ދ. ވާނީ ގައި ޓްރެއިނިންގ ހަދަމުންދަނިކޮށް ހާލު ދެރަވެ ފަރުވާދެމުންދިޔަ ޕޮލިސް ކޮންސްޓަބަލް ހުސައިން ގާއިސް ނިޔާވެއްޖެއެވެ.

ފުލުހުން ބުނީ ދިވެހި ފުލުހުންގެ ޚިދުމަތުގެ 40 ވަނަ ޕޮލިސް އިނީޝިއަލް ޓްރެއިނިންގ ކޯހުގައި ތަމްރީނު ފުރިހަމަ ކުރަމުން ދިޔަ ޕޮލިސް ކޮންސްޓަބްލް ޙުސައިން ގާއިސް (34އ) ހާލުދެރަވެ އައިޖީއެމް ހޮސްޕިޓަލް ގައި ފަރުވާދެމުން ދަނިކޮށް ބުަދަ ދުވަހުގެ ހަވީރުގެ ވަގުތެއްގައި ވަނީ ނިޔާވެފައެވެ.

ގާއިސް ހާލު ދެރަވެގެން ފުރަތަމަ ފަރުވާ ދީފައިވަނީ މެއި 5 ވަނަ ދުވަހުގެ ފަތިހު ކުޑަހުވަދޫ ހޮސްޕިޓަލުގައެވެ. އަދި އާދީއްތަ ދުވަހުގެ މެންދުރު ވައިގެ މަގުން މާލެ ގެނެވި އައިޖީއެމްއެޗްގައި ފަރުވާދެވުނެވެ. އެއިރު ވެސް ފުލުހުން ބުނީ އޭނާގެ ހާލު ވަރަށް ކްރިޓިކަލް ކަމަށެވެ.

ދިވެހި ފުލުހުންގެ ޚިދުމަތާ އަލަށް ގުޅޭ ފުލުހުންނަށް ކުރިއަށް ގެންދާ އަސާސީ ތަމްރީނު ކޯހުގެ 40 ވަނަ ބެޗު ފަށާފައިވަނީ މިދިޔަ މަހުގެ 19 ވަނަ ދުވަހުއެވެ.

ފުލުހުންގެ އަސާސީ ތަމްރީނު ކޯހަކީ ފުލުހުންގެ ވަޒީފާއަށް ބޭނުންވާ ތަމްރީނާއި ތަރުބިއްޔަތު އުނގަންނައިދީ ފުލުހުންގެ މަސައްކަތަށް ބޭނުންވާ އިލްމީ ގާބިލުކަމާއި ހުނަރާއި ތަޖުރިބާ ލިބިދިނުމަށް ކުރިއަށް ގެންދާ ކޯހެކެވެ. މި ކޯހުގައި ފިޒިކަލް ޓްރެއިނިންގ، އޮޕަރޭޝަނަލް ސޭފްޓީ އެންޑް ޓެކްޓިކްސް އަދި ގާނޫނާއި ގަވާއިދުތަކުގެ އިތުރުން ފުލުހުންގެ މަސައްކަތްތަކާ ގުޅުންހުރި ބައިތައް ކިޔަވައިދޭނެއެވެ.