާމަކުރަންޖެހޭ ކަމަށް ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން ވިދާޅުވެއްޖެއެވެ.
ބުރާސްފަތި ދުވަހު ޑެޕިއުޓީ ކޮމިޝަނަރ އޮފް ޕޮލިސް ނަވީން، ވަނީ ސުޕްރިންޓެންޑެންޓް އޮފް ޕޮލިސް ރޭންކުގެ އޮފިސަރުންނާ ބައްދަލުކުރައްވާފައެވެ.
އިސްކަންދަރުކޮށީގައި ކުރިއަށް ގެންދިޔަ މި ބައްދަލުވުމުގައި، ފުލުހުންގެ ޒިންމާ އަދާކުރުމުގައި މުވާސަލާތު ކުރުމުގެ ހުނަރުގެ މުހިއްމުކަމަށް އިޝާރާތްކުރައްވައި ނަވީން ވިދާޅުވީ، ކޮންމެ ފުލުހަކީވެސް ހަރުދަނާ މުވާސަލާތީ ހުނަރުތައް ދަސްކޮށް، ފުލުހެއްގެ ޒިންމާ އުފުލުގައި އެހުނަރުގެ ބޭނުން ހިފާ މީހަކަށް ވާންޖެހޭނެ ކަމަށް ދެކިލައްވާކަމަށެވެ. އަދި ލީޑަރޝިޕް މަގާމުތަކުގައި ތިއްބަވާ ފުލުހުން އަދާކުރައްވަންޖެހޭ ޒިންމާތަކާއި، އެކުވެރި މާހައުލެއްގައި ގުޅިގެން މަސައްކަތްކުރުމުގެ މުހިންމުކަން ފާހަގަކުރެއްވިއެވެ.
މީގެއިތުރުން، ފުލުހުންގެ މުއައްސަސާގެ ގަދަރު ހިފެހެއްޓުމަށް ކޮންމެ ފުލުހަކުވެސް މަސައްކަތް ކުރައްވަންޖެހޭ ކަމަށާއި، ރައްޔިތުންގެ އިތުބާރު ހޯދުމަށް ހާމަކަންބޮޑުގޮތެއްގައި އާންމުކުރެވެން ހުރި މައުލޫމާތުތައް ހާމަކުރުމުގެ މުހިންމުކަން ވެސް ފާހަގަކުރެއްވިއެވެ.
ނަވީން ވިދާޅުވީ، ފުލުހުންނަކީ ތަފާތު ގިނަ މަސައްކަތްތައް ކުރަންޖެހޭ ބައެއް ކަމަށާއި، ޒިންމާދާރުކަމާއެކު އިސް މަގާމުތަކުގައި ތިއްބަވާ ފުލުހުން ދަށުގައި މަސައްކަތް ކުރައްވައި ފުލުހުންނަށް މަގުދައްކައިދީ އެންމެން ގުޅިގެން މަސައްކަތްކުރުމުން ރައްޔިތުން ބޭނުންވާފަދަ ފުރިހަމަ ޚިދުމަތެއް ފޯރުކޮށްދެވިދާނެ ކަމަށެވެ.
މީގެ އިތުރުން ނަވީން ވިދާޅުވީ ފުލުހުންގެ މެދުގައި އޮންނަންޖެހޭ އެކަކު އަނެއްކަކަށް އިހުތިރާމު ކުރުމުގެ ސަގާފަތް އާލާކޮށް ދެމެހެއްޓުމާއި މަސައްކަތުގެ ވަގުތުގައި ފުރިހަމަ ސަމާލުކަން ދިނުމުގެ މުހިއްމުކަމާއި، ފަރުވާތެރިކަމާއެކު މަސައްކަތްތައް ނިންމުން މުހިންމު ކަމަށެވެ.
ކޮންމެ ފުލުހަކުވެސް ދިރިއުޅުމުގައި ގޮންޖެހުންތަކާ ކުރިމަތިލާން ޖެހޭނެ ކަމަށާއި، ހިތްހަމަނުޖެހޭ ދަނޑިވަޅުތަކުގައިވެސް އަވަސް އަރުވާލައި، ނިންމުންތައް ނުނިންމުމަށް ނަވީން އިރުޝާދު ދެއްވިއެވެ. އަދި މުވައްޒަފުންނާއި ވަސީލަތްތައް މަދު ނަމަވެސް، މިހާރަށްވުރެ ޒިންމާދާރު ގޮތެއްގައި މަސައްކަތް ކުރުމަށް އިލްތިމާސްކުރެއްވިއެވެ.
މި ބައްދަލުވުމުގައި ނަވީން ވަނީ، ދިވެހި ފުލުހުންގެ ޚިދުމަތުގެ އިސް އޮފިސަރުންނަށް މުހިންމު އިރުޝާދުތަކެއް ދެއްވާފައެވެ. ހާއްސަކޮށް، ފުލުހުންގެ މަސައްކަތުގެ އަހުލާގާއި، ނަޒާހާތްތެރިކަމުގެ މުހިންމުކަމާއި، އެކުވެރިކަމާއެކު މަސައްކަތްކުރުމުގެ މުހިންމުކަމަށް އަލިއަޅުވާލައްވާފައިވެއެވެ.
